.jpg)
លោកស្រី នួន ស៊ុន្ទរី ពេលប្រគល់ប្រាក់ឧបត្ថម្ភឲ្យលោកអគ្គលេខាធិការ អ៊ូ តារា ក្នុងសន្និសីទ។ ឈន ណន
ភ្នំពេញ៖ អ្នកឧបត្ថម្ភថ្មីរបស់សហព័ន្ធកីឡាគុនល្បុក្កតោកម្ពុជា ដែលគេស្គាល់ថា ជាអ្នកលក់តាមអនឡាញដ៏ល្បី ឈ្មោះថា ស្រីអូន នោះ បានបង្ហាញពីឆន្ទៈខ្ពស់ ក្នុងការជំរុញ និងជួយឧបត្ថម្ភគាំទ្រ គឺធ្វើយ៉ាងណាឲ្យក្បាច់គុនមរតកដូនតាខ្មែរមួយនេះ កាន់តែមានភាពល្បីល្បាញនៅលើសកលលោក ស្របទៅតាមការចង់បានរបស់ថ្នាក់ដឹកនាំសហព័ន្ធ និងប្រជាជនកម្ពុជា។
លោកស្រី នួន ស៊ុន្ទរី ហៅ ស្រីអូន ជាអគ្គនាយិកាក្រុមហ៊ុនសម្រស់ធម្មជាតិបាននិយាយថា៖ «នាងខ្ញុំពិតជាស្រឡាញ់កីឡាគុនល្បុក្កតោនេះខ្លាំងមែនទែន និងចង់ចូលរួមជួយដល់កីឡានេះ អ៊ីចឹងការបានចូលរួមឧបត្ថម្ភដល់សហព័ន្ធកីឡាល្បុក្កតោកម្ពុជានៅពេលនេះ គឺមានន័យថា នាងខ្ញុំបានសម្រេចបំណងប្រាថ្នារបស់ខ្លួនហើយ»។
អគ្គនាយិកាក្រុមហ៊ុនសម្រស់ធម្មជាតិ ដែលមានជំនាញខ្លាំងលើការលក់ផលិតផល Coosea នៅតាមអនឡាញរូបនេះ បានបន្តថា៖ «នាងខ្ញុំមានក្ដីសង្ឃឹមយ៉ាងមុតមាំថា ក្បាច់គុនល្បុក្កតោរបស់ប្រទេសកម្ពុជា ដែលជាកេរដំណែលពីដូនតា និងបុព្វបុរសខ្មែរយើង នឹងកាន់តែរីកមុខរីកមាត់ ព្រមទាំងមានភាពល្បីល្បាញនៅលើសកលលោក ហើយក្រុមហ៊ុនសម្រស់ធម្មជាតិនឹងនៅតែមានវត្តមានជួយដល់ក្បាច់គុនល្បុក្កតោជារៀងរហូត»។
ការលើកឡើងរបស់អ្នកលក់តាមអនឡាញដ៏មានប្រជាប្រិយភាពរូបនេះ ត្រូវបានធ្វើឡើងនៅក្នុងសន្និសីទកាសែតកាលពីថ្ងៃសុក្រ គឺនៅពេលដែលក្រុមហ៊ុនសម្រស់ធម្មជាតិរបស់លោកស្រីបាននាំយកទឹកប្រាក់ចំនួនចំនួន ១៦ ៨៥០ ដុល្លារ មកឧបត្ថម្ភដល់ការប្រកួតកីឡាគុនល្បុក្កតោជ្រើសរើសជើងឯកថ្នាក់ជាតិ ប្រចាំឆ្នាំ ២០២០ ដែលនឹងត្រូវធ្វើនៅថ្ងៃទី ២២ ដល់ទី ២៤ ខែ មករា ឆ្នាំ ២០២១ ខណៈការប្រកួតដែលធ្វើនៅអគារដំបូលទូក ក្នុងសាកលវិទ្យាល័យភូមិន្ទភ្នំពេញមួយនេះ មានអត្តពលិកចូលរួមចំនួន ១៩០ នាក់ មកពី ២៤ ក្លិប-សមាគម នៅក្នុងប្រទេសកម្ពុជា។
លោកស្រី នួន ស៊ុន្ទរី បានបន្តថា៖ «នេះជាលើកដំបូង ដែលក្រុមហ៊ុនសម្រស់ធម្មជាតិបានឧបត្ថម្ភផ្តាច់មុខដល់ក្បាច់គុនល្បុក្កតោ ហើយខ្ញុំបានពិភាក្សាជាមួយនឹងប្រធានសហព័ន្ធថា ខ្ញុំចង់ឧបត្ថម្ភឲ្យបានសស្រោកសស្រាំ ដើម្បីធ្វើឲ្យគុនល្បុក្កតោកាន់តែមានសក្តានុពលខ្លាំង និងមានភាពល្បីល្បាញនៅលើសកលលោកតែម្តង។ ការឧបត្ថម្ភនេះ អាចទុកជាគំរូមួយ ដើម្បីឲ្យបងប្អូន និងប្រជាពលរដ្ឋខ្មែរគាត់ឃើញហើយ ចូលរួមជាមួយនាងខ្ញុំដែរ ក្នុងការជួយឲ្យល្បុក្កតោមានការរីកចម្រើនកាន់តែខ្លាំងទៅតាមបំណងប្រាថ្នារបស់ថ្នាក់ដឹកនាំសហព័ន្ធ និងប្រជាជនកម្ពុជាយើង»។
លោក ច័ន្ទ សារុន ប្រធានសហព័ន្ធកីឡាគុនល្បុក្កតោកម្ពុជា និងលោក វ៉ាត់ ចំរើន ជាអនុប្រធាន សុទ្ធតែបានបង្ហាញអារម្មណ៍រំភើបរីករាយ និងចាត់ទុកការឧបត្ថម្ភពីក្រុមហ៊ុនសម្រស់ធម្មជាតិនេះ ជាការរួមចំណែកមួយដ៏ធំធេង និងជាចំណុចចាប់ផ្តើមក្នុងការជំរុញឲ្យវិស័យកីឡាគុនល្បុក្កតោកាន់តែមានភាពរីកចម្រើនបន្ថែមទៀត។
ចំណែកលោក អ៊ូ តារា ជាអគ្គលេខាធិការសហព័ន្ធកីឡាគុនល្បុក្កតោកម្ពុជាបាននិយាយថា៖ «ការចូលរួមជួយឧបត្ថម្ភរបស់ក្រុមហ៊ុនសម្រស់ធម្មជាតិនេះ ពិតជាសំខាន់ខ្លាំងណាស់ក្នុងការជួយលើកកម្ពស់ល្បុក្កតោ និងផ្តល់ទំនុកចិត្តកាន់តែខ្លាំងដល់អត្តពលិកយើងក្នុងការប្រកួតប្រជែងគ្នា ស្របពេលដែល សហព័ន្ធយើងមិនចេះឆ្អែតឆ្អន់ក្នុងការស្វែងរកអ្នកមានសមត្ថភាពមកចូលរួមជាមួយក្រុមជម្រើសជាតិ គឺជារៀងរាល់ឆ្នាំទាំងមន្ត្រី និងមន្ត្រីបច្ចេកទេសរបស់យើងតែងតែតាមមើលពីទេពកោសល្យរបស់កីឡាករកីឡាការិនីយើង ព្រោះមនុស្សថ្មីៗ និងអ្នកមានទេពកោសល្យគាត់លេចឡើងរាល់ៗឆ្នាំ»៕
