.jpg)
ក្រុមអត្តពលិកបានថតជាមួយថ្នាក់ដឹកនាំ និងគ្រូបង្វឹកក្នុងពិធីបិទ។ ណន
ភ្នំពេញៈ សហព័ន្ធកីឡាវាយកូនឃ្លីតុកម្ពុជាបានប្តេជ្ញានឹងខំប្រឹងស្វែងរកដៃគូឧបត្ថម្ភរៀបចំឲ្យមានការប្រកួតជើងឯកយុវជនថ្នាក់ជាតិឲ្យបានញឹកញាប់ ដើម្បីបំផុសយុវជនឲ្យចូលលេងកីឡានេះឲ្យបានកាន់តែច្រើន ពិសេសស្វែងរកក្រុមយុវជនថ្នាលមានទេពកោសល្យ ត្រៀមឆ្ពោះទៅកាន់ការប្រកួតស៊ីហ្គេមឆ្នាំ ២០២៣ ដែលកម្ពុជាត្រូវធ្វើជាម្ចាស់ផ្ទះ។
ការផ្តើមឲ្យមានគំនិតបែបនេះគឺបន្ទាប់ពីសហព័ន្ធនេះបានទទួលការឧបត្ថម្ភពីក្រសួងមហាផ្ទៃដើម្បីរៀបចំឲ្យមានការប្រកួតកីឡាវាយកូនឃ្លីលើតុជើងឯកយុវជនថ្នាក់ជាតិលើកទី ១ ឆ្នាំ ២០១៩ នៅសាលដំបូលទូកកាលពីថ្ងៃសៅរ៍ ខណៈព្រឹត្តិការណ៍នេះមានកីឡាករជាយុវជនចូលរួមចំនួន ២២ នាក់ និងកីឡាការិនីជាយុវតីចំនួន ១២ នាក់។
លោក តេង សំណាង អគ្គលេខាធិការរងសហព័ន្ធកីឡាវាយកូនឃ្លីលើតុកម្ពុជា បាននិយាយថា៖ «ចាប់តាំងពីបែកឆ្នាំ ១៩៧៩ មកយើងមិនធ្លាប់រៀបចំឲ្យមានការប្រកួតជើងឯកយុវជនទាល់តែសោះគឺនេះជាលើកទី ១ ហើយដែលយើងបានរៀបចំ ហើយខ្ញុំពិតជាមានការភ្ញាក់ផ្អើលនៅពេលឃើញព្រឹត្តិការណ៍បែបនេះបានកើតមានឡើង»។
លោក សំណាង បានបន្ថែមថា៖ «តាមរយៈការប្រកួតនេះខ្ញុំមើលឃើញថា អត្តពលិកវ័យក្មេងរបស់យើងបានធ្វើការប្រកួតគ្នាដោយគ្មានការភ័យខ្លាច ឬតក់ស្លុតអ្វីទាំងអស់គឺពួកគេបានបង្ហាញការលេងដោយមានកម្លាំងចិត្ត បើទោះបីជាសមត្ថភាពរបស់ពួកគេនៅស្ទើរក៏ដោយ។ ហេតុនេះយើងនឹងព្យាយាមស្វែងរកការឧបត្ថម្ភដើម្បីរៀបចំការប្រកួតជើងឯកយុវជននេះឲ្យមានជាបន្តបន្ទាប់ ដើម្បីបំផុសឲ្យអត្តពលិកវ័យក្មេងចូលលេងលើប្រភេទកីឡាវាយកូនឃ្លីនេះឲ្យបានកាន់តែច្រើន»។
តាមរយៈការប្រកួតដោយប្រើពេលត្រឹម ១ ថ្ងៃនោះគឺមានការប្រកួតតែលើ ៣ វិញ្ញាសាទេ ហើយជាលទ្ធផលកីឡាករ កាង យូឃាង មកពីក្លិបសាលា AIS បានក្លាយជាម្ចាស់ជើងឯកលើការប្រកួតវិញ្ញាសាអាយុក្រោម ១៥ ឆ្នាំ ឯផ្នែកនារីលេខ ១ បានទៅកីឡាការិនី អុំ ណាសូហ្វី មកពីក្លិបសាលាណតឡាញ ហើយការប្រកួតឯកត្តជនអាយុក្រោម ១៨ ឆ្នាំកីឡាករ ឡាយ ភក្តី របស់ក្រសួងមហាផ្ទៃបានក្លាយជាម្ចាស់ជើងឯក។
ចំណែកលោក ជា ប៊ុនវិបុល ដែលទើបធ្វើជាអគ្គលេខាធិការសហព័ន្ធកីឡាវាយកូនឃ្លីលើតុកម្ពុជាបាននិយាយថា៖ «ពិតណាស់យើងត្រូវតែស្វះស្វែងរៀបចំឲ្យមានការប្រកួតជើងឯកយុវជននេះឲ្យបានញឹកញាប់ ព្រោះបើសិនជាគ្មានការប្រកួតបែបនេះយើងនឹងមានការលំបាកក្នុងការស្វែងរកយុវជនឆ្នើម សម្រាប់យកមកបណ្តុះបណ្តាលបន្ថែមសម្រាប់ត្រៀមធ្វើជាម្ចាស់ផ្ទះស៊ីហ្គេម ឆ្នាំ ២០២៣ ជាមិនខានឡើយ»។
ជាមួយគ្នានេះលោក ជា ប៊ុនហេង ដែលជាប្រធានអង្គភាពក្រសួងមហាផ្ទៃ និងជាអ្នកស្វះស្វែងរកថវិកាមករៀបចំឲ្យមានការប្រកួតកីឡាវាយកូនឃ្លីលើតុជើងឯកយុវជនថ្នាក់ជាតិជាលើកដំបូងនេះបានប្តេជ្ញាចិត្តបន្តជួយដល់សហព័ន្ធកីឡាវាយកូនឃ្លីលើតុកម្ពុជា ដើម្បីរៀបចំឲ្យមានការប្រកួតបែបនេះបន្តទៀត។
លោក ជា ប៊ុនហេង បានថ្លែងនៅក្នុងពិធីបិទការប្រកួតកាលពីថ្ងៃសៅរ៍ដែរថា៖ «តាមរយៈការប្រកួតនេះ យើងឃើញថាចំនួនអ្នកចូលរួមនៅមានតិច ពិសេសការប្រកួតអាយុក្រោម ១៨ ឆ្នាំដែលយើងមានតែយុវជន អត់មានយុវតី ចូលរួម អ៊ីចឹងហើយខ្ញុំសន្យាថានៅចុងឆ្នាំ ២០១៩ នេះអាចនៅមុនភ្ជុំបិណ្ឌ យើងនឹងរៀបចំការប្រកួតជើងឯកជននេះឲ្យបានធំជាងនេះ ដើម្បីធើការបំផុសទាំងក្រុមយុវជន និងយុវតីចូលរួមប្រកួតឲ្យបានច្រើន»៕
