ភ្នំពេញ៖ កីឡាករជើងចាស់ ៤រូប មាន ឯម សុធី, អេលីត សាន់, បាង កាយ៉ាក និង ថា សារុន ត្រូវបានគណៈកម្មការរៀបចំការប្រកួតរបស់សង្វៀនថោន ដាក់ឱ្យប្រកួតម៉ារ៉ាតុងដណ្តើមប្រាក់លាននៅថ្ងៃអាទិត្យនេះ ខណៈសមត្ថភាពរបស់អ្នកទាំង ៤ នេះ ត្រូវបានគេស្គាល់ថា មានកម្រិតប្រកួតទាក់ទាញជួរមុខ ក្នុងប្រភេទទម្ងន់ ៦០ គីឡូក្រាម។ ប៉ុន្តែគ្រូបង្វឹករបស់ អេលីត សាន់ និង ឯម សុធី បានអះអាងពីការរំពឹងឈ្នះខ្ពស់ដូចគ្នា ថាសិស្សរបស់ខ្លួន នឹងឈានទៅដណ្តើមប្រាក់ចំនួន ៣,៤ លានរៀល។
លោក ឯម វុត្ថា គ្រូបង្វឹក ឯម សុធី បាននិយាយថា៖ «នៅក្នុងចំណោមកីឡាករទាំង ៣ រូបនេះ គឺ ឯម សុធី មានការបារម្ភតិចតួចប៉ុណ្ណោះ បើសិនចាប់ឆ្នោតប៉ះ បាង កាយ៉ាក ព្រោះគេជាកីឡាករជើងចាស់ កម្ពស់ខ្ពស់ជាង និងមានក្បាច់ជង្គង់ល្អ ធ្លាប់មានបទពិសោធប្រកួតនៅប្រទេសថៃ ល្បីល្បាញ ប៉ុន្តែបើគិតពីសមត្ថភាពបច្ចុប្បន្ន គឺសមត្ថភាពប្រកួតធ្លាក់ចុះជាងមុន ដែលខ្ញុំគិតថា ភាគរយឈ្នះខ្ពស់»។
គ្រូបង្វឹកវ័យក្មេងរូបនេះបានបន្ថែមថា៖ «ចំណែក ថា សារុន មិនបញ្ហា ប៉ុន្តែកណ្តាប់ដៃអេលីត សាន់ ក៏ជាឧបសគ្គធំ ១ ដែរ គឺមិនមែនស៊ីផុយនោះឡើយ គឺអាចនឹងឈ្នះ ដោយតឹងតែង។ យ៉ាងណាក៏ដោយ តាមរយៈការហ្វឹកហាត់ត្រៀមសុខភាពល្អ ដើម្បីប្រកួត គឺសង្ឃឹមឈ្នះ ៧០ ភាគរយ បានប្រាក់លាន ក្នុងនោះបារម្ភតែក្នុងករណីប៉ះជាមួយ អេលីត សាន់ គឺអាចភ្លាត់ក្នុងក្បាច់កណ្តាប់ដៃក៏ថាបានដែរ ព្រោះប្រកួតគ្នា ក្នុងលក្ខណៈសម្រុកខ្លាំងៗ មិនអាចទស្សន៍ទាយបាននោះទេ»។
ចំណែក ឯម សុធី បានប្រាប់ថា៖ «ខ្ញុំគិតដូចគ្រូដែរ ដោយពីមុនខ្ញុំខ្លាច បាង កាយ៉ាក ព្រោះគាត់ខ្ពស់ជាង លំបាកពេលលេងក្បាច់ជង្គង់ ប៉ុន្តែតាមគ្រូប្រាប់ គឺបច្ចុប្បន្នគាត់ធ្លាក់ចុះទាំងបច្ចេកទេស និងកម្លាំង ហេតុនេះខ្ញុំបារម្ភទៅលើកណ្តាប់ដៃ អេលីត សាន់ វិញ ក្នុងពេលវាយលុកខ្លាំង ៣ ទឹក ដ្បិតអីការវ៉ៃប្តូរគ្នា មិនអាចទៀងទេ មិនដឹងថា សន្លប់គេ ឬខ្ញុំ បើចូលគោលដៅពេញដូចគ្នានោះ»។
ស្រដៀងគ្នានេះលោក ស៊ន អេលីត គ្រូបង្វឹក អេលីត សាន់ បាននិយាយថា៖ «កីឡាករជើងចាស់ ថា សារុន និង បាង កាយ៉ាក មិនជាឧបសគ្គធំនោះទេ ព្រោះសូម្បីតែ អេលីត កែវឡុងរបស់ខ្ញុំ ធ្លាប់វ៉ៃឱ្យទន់ជ្រាយបានដែរ ប៉ុន្តែខ្ញុំព្រួយបារម្ភក្នុងករណីជួប ឯម សុធី ព្រោះចូលវាយសម្រុកខ្លាំង គឺអាចនឹងសន្លប់ ហើយ ឯម សុធី ចាស់វស្សា និងជាសិស្សច្បងល្បីល្បាញជំនាន់មុន មានបទពិសោធប្រកួតយូរឆ្នាំផង»។
លោក ស៊ន អេលីត បានបន្ថែមថា៖ «បើតាមខ្ញុំមើលពីសមត្ថភាពកីឡាករទាំង ៤ ក្នុងរយៈពេលចុងក្រោយនេះ ឯម សុធី និង អេលីត សាន់ មានប្រៀបជាងបន្តិចបន្តួច ហើយកម្លាំងក៏ល្អជាងផងដែរ»។ តាមប្រវត្តិប្រកួត ឯម សុធី ប្រកួតបានច្រើនជាងគេ គឺ ១១៣ ដង ឈ្នះ ៨៣ ចាញ់ ២៥ និងស្មើ ៥ ដង រីឯ ថា សារុន ធ្លាប់ប្រកួត ៩៨ ដង ឈ្នះ ៦០ ចាញ់ ៣៦ ស្មើ ២ ដង ចំណែក បាង កាយ៉ាក ប្រកួតបាន ៧២ ដង ឈ្នះ ៥០ ចាញ់ ២០ ស្មើ ២ ដង ហើយ អេលីត សាន់ ប្រកួតបាន ៧១ ដង ឈ្នះ ៥៩ ចាញ់ ១០ និងស្មើ ២ ដង៕