ភ្នំពេញៈ អ្នកប្រដាល់ចិត្តធំ ឯម សុធី របស់ក្លិបថ្មគោលពោធិ៍សែនជ័យ បានអះអាងថា ការវិលមកប្រកួតម៉ារ៉ាតុងដណ្តើមប្រាក់លាន ទម្ងន់ ៦០ គីឡូក្រាម នៅលើសង្វៀនថោន ថ្ងៃអាទិត្យនេះ គឺរូបគេបានហ្វឹកហាត់ខ្លាំង ដើម្បីវ៉ៃដណ្តើមឱ្យបានលុយធំម្តង ប៉ុន្តែ សុធី ហាក់នៅញញើតបេក្ខភាព ព្រឿង សុជាតិ ចំណែកភាគី សោម វិឆ័យ និង រៀម វណ្ណៈ មិនហ៊ានរំពឹងខ្ពស់ទេ។
ចំពោះបេក្ខភាពទាំង ៤ នាក់ ដែលត្រូវប្រកួតប្រជែងគ្នាដណ្តើមប្រាក់លានប្រចាំសប្តាហ៍នេះ សុទ្ធតែធ្លាប់ចូលប្រកួតប្រជែងក្នុងកម្មវិធីម៉ារ៉ាតុងនេះច្រើនលើកដូចគ្នា ប៉ុន្តែមានតែ ព្រឿង សុជាតិ ទេ ដែលធ្លាប់ឈ្នះតំណែងជើងឯកម្តង អមដោយប្រាក់រង្វាន់ ៣,៤ លានរៀល តែពេលនេះប្រាក់រង្វាន់លេខ ១ បានកើនឡើងដល់ ៤ លានរៀលហើយ។ ចំណែក ឯម សុធី, សោម វិឆ័យនិង រឿម វណ្ណៈ ធ្លាប់ធ្លាក់ចេញពីកម្មវិធីនេះ ម្នាក់ ២ ទៅ ៣ លើកមកហើយ។
យ៉ាងណាក៏ដោយ សម្រាប់ការប្រកួតនេះ កីឡាករ ឯម សុធី មានមហិច្ឆតាខ្ពស់ក្នុងការដណ្តើមឱ្យបានប្រាក់លាននេះ បើទោះបីជា រូបគេហាក់ញញើតនឹង ព្រឿង សុជាតិ ក៏ដោយ។ សុធី បាននិយាយថា៖ «ការប្រកួតលើកមុន ខ្ញុំចាញ់មិនអស់ចិត្ត គឺបានឆ្លងចូលវគ្គផ្តាច់ព្រ័ត្រដែរ ចំណែកការប្រកួតនៅថ្ងៃអាទិត្យនេះ ខ្ញុំរំពឹងឈ្នះ ៨០ ភាគរយ ប៉ុន្តែបើប៉ះជាមួយ ព្រឿង សុជាតិ គឺលំបាកបន្តិចដែរ។ ទោះយ៉ាងណា លើកនេះ ខ្ញុំហាត់បានល្អ ដើម្បីវ៉ៃឱ្យឈ្នះ បានប្រាក់រង្វាន់ធំនេះម្តង»។
ចំណែកលោក ធន់ សុភា ជាគ្រូបង្វឹក ព្រឿង សុជាតិ មានការរំពឹងខ្ពស់ថា សិស្សរបស់លោក នឹងឈ្នះប្រាក់លានជាលើកទី២ នៅក្នុងការប្រកួតលើកនេះ។
លោកបានអះអាងថា៖ «នេះជាការប្រកួត លើកទី៤ ក្នុងការដណ្តើមប្រាក់លានរបស់ សុជាតិ ហើយយើងធ្លាប់ឈ្នះបានប្រាក់រង្វាន់ម្តងដែរ ចំណែកលើកនេះ សង្ឃឹមឈ្នះ ៨០ ភាគរយ ពីព្រោះបេក្ខភាពប្រកួតលើកនេះ ប៉ះមួយណាក៏មិនមានបញ្ហាលំបាកធំនោះដែរ»។
ជាមួយគ្នានេះ លោក ឡុង វិបុល គ្រូបង្វឹក សោម វិឆ័យ ក៏មានរំពឹងខ្ពស់ថា សោម វិឆ័យ នឹងអាចបានឡើងដល់វគ្គផ្តាច់ព្រ័ត្រផងដែរ បើសិនជារូបគេចាប់ឆ្នោតមិនប៉ះ ឯម សុធី នៅវគ្គជម្រុះនោះ។
លោកបានប្រាប់ថា៖ «សោម វិឆ័យ ហាត់បានល្អ ប៉ុន្តែមិនហ៊ានរំពឹងច្រើនទេ ព្រោះវាធ្លាប់ចូលប្រកួតចំនួន ២ លើក គឺបានចាញ់ទាំង ២ លើក នៅកម្មវិធីមួយនេះ អ៊ីចឹងខ្ញុំគិតថា សង្ឃឹម ៥០ ភាគរយ ក៏ប៉ុន្តែបើវគ្គជម្រុះចាប់ឆ្នោតមិនជួប ឯម សុធី ទេ សង្ឃឹម ៩០ ភាគរយ»។
ចំណែកកីឡាករចូលចិត្តប្រើកែង រឿម វណ្ណៈ ត្រូវបានអ្នកថែទាំប្រាប់ថា ការហ្វឹកហាត់របស់គេបានគ្រប់គ្រាន់ ប៉ុន្តែសង្ឃឹមឈ្នះត្រឹម ៥០ ភាគរយទេ ដោយសារតែការប្រកួតដណ្តើមប្រាក់លាន ដែលមានការប្រកួតត្រឹម៣ទឹក ទាំងវគ្គជម្រុះ និងវគ្គផ្តាច់ព្រ័ត្រនេះ គឺមានការវ៉ៃប្តូរគ្នាខ្លាំង ហេតុនេះករណីភ្លាត់ អាចនឹងងាយកើតឡើង ដែលអាចបណ្តាលឱ្យសន្លប់បាន៕