ក្រុងឡុងដ៍៖ នាយកក្លិប Arsenal លោក Josh Kroenke បាននិយាយថា ក្រុម Arsenal បានសម្រេចចិត្តបណ្ដេញលោក Unai Emery រយៈពេលប៉ុន្មានសប្ដាហ៍មកនេះ គឺដោយសារពួកគេមានអារម្មណ៍ថា វាចាំបាច់ណាស់ប្រសិនបើពួកគេចង់ស្រោចស្រង់រដូវកាលរបស់ពួកគេនៅពេលនេះ។
ក្រោយមានការរំពឹងទុកបែបនេះជាច្រើនសប្ដាហ៍ហើយ ក្លិប Arsenal ទីបំផុតបានដកភារកិច្ចរបស់លោក Emery កាលពីថ្ងៃសុក្រ ក្រោយពីរងបរាជ័យក្នុងទឹកដីខ្លួន ២-១ ចំពោះក្រុម Eintracht Frankfurt នៅក្នុងក្របខ័ណ្ឌ Europa League។
នោះ គឺជាការប្រកួតលើកទី ៧ ក្នុងការប្រកួតទាំងអស់ដែលក្រុមកាំភ្លើងធំមិនដែលបានឈ្នះសោះរហូតធ្វើឲ្យពួកគេធ្លាក់ទៅឈរនៅលេខ ៩ ក្នុងក្របខ័ណ្ឌ Premier League ក្រោយពីមានការប្រកួតកាលពីថ្ងៃសៅរ៍។
លោក Freddie Ljungberg ត្រូវបានតែងតាំងជាគ្រូបង្វឹកបណ្ដោះអាសន្នរហូតដល់ក្រុម Arsenal បានធ្វើការតែងតាំងពេញសិទ្ធិ។
អ្នកដែលទទួលតំណែងនេះមិនគួររំពឹងថា មហិច្ឆតារបស់ក្លិបនេះសម្រាប់រដូវកាលនេះនឹងមានការលំបាកច្រើនដោយសារតែមានការចាប់ផ្តើមដ៏លំបាករបស់ពួកគេនោះទេ ខណៈលោក Kroenke ជាកូនប្រុសរបស់ម្ចាស់ក្លិបលោក Stan នៅតែមានអារម្មណ៍ថា ពួកគេនៅតែអាចសម្រេចគោលដៅរបស់ខ្លួនបាន។
និយាយក្នុងគេហទំព័រក្លិប Arsenal ក្រោយពីចូលរួមក្នុងការហ្វឹកហាត់ហើយ លោក Kroenke បាននិយាយថា៖ «ដូចក្រុមអ្នកគាំទ្រយើងក្នុងពិភពលោកបានដឹងហើយថា គឺយើងមានការព្រួយបារម្ភពីទម្រង់លេងរបស់យើងថ្មីៗនេះ»។
នាយកក្លិបរូបនេះបានបន្ថែមថា៖ «យើងចង់គាំទ្រលោក Unai និងបុគ្គលិករបស់គាត់រហូតដល់យើងបានសម្រេចចិត្តថា វាបានដល់ពេលដែលត្រូវធ្វើការផ្លាស់ប្ដូរ ហើយទីបំផុតយើងបានសម្រេចចិត្តបែបនោះក្នុងរយៈពេលប៉ុន្មានសប្ដាហ៍មកនេះ ដោយមានការប្រជុំជាមួយថ្នាក់ដឹកនាំក្លិបនេះផងដែរ»។
លោក Kroenke បានបន្ថែមទៀតថា៖ «ជាការពិតលោក Unai គឺជាមនុស្សល្អម្នាក់ដែលយើងមានការគោរពបំផុត។ ក្រឹត្យក្រមការងាររបស់គាត់ និងបុគ្គលិករបស់គាត់ គឺអស្ចារ្យខ្លាំងណាស់»។
លោក Kroenke បានបន្តថា៖ «ទីបំផុតយើងបានចាប់ផ្ដើមបាត់បង់គោលដៅមួយចំនួនដែលយើងបានកំណត់។ យើងនៅតែមានអារម្មណ៍ថា យើងអាចសម្រេចបានគោលដៅនោះ នៅរដូវកាលនេះ ដូច្នេះហើយយើងបានសម្រេចចិត្តធ្វើការផ្លាស់ប្ដូរពេលនេះតែម្ដង»។
ក្រុម Arsenal បានចាប់ផ្ដើមរួចមកហើយក្នុងការវាយតម្លៃបេក្ខជនសម្រាប់តំណែងនេះ ប៉ុន្តែលោក Kroenke បានទទូចថា ពួកគេនឹងមិនធ្វើការសម្រេចចិត្តភ្លាមៗនោះទេ ដោយទុកឲ្យលោក Ljungberg ជាអ្នកធ្វើការសម្រេចចិត្តក្នុងការជ្រើសរើសតំណែងនេះ៕ AFP/SN