ភ្នំពេញ៖ កីឡាករ ឈុតសេរី វ៉ាន់ថង បានធ្វើឲ្យការវិលមកកាន់សង្វៀនប្រដាល់របស់គេពោរពេញទៅដោយសំឡេងគាំទ្រពីមហាជន ខណៈកីឡាករទើបប្រឡងបាក់ឌុបរូបនេះ បានយកឈ្នះជើងខ្លាំងរបស់ថៃ Tuon Pe ដ៏មិនគួរឲ្យចង់ជឿនោះ។ ចំណែក ធឿន ធារ៉ា ក៏រកឃើញការឈ្នះរបស់ខ្លួនផងដែរ ប៉ុន្តែ លន បញ្ញា បានបាត់បង់ឱកាសមាសក្រោមស្នាដៃថៃ Link Loom ដ៏គួរឲ្យសោកស្តាយបំផុត។
សម្រាប់ការប្រកួតដណ្តើមប្រាក់លាន នៅលើសង្វៀន CNC កាលពីថ្ងៃសៅរ៍ កន្លងមកនេះ ឈុតសេរី វ៉ាន់ថង ដែលបានឃ្លាតឆ្ងាយពីសង្វៀនប្រដាល់ជិត ៣ ខែមកហើយនោះ បានបង្ហាញការប្រកួតយ៉ាងវៃឆ្លាតបំផុត គឺការវ៉ៃជាប្រយោល ដោយការម៉ាត់ ទាត់ និងវាយកែងឆ្វេងស្តាំ ដើម្បីយកឈ្នះដោយពិន្ទុជាឯកច្ឆន្ទលើម្ចាស់ខ្សែក្រវាត់ Tuon Pe យ៉ាងស្វិតស្វាញបំផុត ប៉ុន្តែ វ៉ាន់ថង ក៏ត្រូវបាន Tuon Pe តាមវាយលុក ព្រមទាំងទាត់ក្រោម និងចាប់បោកផ្តួល ជាច្រើនលើក ឡើងចង់ទ្រោមខ្លួនផងដែរ។
ជាមួយនឹងជ័យជម្នះ លោក ឈុត សេរី ដែលជាគ្រូបង្វឹក និងជាឪពុកបង្កើតរបស់ ឈុតសេរី វ៉ាន់ថង បានប្រាប់ភ្នំពេញ ប៉ុស្តិ៍ កាលពីម្សិលមិញថា៖ «បើទោះបីជា វ៉ាន់ថង បានយកឈ្នះជើងខ្លាំង Tuon Pe ប៉ុន្តែគេនៅមិនទាន់ធ្វើបានល្អប៉ុន្មានទេ គឺគេនៅមានចំណុចខ្វះខាតច្រើន ហើយអ្វីដែលពិសេស ខ្ញុំមិនឃើញ វ៉ាន់ថង បញ្ចេញស្នៀតទាត់កាត់នោះទេ»។
លោក ឈុត សេរី ដែលជាអ្នកឈរស្រែកបញ្ជាការប្រកួតរបស់ វ៉ាន់ថង ដោយផ្ទាល់បានបន្ថែមថា៖ «បើសិនជា វ៉ាន់ថង ទាត់កាត់បានល្អដូចមុនៗគឺ Tuon Pe អាចចាញ់គ្រាំគ្រាជាងនេះ ព្រោះកន្លងមក កីឡាករដែលដើរចូលឲ្យយើងវ៉ៃបែបនេះ ភាគច្រើនតែងតែត្រូវបាន វ៉ាន់ថង ទាត់ឲ្យខូចជើងក្រោម ប៉ុន្តែការប្រកួតលើកនេះ វាមិនឃើញបញ្ចេញស្នៀតនេះនោះទេ»។
ជាមួយគ្នានេះ លោក ឈុត សេរី ក៏បានទទួលស្គាល់ថា លោកមានការភ័យ នៅពេលឃើញ Tuon Pe ចាប់បោក វ៉ាន់ថង ឲ្យដួលជាច្រើនលើកផងដែរ។
