The Phnom Penh Post Search

Search form

អ្នករៀបចំ​កីឡា​ប្រពៃណី​នៅ​វិហារសួគ៌ កំពុង​ជួបការ​បារម្ភ

Content image - Phnom Penh Post
សកម្ម​ភាព​ប្រណាំង​ក្របី នៅ​ថ្ងៃ​ភ្ជុំ​បិណ្ឌធំ ដែល​ត្រូវ​បាន​រៀបចំ​នៅ​វត្ត​វិហារសួគ៌ កាល​ពីឆ្នាំ​មុន។ ស្រេង ម៉េងស្រ៊ុន

អ្នករៀបចំ​កីឡា​ប្រពៃណី​នៅ​វិហារសួគ៌ កំពុង​ជួបការ​បារម្ភ

ភ្នំពេញៈ គណៈកម្មការ​រៀបចំការ​ប្រកួត​កីឡា​ប្រពៃណី នៅ​វិហារ​សួគ៌ ដែល​នឹង​ត្រូវ​ធ្វើ​ឡើង​នៅ​ក្នុង​ថ្ងៃ​ភ្ជុំធំ នា​ថ្ងៃទី ២០ ខែ​កញ្ញា ខាងមុខ​នេះ កំពុង​តែមាន​ការបារម្ភ​ទៅ​លើ​បញ្ហា​ការខ្វះ​ក្របី​យក​មក​ប្រណាំង នឹង​សុំ​ឲ្យ​ក្រសួង​ពាក់ព័ន្ធ​ជួយ​បើក​ភ្នែក​មើល​ផង ដើម្បី​កុំ​ឲ្យការ​ប្រកួត​កីឡា​ប្រពៃណី ដែល​មាន​អាយុកាល​រាប់រយ​ឆ្នាំ​មួយនេះ ត្រូវ​រលាយ​បាត់ និង​ក្លាយ​ជា​របស់​ប្រទេស​ផ្សេង ដែល​គេ​កំពុង​ព្យាយាម​លួច​ចម្លង​ពី​យើង។

លោក ថែ ថាំង ប្រធាន​ភូមិ​វិហារ​សួគ៌ និង​ជា​ប្រធាន​គ្រប់គ្រង​ការប្រកួត​កីឡា​ប្រពៃណី នៅ​វិហារ​សួគ៌ បាន​ប្រាប់ ភ្នំពេញ ប៉ុស្តិ៍ កាល​ពី​ម្សិលមិញ​ថា៖ «យើង​នៅ​តែ​មានការ​រៀបចំ​ការប្រកួត​កីឡា​ប្រពៃណី​នៅ​ថ្ងៃ​ភ្ជុំ​ធំ ដោយ​មាន​ការ​ប្រណាំង​សេះ ប្រកួត​ចំបាប់ គុនដំបង សម្តែង​ល្បុក្កតោ និង​ប្រណាំង​ក្របី ប៉ុន្តែ​នៅ​ឆ្នាំនេះ​យើង​មាន​ការបារម្ភ និង​ដេក​មិន​លក់​ទេ ចំពោះ​ការធ្លាក់​ចុះ​នៃ​ចំនួន​ក្របី។ យើង​ចង់​ទៅ​ទិញ ឬជួល​ក្របី​នៅ​ស្រុក​គេ​មក​ប្រណាំង​ដែរ តែ​ពេលវេលា​ខ្លី​ពេក យើង​ធ្វើ​មិនទាន់»។

លោក​បាន​បន្ថែម​ថា៖ «នៅ​រាល់​ឆ្នាំ យើង​មាន​ចំនួន​ក្របី​ចូលរួម​ច្រើន មិន​ដែល​ក្រោម ១០ គូ​នោះ​ទេ ប៉ុន្តែ​នៅ​ឆ្នាំ​នេះ​យើង​មាន​តែ ៥ គូ​ទេ ព្រោះ​ក្របី​នៅ​ភូមិ​ឃុំ​របស់​យើង វា​កើត​អុតក្តាម ធ្វើ​ឲ្យ​វាឈឺ​ក្រចក មិន​អាច​យក​មក​ជិះ​បាន ដែល​ធ្វើ​ឲ្យ​ប្រជាពលរដ្ឋ​មួយ​ចំនួន បាន​លក់​វា​ទៅ​ឲ្យ​ឈ្មួញ​មកពី​វៀតណាម ហើយ​សព្វថ្ងៃ​នេះ​ការប្រើប្រាស់​ក្របី​សម្រាប់​ធ្វើ​ស្រែចម្ការ​នៅ​ទីនេះ ក៏មាន​ការធ្លាក់​ចុះ​ផងដែរ ព្រោះ​ប្រជាពលរដ្ឋ​មួយ​ចំនួន​បាន​ប្តូរ​មក​ប្រើ​គ្រឿង​ចក្រ​ជំនួស​វិញ»។

