ភ្នំពេញៈ ក្រុម Avatar FC, Reil Phnom Penh, Khmer United A និងក្រុម ISI Group United នៅតែអាចរក្សាកំណត់ត្រាបានល្អនៅក្នុងការប្រកួតពានពាក់កណ្តាលអាជីព Keller Williams Cambodia League 2019 (KW Cambodia League 2019) បន្ទាប់ពីក្រុមទាំងនេះរកបានជ័យជម្នះបន្ថែម ក្នុងការប្រកួតលើកទី ៣ កាលពីថ្ងៃអាទិត្យ។
ជាមួយនឹងជ័យជម្នះដែលបានកើតមានឡើងតាមរយៈការប្រកួតនៅកីឡដ្ឋានវេស្ទើន និងទីលាន KMH នោះក្រុមម្ចាស់ជើងឯករង ២ សម័យកាល Khmer United A រកបានគ្រាប់បាល់ច្រើនជាងគេដោយពួកគេបានលត់ក្រុមគ្រួសារកីឡាតាំងគោករហូតដល់ ៩-២។
យ៉ាងណាក៏ដោយការយកឈ្នះ ៩-២ ដើម្បីមានគ្រាប់បាល់ចំណេញ ១៣ គ្រាប់នេះវាបានត្រឹមជួយ Khmer United A ឲ្យឡើងទៅឈរនៅលេខ ៣ ដោយមាន ៩ ពិន្ទុពេញ តែមិនអាចជួយឲ្យពួកគេដណ្តើមយកតំបន់កំពូលតារាងពីក្រុមម្ចាស់ជើងឯក Avatar FC និងទីតាំងលេខ ២ របស់ក្រុម Riel Phnom Penh នោះទេ។
នៅក្នុងការប្រកួតកាលពីថ្ងៃអាទិត្យនោះ Avatar បានធ្វើឲ្យក្រុមបាសាក់ស្គាល់រសជាតិចាញ់ជាលើកដំបូងក្នុងរដូវកាលនេះតាមរយៈការយកឈ្នះ ២-០ ដើម្បីបន្តឈរនៅលេខ ១ និងមានគ្រាប់បាល់ចំណេញ ២៥ គ្រាប់។ រីឯក្រុម Riel Phnom Penh បានលត់ក្រុម Khmer United B ៥-០ ដើម្បីបន្តឈរនៅលេខ ២ ដដែលហើយ ISI Group United បានយកឈ្នះក្រុម Sniper ៣-១ និងឈរនៅលេខ ៤ មាន ៩ ពិន្ទុពេញដែរ។
ដោយឡែកអតីតក្រុមម្ចាស់ជើងឯកឆ្នាំ ២០១៧ Bayon Wonderers បានលត់ក្រុម Mambo PP ៤-០ ដើម្បីលប់ចោលភាពហ្មងសៅចំពោះការចាញ់ Khmer United A ៥-១ កាលពីសប្តាហ៍មុន ហើយជ័យជម្នះនេះជួយឲ្យ Bayon ឡើងមកឈរនៅលេខ ៥ វិញមាន ៦ ពិន្ទុស្មើជាមួយក្រុមបាសាក់ និងក្រុម Khmer United B។
ចំណែកក្រុម Khmer United U22 បានយកឈ្នះក្រុម Anvaya ៥-១ ដើម្បីមាន ៤ ពិន្ទុហើយក្រុម ATK បានយកឈ្នះក្រុម Home Sport ៣-០ ដើម្បីទទួលបាន ៣ ពិន្ទុជាលើកដំបូង ឯក្រុម Sen Sok Empire ក៏បានយកឈ្នះក្រុមទន្សោង ៣-១ ដើម្បីបាន ៣ ពិន្ទុជាលើកដំបូងផងដែរ៕