ភ្នំពេញ៖ បុរសវ័យ ៣២ ឆ្នាំ លោក លួត សុផល ដែលត្រូវបានគេស្គាល់ និងល្បីល្បាញតាមបណ្តាញសង្គមថា ជាបុរសខ្លាំងខាងទាត់គល់ដូង ដោយគ្មានការឈឺចាប់នោះ មានការជឿជាក់ខ្លាំង និងសង្ឃឹមដល់ ១០០ ភាគរយ ក្នុងការយកឈ្នះលើកីឡាករ ពេជ្រ បណ្ឌិត សម្រាប់ការបង្ហាញខ្លួន នៅលើសង្វៀនថោនជាផ្លូវការលើកដំបូង នាថ្ងៃអាទិត្យនេះ ប៉ុន្តែភាគី ពេជ្រ បណ្ឌិត ក៏ចង់វ៉ៃ លួត សុផល ឱ្យសន្លប់ដូចគ្នា។
តាមរយៈកិច្ចសម្ភាស លួត សុផល ប្រាប់ថា រូបគេមានមុខរបរជាអ្នករត់តាក់ស៊ី និងដឹកឥវ៉ាន់ទៅមកពីអូរស្មាច់ ខេត្តឧត្តរមានជ័យ មកភ្នំពេញ។ សុផល ចាប់អារម្មណ៍ប្រដាល់គុនខ្មែរខ្លាំង ដោយបានចិញ្ចឹមចិត្តចង់ឡើងប្រកួតលើសង្វៀន នៅភ្នំពេញ ដែលមានផ្សាយផ្ទាល់តាមទូរទស្សន៍យូរមកហើយ ប៉ុន្តែបំណងនេះ ត្រូវខកខានដោយសារតែ សុផល គ្មានពេលវេលាគ្រប់គ្រាន់សម្រាប់ហ្វឹកហាត់ គឺរូបគេបានត្រឹមហ្វឹកក្រៅផ្លូវការទាត់ធាក់គ្មានគ្រូបង្វឹក និងគ្មានក្លិប មិនទាន់មានឱកាសឡើងប្រកួត។
យ៉ាងណាក៏ដោយ មួយរយៈពេលចុងក្រោយនេះ លួត សុផល ទទួលបានការហ្វឹកហាត់ត្រឹមត្រូវនៅក្លិបប៉ែនកាក់គុនខ្មែរ។ អតីតអ្នកប្រដាល់ សេន ប៊ុនថេន បានប្រាប់ថា៖ «ខ្ញុំស្គាល់ លួត សុផល គឺរាងកាយគាត់ល្អ និងមានចិត្តចង់ឡើងប្រកួតណាស់ ឥឡូវខ្ញុំយកគាត់ទៅឱ្យហាត់ជាមួយគ្រូ បឺត សំខាន់ មួយរយៈមកហើយ ដោយរំពឹងថា ចាប់គូបានឡើងប្រកួត ហើយសប្តាហ៍នេះ គឺបានឡើងប្រកួតហើយ»។
ចំណែក បឺត សំខាន់ បានប្រាប់បន្ថែមថា៖ «សុផល ហាត់បាន ១ ខែហើយ ហើយឃើញថា កម្លាំងគាត់ល្អណាស់ និងមានចង់ឡើងប្រកួតយ៉ាងពុះកញ្ជ្រោល ខណៈកន្លងមកគាត់មិនធ្លាប់បានប្រកួតនៅភ្នំពេញនោះទេ ប៉ុន្តែគាត់ធ្លាប់ប្រកួត តាមភូមិជនបទបានចំនួន ៥ ដង និងឈ្នះទាំង ៥ តែខ្ញុំមិនច្បាស់ថា ពេលប្រកួតនោះ គាត់ប៉ះជើងអន់ៗ ឬជើងខ្លាំងនោះឡើយ»។
