ភ្នំពេញ: អ្នកសរសេរព័ត៌មានកីឡារបស់ភ្នំពេញ ប៉ុស្តិ៍ លោក Hirisave Srikantaiah “HS” Manjunath បានស្លាប់កាលពីព្រឹកថ្ងៃចន្ទ ទី ១០ ខែធ្នូ ឆ្នាំ ២០១៨ ក្រោយពីជួបបញ្ហាសុខភាពដ៏ស្មុគស្មាញជាច្រើន ពិសេសបន្ទាប់ពីបានដួលក្នុងពេលព្យាយាមសរសេរអត្ថបទមួយ។ លោកមានអាយុ ៦៤ ឆ្នាំ។
ស្របពេលដែលទៅយកព័ត៌មានក្នុងព្រឹត្តិការណ៍រត់ពាក់កណ្តាលម៉ារ៉ាតុងអន្តរជាតិអង្គរ នៅខេត្តសៀមរាប លោក Manjunath បានរអិលដួលនៅឯបន្ទប់សណ្ឋាគាររបស់លោក ដោយបានរងរបួសបាក់ឆ្អឹងកជើង។
ក្រោយពីមានប្រវត្តិមានបញ្ហាបេះដូង និងទឹកនោមផ្អែម ការបាក់ឆ្អឹងកជើង បានបង្កើនសម្ពាធកាន់តែខ្លាំងទៅលើប្រព័ន្ធរាងកាយដែលទន់ខ្សោយរបស់លោក ហើយក្រោយមក លោកបានជួបបញ្ហាធ្ងន់ធ្ងរដោយសារតែរបួសនេះ។
មូលហេតុជាផ្លូវការនៃការស្លាប់របស់លោក មិនទាន់ចេញឲ្យដឹងនៅឡើយទេ។ ក្នុងនាមជាកូនទី ៣ របស់ឪពុកឈ្មោះ HS Srikantaiah និងម្តាយឈ្មោះ S Jayamma លោកបានកើតក្នុងទីក្រុង Bangalore ប្រទេសឥណ្ឌា កាលពីខែកុម្ភៈ ឆ្នាំ ១៩៥៤។
លោកមានភាពល្បីល្បាញទៅលើការអធិប្បាយទាក់ទងនឹងកីឡាគ្រីឃីត ហើយក្រោយមក លោកមានភាពល្បីល្បាញទៅលើការយកព័ត៌មានរបស់កីឡាមួយនេះ។
លោកក៏ជាអ្នកលេងកីឡាអុកប្រកបដោយភាពជោគជ័យម្នាក់ផងដែរ ក្រោយពីបានបញ្ចប់ក្នុងចំណាត់ថ្នាក់លេខ ២ ក្នុងការប្រកួតជើងឯកជាតិផ្នែកយុវជន ក្នុងយុវវ័យរបស់លោក។
ក្នុងនាមជាអ្នកចូលចិត្តលេងកីឡាវាយកូនបាល់ម្នាក់ លោក Manjunath នឹងត្រូវគេចងចាំទៅលើការព្យាយាមរបស់លោកក្នុងការជួយផ្សព្វផ្សាយអត្តពលិកក្នុងស្រុក និងសហព័ន្ធកីឡាផ្សេងៗទាំងក្នុងប្រទេសឥណ្ឌា និងផ្ទះទី ២ របស់លោកនៅកម្ពុជា។
ពាក្យមួយឃ្លាដែលលោកចូលចិត្តនិយាយគឺថា៖ «អ្នកត្រូវតែក្លាយជាអ្នកកីឡាដ៏ឆ្នើមម្នាក់ក្នុងជីវិតរបស់អ្នក។ បើទោះបីអ្នកចាញ់ក៏ដោយ ប៉ុន្តែ ជីវិតគឺដូចជាកីឡាអ៊ីចឹង ការដោះស្រាយការបរាជ័យក្នុងជីវិត គឺដូចជាអ្នកកីឡាដ៏ជោគជ័យម្នាក់អ៊ីចឹង ហើយបើទោះបីឈ្នះ មិនត្រូវមានអារម្មណ៍រីករាយហួសហេតុឡើយ។ ទទួលយករាល់អ្វីៗទាំងអស់ក្នុងដំណើរជីវិតរបស់អ្នក»។
ក្រោយពីបានបញ្ចប់អាជីពជាអ្នកអធិប្បាយកីឡាប្រណាំងសេះ លោក Manjunath បានមកនៅកម្ពុជា ក្នុងឆ្នាំ ២០០៨ និងបានធ្វើការឲ្យភ្នំពេញប៉ុស្តិ៍។
លោកបានធ្វើឲ្យគ្រប់គ្នាស្គាល់លោកយ៉ាងឆាប់រហ័សទាក់ទងនឹងការយកព័ត៌មាន និងគាំទ្រកីឡាក្នុងស្រុករបស់កម្ពុជា។
រយៈពេលជាច្រើនឆ្នាំក្រោយមក លោកមានទំនាក់ទំនងយ៉ាងជិតស្និទ្ធជាមួយនឹងគណៈកម្មាធិការជាតិអូឡាំពិកកម្ពុជា និងសហព័ន្ធកីឡាវាយកូនបាល់កម្ពុជា៕