លោក ថែ ថាំង បាន​ឲ្យ​ដឹងថា គណៈកម្មការ​ជា​អាជ្ញាធរ​ដែនដី និង​ព្រះចៅអធិការ​វត្ត​វិហារសួគ៌ បាន​រួមគ្នា​ខ្នះខ្នែង​យ៉ាង​ខ្លាំង ទើប​រកបាន​ក្របី ៥ គូ​យក​មក​ប្រណាំង​ជូន​ភ្ញៀវ​ជាតិ និង​អន្តរជាតិ បាន​ទស្សនា នៅ​ថ្ងៃ​ភ្ជុំធំ​ខាងមុខ​នេះ ខណៈ​ក្រសួង​អប់រំ យុវជន និង​កីឡា អាជ្ញាធរ​ថ្នាក់​ខេត្ត ព្រមទាំង​ក្រសួង​ពាក់ព័ន្ធ​ផ្សេងៗ​ទៀត មិន​បាន​ចូលរួម​ជ្រោមជ្រែង​ទៅ​លើ​ការរៀបចំ​ការប្រកួត​កីឡា​ប្រពៃណី​នៅ​វិហារសួគ៌​នេះ​ទេ។

លោក​បាន​សង្កត់ធ្ងន់​ថា៖ «មិនមែន​ខ្ញុំ​ដាក់​កំហុស​ទៅ​លើ​ពួកគាត់​នោះទេ ប៉ុន្តែ​សម្រាប់​ការ រៀបចំ​ឲ្យ​មាន​កីឡា​ប្រពៃណី​នៅ​វិហារសួគ៌​នេះ គឺមាន​តែ​ពួកខ្ញុំ​ជា​គណៈកម្មការ និង​ចៅអធិការ​វត្ត ទេ ជាអ្នក​ស្វះស្វែង​រៀបចំ​ឲ្យ​មាន​ជា​រៀងរាល់​ឆ្នាំ ហេតុនេះ​សូម​ឲ្យ​ក្រសួង​ពាក់ព័ន្ធ​ជួយ​ដឹងឭ និង​យកចិត្ត​ទុកដាក់​ផង ព្រោះ​ការប្រណាំង​ក្របី​នេះ គឺមាន​តែ​នៅ​វិហាសួគ៌​ទេ ដែល​តំណាង​ឲ្យ​ប្រទេស​ទាំងមូល អ៊ីចឹង​ពួកខ្ញុំ​មិន​ចង់​ឲ្យ​វប្បធម៌​ប្រពៃណី​ដ៏​ផូរផង់ ដែល​បាន​បន្សល់​ទុក​ពី​ជីដូនជីតា​រាប់រយ​ឆ្នាំ​មក​នេះ រលាយ​បាត់ និង​ត្រូវ​ប្រទេស​ជិតខាង ដណ្តើម​យក​ទៅ​បាត់​នោះ​ទេ ព្រោះ​បើ​ពឹង​តែ​លើ​ការ​ខំប្រឹង​របស់​ពួកខ្ញុំ និង​ចៅអធិការ​វត្ត យើង​ក៏ពិបាក​ក្នុងការ​ថែរក្សា​កីឡា​ប្រពៃណី​នេះ​ឲ្យ​គង់វង្ស ដែរ»។

យ៉ាងណា​ក៏ដោយ ក្រៅ​ពីការ​ប្រណាំង​ក្របី​ទាំង ៥ គូនេះ គឺ​មានការ​ប្រណាំង​សេះ​រហូត​ដល់ ២៧ គូ សម្តែង​ល្បុក្កតោ​ចំនួន ២ គូ ព្រមទាំង​ការប្រកួត​គុនដំបង និង​ប្រកួត​ចំបាប់​បុរាណ​បែប​ស្ម័គ្រចិត្ត​របស់​អ្នកភូមិ​វិហារ​សួគ៌​តែម្តង ហើយ​សហព័ន្ធ​កីឡា​ចំបាប់​កម្ពុជា ក៏​នឹង​ចូលរួម​សហការ​ផ្នែក​បច្ចេកទេស​លើការ​ប្រកួត​នេះ​ផងដែរ។ ប៉ុន្តែ​គណៈកម្មាធិការ​ជាតិ​អូឡាំពិក​កម្ពុជា (NOCC) ដែល​ធ្លាប់​បាន​ចូលរួម​ឧបត្ថម្ភ​ទៅ​លើ​ការប្រកួត​កីឡា​ប្រពៃណី នៅ​វិហារសួគ៌​កន្លង​មក​នោះ គឺ​នៅ​ឆ្នាំនេះ​មិន​បាន​ចូលរួម​ឧបត្ថម្ភ​ទេ ដោយសារ​ស្ថាប័ន​នេះ​មាន​ការ​មមាញឹក​ច្រើន ហើយ​មន្ត្រី​ជំនាញ​របស់ NOCC គឺ​លោក វ៉ាត់ ចំរើន ក៏ជាប់​ទៅ​បំពេញ​បេសកកម្ម​នៅ​ប្រទេស​តួកម៉េនីស្ថាន ផងដែរ៕

