ភ្នំពេញៈ ព្រឹត្តិការណ៍ប្រកួតជើងឯកកីឡាកាយវប្បកម្មអាស៊ីអាគ្នេយ៍ លើកទី ១៥ ឆ្នាំ ២០១៨ (15th South East Asian Bodybuilding & Physique Sports Championships and Congress) នឹងត្រូវបើកការប្រកួតជាលើកដំបូង នៅកម្ពុជាគឺខេត្តសៀមរាប នាថ្ងៃពុធនេះ និងត្រូវបញ្ចប់នៅថ្ងៃសុក្រ ខាងមុខនេះ។
អត្តពលិកចំនួន ១២០ នាក់ តំណាងឲ្យប្រទេសចំនួន ៨ រួម មានម្ចាស់ផ្ទះកម្ពុជា វៀតណាម ថៃ សិង្ហបុរី ហ្វីលីពីន ម៉ាឡេស៊ី មីយ៉ាន់ម៉ា និងឡាវ បានថ្លឹងទម្ងន់រួចរាល់ កាលពីថ្ងៃអង្គារហើយនៅថ្ងៃនេះពួកគេ នឹងចាប់ផ្តើមប្រកួតលើប្រភេទវិញ្ញាសាចំនួន ២០ នៅសណ្ឋាគារសុខាល័យ ហើយអ្វីដែលគួរឲ្យចាប់អារម្មណ៍នោះ កម្ពុជា ក៏មានកីឡាការិនីលេងសាច់ដុំ ៤ នាក់ ចូលរួមក្នុងការប្រកួតនេះដែរ។
លោក Datuk Paul Chua អគ្គលេខាធិការសហព័ន្ធកីឡាកាយវប្បកម្មពិភពលោក និងថ្នាក់ដឹកនាំកីឡាកាយវប្បកម្ម តំណាងឲ្យប្រទេសផ្សេងទៀត បានសម្តែងការស្វាគមន៍យ៉ាងពេញទំហឹង ចំពោះការនាំយកការប្រកួតកីឡាកាយវប្បកម្មអាស៊ីអាគ្នេយ៍ មកកាន់ប្រទេសកម្ពុជា ជាលើកដំបូងនេះ។
លោក Datuk Paul Chua បានថ្លែងក្នុងសន្និសីទកាសែត នៅសណ្ឋាគារសុខាល័យ ក្នុងខេត្តសៀមរាប កាលពីល្ងាចម្សិលមិញថា៖ «ការនាំយកការប្រកួតនេះ មកកាន់ទីនេះ ព្រោះខ្ញុំជឿថា កម្ពុជា អាចធ្វើបាន ហើយតាមរយៈការរៀបចំមកដល់ពេលនេះ ខ្ញុំឃើញថា គ្រប់យ៉ាងបានល្អប្រសើរ ខណៈការស្នាក់នៅ និងការហូបចុក អាចទទួលយកបានទាំងអស់គ្នា គឺភាគីពាក់ព័ន្ធបានប្រឹងប្រែងរៀបចំការប្រកួតនេះ អ៊ីចឹងហើយខ្ញុំសង្ឃឹមថា ការប្រកួតនេះ នឹងទទួលបានជោគជ័យ»។
ចំណែកលោក រស្មី សុខមង្គល ប្រធានសហព័ន្ធកីឡាកាយវប្បកម្មកម្ពុជា បានចាត់ទុកការធ្វើម្ចាស់ផ្ទះការប្រកួតកីឡាកាយវប្បកម្មកម្រិតអាស៊ាននេះ ថាជាពេលវេលាដ៏សំខាន់ ដែលកម្ពុជា ត្រូវបង្ហាញពីសក្តានុពលរបស់ខ្លួនឲ្យប្រទេសក្នុងតំបន់បានឃើញ ខណៈការប្រកួតនេះមានប្រតិភូសរុប ២២៥ នាក់ ក្នុងនោះមានអត្តពលិក ១២០ នាក់ មកពី ៨ ប្រទេសបានចូលរួម ដោយអ្នកទាំងនោះ ភាគច្រើន សុទ្ធតែចង់មកឃើញកម្ពុជា។
លោក សុខមង្គល បានថ្លែងថា៖ «ការទទួលធ្វើជាម្ចាស់ផ្ទះ ជាលើកដំបូងនេះ ដោយសារខ្ញុំគិតថា ខ្មែរយើងអាចធ្វើបាន។ បើទោះបីជាកីឡាកាយវប្បកម្ម ទើបចាប់ផ្តើមនៅកម្ពុជា ដែលផ្តើមចេញពីកីឡាករ ៤ ទៅ ៥ នាក់ ប៉ុន្តែពេលនេះយើងមានអត្តពលិកជិត ២០០ នាក់ និងមានកីឡាករក្មេងៗជាច្រើនទៀត អ៊ីចឹងខ្ញុំសង្ឃឹមថា យើងអាចនឹងដាក់ប្រភេទកីឡាកាយវប្បកម្ម ចូលទៅក្នុងការប្រកួតស៊ីហ្គេម ឆ្នាំ ២០២៣ នៅកម្ពុជា»។
លោកបន្ថែមថា៖ «យើងបានព្យាយាមបណ្តុះកីឡាករឲ្យបានកាន់តែច្រើនពី ១ ឆ្នាំទៅ ១ ឆ្នាំ ហើយតាមគំនិតខ្ញុំ គឺក្នុងខែកញ្ញាឆ្នាំក្រោយ យើងអាចនឹងធ្វើជាម្ចាស់ផ្ទះការប្រកួតកីឡាកាយវប្បកម្មជើងឯកអាស៊ី នៅភ្នំពេញ ដែលអាចមានជាង ៣០ ប្រទេស ហើយប្រទេសផ្សេងៗគេបានឯកភាពឲ្យយើងធ្វើម្ចាស់ផ្ទះចូល ៩៩ ភាគរយហើយ»។
គួរបញ្ជាក់ថា សម្រាប់ការប្រកួតទាំង ២០ វិញ្ញាសានោះ មានការបែងចែកជា ៦ ប្រភេទ ក្នុងនោះប្រភេទ S.E Asian Men’s Bodybuilding Championships មាន ៩ វិញ្ញាសា គឺទម្ងន់ ៥៥ គីឡូក្រាម ៦០, ៦៥, ៧០, ៧៥, ៨០, ទម្ងន់ ៨០ ឡើង វិញ្ញាសាយុវជនក្រោមអាយុ ២១ ឆ្នាំ វិញ្ញាសាសម្រាប់អាយុ ៤០ ឆ្នាំឡើង។ រីឯ ប្រភេទ S.E Asian Men’s Athletic Physique Championships មាន ៤ វិញ្ញាសា គឺកម្ពស់ 165cm + 2kg កម្ពស់ 170cm + 4kg កម្ពស់ 175cm + 6kg កម្ពស់ចាប់ពី 175cm ឡើង + 8kg។
ចំណែកប្រភេទ S.E Asian Men’s Sports Physique Championships មាន ៤ វិញ្ញាសា គឺកម្ពស់ 165cm – 100 = Body Weight កម្ពស់ 170cm – 100 កម្ពស់ 175 cm – 100 និងកម្ពស់ចាប់ពី 175cm ឡើង–100=Body Weight រួមទាំងប្រភេទ S.E Asian Women’s Model Physique Championships (បើកសេរី) ប្រភេទនារី S.E Asian Women’s Athletic Physique Championships (បើកសេរី) និងប្រភេទបុរស ២ នាក់-នារី ២ នាក់ S.E Asian Mixed Pairs Championships (បើកសេរី)៕