គ្រូបង្វឹកវ័យក្មេងរូបនេះ បានបញ្ជាក់ថា៖ «សម្រាប់ការប្រកួត នៅសង្វៀនថោនសប្តាហ៍នេះ ខ្ញុំមានជំនឿថា គាត់ក្លាហាន គឺមានភាគរយឈ្នះ ឬចាញ់ លឿនបំផុត តែមិនទាន់ដឹងថា យ៉ាងណាទេ ព្រោះប្រកួតនៅភ្នំពេញមានការផ្សាយផ្ទាល់លើកដំបូងអ៊ីចឹង មិនដឹងគាត់ភ័យ ឬយ៉ាងណា?»។ បឺត សំខាន់ បន្ថែមថា៖ «ចាំមើលការប្រកួតនៅសង្វៀនធំអ៊ីចឹង តើគាត់មានភាពតក់ស្លុត ឬយ៉ាងណា ហើយបើសិនគេវ៉ៃល្អនឹងមានទីផ្សារប្រកួតមិនខាន»។
ចំណែក លួត សុផល មានការតាំងចិត្តខ្ពស់ក្នុងការយកឈ្នះលើកីឡាករវ័យ ១៨ ឆ្នាំ ពេជ្រ បណ្ឌិត សម្រាប់ការប្រកួតក្នុងទម្ងន់ ៥៧ គីឡូក្រាម លើសង្វៀននៅភ្នំពេញជាលើកដំបូងនេះ ហើយបើអាចសម្រេចបំណងនេះមែន សុផល នឹងឈប់រត់តាក់ស៊ីមកចាប់អាជីពប្រដាល់វិញម្តង។ លួត សុផល បានបញ្ជាក់យ៉ាងខ្លីថា៖ «ខ្ញុំវ៉ៃយកឈ្នះ ១០០ ភាគរយ ហើយបើខ្ញុំវ៉ៃឈ្នះ ខ្ញុំនឹងហ្វឹកហាត់ប្រកួតជាប់តែម្តង ដោយឈប់រត់តាក់ស៊ីទៀតហើយ»។
យ៉ាងណាក៏ដោយ លោក ពេជ្រ សុផាន់ ជាគ្រូបង្វឹក ពេជ្រ បណ្ឌិត បានចាត់ទុកភាពល្បីល្បាញខាងទាត់គល់ដូងរបស់ លួត សុផល គ្រាន់តែជាការសម្តែង ប៉ុន្តែសម្រាប់ការប្រកួតនៅលើសង្វៀនជាក់ស្តែង លើកនេះ គឺសិស្សរបស់លោក អាចនឹងវ៉ៃឱ្យ សុផល សន្លប់ ទោះបីជា បណ្ឌិត ទើបប្រកួតបាន ១០ដង ឈ្នះ ៨ និងចាញ់ ២ ដងក៏ដោយ។
ពេជ្រ សុផាន់ បាននិយាយថា៖ «ខ្ញុំគិតថា ប្រកួតលក្ខណៈសម្តែងខ្ញុំមិនដឹងទេ ប៉ុន្តែបើឡើងសង្វៀននៅភ្នំពេញ វ៉ៃគ្នាសម្រុកខ្លាំងនោះ គឺកូនសិស្សខ្ញុំ អាចវ៉ៃឱ្យគាត់សន្លប់បាន ព្រោះ លួត សុផល មានអាយុជាង ៣០ ឆ្នាំហើយ ចំណែកកូនសិស្សខ្ញុំ នៅក្មេងកំពុងពេញកម្លាំង គឺមានប្រៀបផ្នែកកម្លាំង។ ខ្ញុំមានទំនុកចិត្តឈ្នះ ដល់ទៅ ៧០ ភាគរយ និងមានអារម្មណ៍ថា គូនេះកូនសិស្សខ្ញុំនឹងវ៉ៃឱ្យសន្លប់មិនខាន»៕