ក្រុងអ៊ីស្តង់ប៊ុល: អ្នកចាំទី Adrian បានជួយឲ្យក្លិប Liverpool ឈ្នះក្លិបតោខៀវ Chelsea ដើម្បីលើកពាន Super Cup កាលពីយប់ថ្ងៃព្រហស្បតិ៍នៅទីក្រុង Istanbul ប្រទេសតួកគីក្រោយពីប្រកួតស្មើគ្នា ២-២ ក្នុងរយៈពេលប្រកួត ១២០ នាទី។
ក្នុងការប្រកួត ៩០ នាទីពេញ ក្លិបទាំង ២ រកបានម្នាក់ ១ គ្រាប់ដែលក្រុម Chelsea នាំមុខ ១ គ្រាប់មុនដោយកីឡាករ Giroud នៅនាទីទី ៣៦ ហើយក្នុងនាទីទី ៤៨ ក្រុម Liverpool បានតាមស្មើវិញដោយកីឡាករ Mane ប៉ុន្តែក្នុងការប្រកួតក្នុងម៉ោងបន្ថែម ១៥ នាទី ២ ដងគឺក្រុម Liverpool បាននាំមុខ ១ គ្រាប់វិញម្ដងដោយកីឡាករ Mane ដដែលនៅក្នុងនាទីទី ៩៥ មុនពេលក្លិបតោខៀវរកបាន ១ គ្រាប់វិញដោយកីឡាករ Jorginho នៅនាទីទី ១០១ ធ្វើឲ្យស្មើគ្នា ២-២។
ការប្រកួតប៉េណាល់ទីបានចូលមកដល់ដែលក្រុម Liverpool បានស៊ុតចូលទាំង ៥ គ្រាប់ក្នុងនោះគ្រាប់ចុងក្រោយស៊ុតដោយខ្សែប្រយុទ្ធ Salah ខណៈក្រុមតោខៀវបានស៊ុតចូលតែ ៤ គ្រាប់ដោយសារគ្រាប់បាល់ចុងក្រោយរបស់កីឡាករ Abraham ត្រូវបានសង្គ្រោះយ៉ាងល្អដោយអ្នកចាំទី Adrian ធ្វើឲ្យក្រុមហង្សក្រហមឈ្នះក្រុម Chelsea ៥-៤។
អ្នកចាំទី Adrian ដែលទើបតែចុះកុងត្រាបានតែ ១០ ថ្ងៃនោះបានប្រាប់ BT Sport ថា៖ «សូមស្វាគមន៍ចំពោះក្រុម Liverpool! វាជាសប្ដាហ៍មួយអស្ចារ្យមែនទែន។ ខ្ញុំពិតជាសប្បាយចិត្តចំពោះក្រុមនេះ សប្បាយចិត្តដែលបានលេងនៅក្រុមនេះ និងសប្បាយចិត្តចំពោះអ្នកគាំទ្រ»។
នេះជាលើកទី ៤ សម្រាប់ក្រុម Liverpool ក្នុងការឈ្នះពាន Super Cup ក្នុងទីក្រុង Istanbul ដែលលើកចុងក្រោយបានឈ្នះនៅឆ្នាំ ២០០៥ គឺភ្លាមៗក្រោយពីបានឈ្នះពាន Champions League។
ឥឡូវនេះក្រុមហង្សក្រហមបានឈ្នះពាននៅតំបន់អឺរ៉ុបសរុបចំនួន ១៣ លើក ហើយការឈ្នះពាន Super Cup នេះគឺជាលើកចុងក្រោយនៃការចាប់ផ្ដើមរដូវកាលថ្មី ២០១៩-២០២០ នេះ។
លោក Jurgen Klopp គ្រូបង្វឹកក្លិប Liverpool បានទទួលស្គាល់ថា៖ «នេះជាការប្រកួតដ៏លំបាកបំផុតមួយសម្រាប់ក្រុមទាំង ២ ដែលជិតឈ្នះរៀងៗខ្លួន ប៉ុន្តែទីបំផុតក្រុមយើងជាអ្នកឈ្នះពាននេះ»។
គ្រូបង្វឹករូបនេះបានកោតសរសើរអ្នកចាំទីអាល្លឺម៉ង់រូបនេះថា «មានលក្ខណៈគ្រប់គ្រាន់» ដោយអះអាងថា៖ «គាត់បានជួយយើងច្រើន ហើយគាត់ពិតជាអាចមានមោទនភាពយ៉ាងខ្លាំងចំពោះអ្វីដែលគាត់បានធ្វើនៅយប់នេះ»។
លោក Frank Lampard គ្រូបង្វឹកថ្មីក្លិប Chelsea បានចាត់ទុកការប្រកួតនេះមានផលវិជ្ជមានចំពោះក្រុមរបស់លោក បើទោះជាចាញ់ក៏ដោយ។
លោក Lampard និយាយក្រោយការប្រកួតនេះថា៖ «ខ្ញុំគិតថា យើងត្រូវពង្រឹងសមត្ថភាពថែមទៀតព្រោះនៅមានរឿងខ្លះដែលខ្ញុំនៅតែចង់ឲ្យយើងបង្កើនសមត្ថភាពពាក់ព័ន្ធនឹងកម្រិតដែលយើងលេង ប៉ុន្តែខ្ញុំពិតជាពេញចិត្តនឹងទម្រង់លេងនេះមែនទែន»។
គ្រូបង្វឹករូបនេះបានបន្ថែមថា៖ «ការចាញ់ការប្រកួតនេះគឺជាការខកចិត្តប៉ុន្តែប្រសិនបើវាមានន័យថារដូវកាលរបស់ក្លិប Chelsea អាចជាអ្វីមួយដូចជារបៀបដែលយើងបានលេងនៅថ្ងៃនេះមែន នោះយើងនឹងយល់ព្រមទទួលយកវា»។
លោក Lampard បានបន្ថែមទៀតថា៖ «អ្នកដឹងទេថា ក្រុម Liverpool មានកន្លែងដែលពួកគេត្រូវទៅ ហើយខ្ញុំសូមគោរពទាំងស្រុងចំពោះលោក Jurgen Klopp»។
គ្រូបង្វឹកក្រុមតោខៀវបានបញ្ជាក់ទៀតថា៖ «ខ្ញុំជាគ្រូបង្វឹកថ្មីម្នាក់ដែលនៅទីនេះទើបតែបានរយៈពេល ៦ សប្ដាហ៍ប៉ុណ្ណោះ ប៉ុន្តែអ្វីដែលខ្ញុំបានឃើញនៅថ្ងៃនេះគឺជារឿងដែលខ្ញុំចង់ឲ្យកើតឡើងនៅក្នុងក្រុមនេះជាបន្តទៀត»៕ SN