.jpg)
ខ្សែបម្រើប្រយុទ្ធរបស់ក្រុមអធិរាជស Gareth Bale។ រូបថត AFP
ក្រុងម៉ា្រឌីដ៖ ខ្សែបម្រើប្រយុទ្ធរបស់ក្រុមអធិរាជស Real Madrid គឺ Gareth Bale បាននិយាយថា ខ្លួននៅតែវង្វេងវង្វាន់ ដែលមានចំណង់ចំណូលចិត្តលេងកីឡាវាយកូនគោល ត្រូវបានគេស្ដីបន្ទោសដូចជាជនបង្កបញ្ហាម្នាក់នៅប្រទេសអេស្ប៉ាញ ហើយបានដាក់ជាសំណួរថា ហេតុអ្វីអ្នកកីឡាល្បីៗដទៃ មិនត្រូវបានរិះគន់ពីការលេងកីឡានេះដែរ។
បើទោះជាឈ្នះពានក្របខ័ណ្ឌអឺរ៉ុប Champions League ដល់ទៅ ៤ ដង ជាមួយក្រុម Real និងបានស៊ុតបញ្ចូលទីគ្រាប់បាល់សំខាន់ៗ នៅវគ្គផ្ដាច់ព្រ័ត្រ ៣ លើកក៏ដោយ ក៏កីឡាករអន្តរជាតិវេលស៍រូបនេះ នៅតែមិនទទួលបានការពេញចិត្តដែរ ដោយសារគ្រប់គ្នាសម្គាល់ឃើញនូវការខ្វះខាតនៃការប្ដូរផ្ដាច់ ក៏ដូចជាកំណត់ត្រារបួសដ៏អាក្រក់ ដែលប្រព័ន្ធផ្សព្វផ្សាយអេស្ប៉ាញ រិះគន់ជាញឹកញាប់ថា មកពីទៅវាយកូនគោលពេលទំនេរ។
កាលពីឆ្នាំមុន កីឡាករ Bale ដែលលេងតំណែងស្លាបរូបនេះ ធ្វើការអបអរពេលក្រុមវេលស៍ បានឡើងទៅព្រឹត្តិការណ៍ Euro 2020 ដោយការផូស្តរូប នៅមុខបដាមួយ ដែលសរសេរថា៖ «វេលស៍ កីឡាគោល ម៉ា្រឌីដ តាមលំដាប់លំដោយ» ដែល នាំឲ្យមានការរិះគន់ទាំងកំហឹង ព្រមទាំងបណ្ដាលឲ្យមានការហ៊ោបែបចំអកពីសំណាក់អ្នកគាំទ្ររបស់ក្រុមអធិរាជស ពេលរូបគេត្រឡប់មកលេងការប្រកួតដំបូងឲ្យក្លិប។
ពាក់ព័ន្ធនឹងរឿងនេះ កីឡាករ Bale បាននិយាយក្នុងកម្មវិធី Eric Anders Lang Show ថា៖ «មនុស្សជាច្រើន មានបញ្ហាជាមួយខ្ញុំ ដែលចូលចិត្តលេងវាយកូនគោល។ ខ្ញុំមិនដឹងពីហេតុផលអ្វីឲ្យពិតប្រាកដរបស់ពួកគេ ព្រោះខ្ញុំបាននិយាយជាមួយក្រុមគ្រូពេទ្យ ហើយគ្រប់គ្នាគ្មានបញ្ហាជាមួយនឹងការលេងនេះទេ។ តែផ្ទុយទៅវិញ ប្រព័ន្ធផ្សព្វផ្សាយមានការយល់ឃើញថា វាមិនប្រសើរសម្រាប់ខ្ញុំ ដោយពួកគេប្រាប់ថា ខ្ញុំគួរតែសម្រាក ព្រោះវាអាចធ្វើឲ្យខ្ញុំមានរបួស»៕ AFP/VN