លោកបញ្ជាក់ថា៖ «ខ្ញុំមានអារម្មណ៍ភ័យ នៅពេលឃើញ វ៉ាន់ថង ត្រូវបានគូប្រកួតបោកឲ្យដួលជាច្រើនលើកបែបនេះ ព្រោះការចាប់បោកឲ្យដួលនេះ ក៏អាចនឹងធ្វើឲ្យឃើញថ្លោះចង្កេះ ឬជាប់គាំងនៅចំណុចណាមួយបានដែរ ហេតុនេះខ្ញុំនឹងពង្រឹងបន្ថែមទៅលើការរក្សាជំហរ និងទប់ខ្លួន កុំឲ្យគេបោកដួលច្រើនដងបែបនេះ ហើយខ្ញុំក៏នឹងបង្វឹកបន្ថែមទៅលើចលនាចេញចូល គឺធ្វើម៉េចឲ្យ វ៉ាន់ថង វាយចេញបានលឿនជាងនេះ»។
ចំណែកកីឡាករវាយមិនដកថយ ខាំ ខ្លានាង ក៏បានឈ្នះប្រាក់លាន កាលពីថ្ងៃសៅរ៍នោះដែរ ព្រោះរូបគេបានវ៉ៃកែង បណ្តាលឲ្យថៃ Khav Krachang បែកលើចិញ្ចើមស្តាំយ៉ាងធំ រហូតគ្រូពេទ្យសម្រេចបញ្ឈប់កីឡាករថៃម្នាក់នេះ នៅទឹកទី ៤។ រីឯជើងខ្លាំង ធឿន ធារ៉ា បានយកឈ្នះម្ចាស់ខ្សែក្រវាត់ថៃ Khun Deth ដើម្បីស្តារមុខមាត់បានមួយកម្រិតវិញ បន្ទាប់ពីរូបគេបានចាញ់ជើងខ្លាំងថៃ Awatan ចំនួន ២ លើកជាប់គ្នាទាំងគ្រាំគ្រាខ្លួននោះ។
ដោយឡែកកីឡាករ លន បញ្ញា មិនអាចស្វែងរកឱកាសឡើងទៅដណ្តើមខ្សែក្រវាត់ អមជាមួយប្រាក់រង្វាន់ ៦ ០០០ ដុល្លារ ក្នុងកម្មវិធី «កម្ពុជាសង្វៀនគុនខ្មែរ» បាននោះទេ ខណៈរូបគេបានបន្តចាញ់គូសត្រូវចាស់ Link Loom ក្នុងវគ្គផ្តាច់ព្រ័ត្រប្រចាំគ្រុបទី ២ កាលពីថ្ងៃសៅរ៍នោះ ស្របពេល ពុទ្ធ សំបូរ បានយកឈ្នះថៃ Dav Viseth ដើម្បីបានលេខ ៣ និងប្រាក់រង្វាន់ចំនួន ៦ លានរៀល។
លន បញ្ញា ប៊ិះតែសន្លប់ក្រោមផ្លែកែងរបស់ Link Loom នៅក្នុងទឹកទី ២ ម្តងទៀតទៅហើយ ខណៈរូបគេបានភ្លាត់ស្នៀត ដោយត្រូវបាន Link Loom វាយកែងស្តាំចូលថ្គាម និងទាត់ថែម ១ ជើង បណ្តាលឲ្យដួលទាំងវង្វេងវង្វាន់ និងត្រូវបានអាជ្ញាកណ្តាលរាប់ភ្លាមៗនោះ។ ទោះបីជាយ៉ាងណា បញ្ញា បានប្រឹងប្រែងទប់ស្ថានភាពនោះបាន ហើយបានខំប្រឹងប្រែងវាយប្តូរជង្គង់ និងកែងជាមួយ Link Loom រហូតចប់ ៥ ទឹកពេញ។
ការចាញ់ដោយពិន្ទុដាច់នេះ លន បញ្ញា បានត្រឹមទទួលទឹកប្រាក់ ៨ លានរៀល ចំពោះការធ្លាក់ចេញពីការប្រកួតនេះ ខណៈ Link Loom ដែលបានប្រាក់រង្វាន់ ២ លានរៀល និងម៉ូតូ Zoomer X មួយគ្រឿងនោះ ត្រូវឡើងទៅប្រកួតផ្តាច់ព្រ័ត្រដណ្តើមយកខ្សែក្រវាត់ទម្ងន់ ៦០ គីឡូក្រាមនេះជាមួយអ្នកបានលេខ ១ ប្រចាំគ្រុបទី ១ គឺ ម៉ឺន មេឃា ដែលជាកូនបង្កើតរបស់ អេ ភូថង៕