អត្ថបទគួរចាប់អារម្មណ៍

  • សណ្ឋាគារ​ប្រណីត​នៅ​កោះរ៉ុង បើក​ជា​ផ្លូវការ

    ភ្នំពេញៈ សណ្ឋាគារ​ដ៏ប្រណីត Royal Sands នៅលើ​កោះរ៉ុង​របស់​លោក គិត ម៉េង បាន​បើក​ដំណើរការ​ជា​ផ្លូវការ​កាលពី​ថ្ងៃ​ម្សិលមិញ ដែល​គេ​រំពឹង​ថា​នឹង​ទាក់ទាញ​ភ្ញៀវទេសចរ​កាន់តែ​ច្រើន​។

  • ដំរី​ដែល​ចូល​ចម្ការ​អ្នក​ភូមិ​បាន​គេច​ទៅ​ភ្នំ​ដងរែក

    ឧត្តរមានជ័យៈ ក្រុម​មន្ត្រី​បាន​និយាយ​ថា​សត្វ​ដំរី​ញី​មួយ​ក្បាល​ដែល​បាន​ចូល​លុកលុយ​ក្នុង​ចម្ការ​អ្នកភូមិ​រំដួល​ចាស់ ឃុំ​អម្ពិល ស្រុក​បន្ទាយ​អម្ពិល ខេត្ត​ឧត្តរមានជ័យ​កាលពី​ព្រឹក​ថ្ងៃ​អាទិត្យ​នោះ​បាន​គេច​ខ្លួន​ចូល​ទៅ​ក្នុង​តំបន់​ជួរ​ភ្នំ​ដងរែក​វិញ​ហើយ ខណៈ​ដែល​ក្រុម​មន្ត្រី​ជំនាញ​បរិស្ថាន និង​អាជ្ញាធរ​កំពុង​បន្ត​ឃ្លាំ​មើល​ពី​ដំណើរ​របស់​វា​។

  • ព្រះមហាក្សត្រ​អំពាវនាវ​ឲ្យ​ធានា​ការពារ​យុត្តិធម៌​ និង គោរព​សិទ្ធិ​មនុស្ស

    ភ្នំពេញៈ ក្រោយពី​ឈ្នះ​អាសនៈ​ទាំង​ ៥៨ ដោយ​មិន​មាន​អតីត​បក្ស​សង្គ្រោះ​ជាតិ​ដែល​ជា​គូប្រកួត​ដ៏ស័ក្តិសម​នឹង​គ្នា​សម្រាប់​ការបោះឆ្នោត​ព្រឹទ្ធសភា​ពី​ខែ​កុម្ភៈ គណបក្ស​កាន់​អំណាច​ដែល​ទទួល​ជ័យជម្នះ​បាន​បន្ត​គ្រប់គ្រង​ស្ថាប័ន​នីតិប្បញ្ញត្តិ​ជាថ្មី​ដោយ​បើក​សម័យប្រជុំ​លើក​ដំបូង នីតិកាល​ទី​ ៤ ​នៃ​ព្រឹទ្ធសភា​ពី​ម្សិលមិញ​ក្រោម​ព្រះរាជាធិបតីភាព​ព្រះមហាក្សត្រ​ព្រះបាទ​សម្តេច​ព្រះនរោត្តម សីហមុនី ដែល​ព្រះអង្គ​អំពាវនាវ​ឲ្យ​មាន​ការធានា​ការពារ​យុត្តិធម៌ និង​គោរព​សិទ្ធិ​មនុស្ស និង​រួម​សាមគ្គី​គ្នា​ជា​ធ្លុង​មួយ​។

  • នាយក​រដ្ឋមន្ត្រី​បញ្ជា​ឲ្យ​ដកហូត​កោះ​ ៣០ ​មក​វិញ និង​ឲ្យ​ពិនិត្យ​អ្នក​នៅ​ពី​ក្រោយ​ការទន្ទ្រាន​យក​ដី

    ព្រះសីហនុៈ លោក​នាយករដ្ឋមន្ត្រី ហ៊ុន សែន បាន​បញ្ជា​ឲ្យ​ដកហូត​កោះ​ដែល​មិន​បាន​អភិវឌ្ឍ​ប្រមាណ​ ៣០ ​មក​វិញ​ ខណៈ​អត្តសញ្ញាណ​របស់​ម្ចាស់​ក្បាល​ដី​ចំនួន​ ៥៨៤ ​ដែល​មាន​ទាំង​មន្ត្រី​មាន​អំណាច​កំពុង​ត្រូវបាន​ពិនិត្យ​រឿង​នៅ​ពី​ក្រោយ​ខ្នង​ការកាប់​ទន្ទ្រាន​យក​ដី​ដ៏ក្តៅគគុក​នៅ​កោះរ៉ុង ហើយ​មន្ត្រី​ជាន់ខ្ពស់​ខ្លះ​នឹង​មិន​ត្រូវ​ឲ្យ​ចូលរួម​បង្កើត​រដ្ឋាភិបាល​ថ្មី​នៅ​​អាណត្តិ​ក្រោយ​ឡើយ​។