.jpg)
Bale (ឆ្វេងទី២) តែតបញ្ចូលទីឱ្យ Spurs ឈ្នះ Brighton ២-១។ AFP
ឡុងដ៍៖ លោក Jose Mourinho កោតសរសើរចំពោះភាពអត់ធន់របស់កីឡាករ Gareth Bale ដែលរង់ចាំឱកាសបញ្ចេញសមត្ថភាពរបស់ខ្លួន ក្រោយងើបចេញពីកៅអីកីឡាករបម្រុងដើរចូលទីលាន ហើយស៊ុតបញ្ចូលទីឱ្យក្រុមឈ្នះ ២-១ លើក្រុម Brighton ដែលនាំឱ្យក្រុម Tottenham Hotspur (Spurs) រំកិលឡើងទៅលេខ ២ បណ្ដោះអាសន្ន ត្រឹមថ្ងៃចន្ទ ក្នុងតារាងក្របខ័ណ្ឌ Premier League អង់គ្លេស។
កីឡាករសញ្ជាតិវេលស៍ Bale មិនទាន់បានលេងក្នុងចំណោមកីឡាករទាំង ១១ ដំបូងនៅឡើយទេ សម្រាប់ការត្រឡប់មកជាលើកទី២ ជាមួយ Spurs ក្លិបដែលខ្លួន បានចាកចេញក្នុងតម្លៃជាកំណត់ត្រាពិភពលោក ដើម្បីទៅចូលរួមជាមួយ Real Madrid ក្នុងឆ្នាំ ២០១៣។
តែកីឡាករវ័យ ៣១ ឆ្នាំ បានបង្ហាញពីភាពឥតប្រណីរបស់ខ្លួនចំពោះការទម្លុះសំណាញ់ទីជាមួយនឹងការតែតពេញទំហឹងនៅមុនការប្រកួតចប់ ១៧ នាទី ហើយធានាថា កូនក្រុមរបស់លោក Mourinho មិនមានបញ្ហានៅតំបន់ប្រយុទ្ធ សម្រាប់ប្រកួតនៅកីឡដ្ឋាន Tottenham Hotspur នោះឡើយ។
លោក Mourinho និយាយថា៖ «Gareth Bale នឹងនរណាស់ និងមានភាពចាស់ទុំគ្រប់គ្រាន់។ គេដឹងថា កាយសម្បទារបស់គេ រឹងមាំជាងអ្នកណាទាំងអស់។ យើងដឹងពីកន្លែង ដែលយើងចង់ទៅ ហើយគេរួមដំណើរជាមួយយើង»។
គ្រាប់បាល់របស់ Bale នៅនាទីទី៧៣ បានមកបន្ថយក្ដីរំភើបរបស់ Brighton ពេលតាមស្មើបានវិញ ដែលស៊ុតបញ្ចូលទីដោយ Tariq Lamptey នៅនាទីទី៥៦ ក្រោយត្រូវក្រុមម្ចាស់ផ្ទះបើកការនាំមុខតាំងពីនាទីទី ១៣ ដែលបានមកពីការស៊ុតបាល់ប៉េណាល់ទីរបស់កីឡាករ Harry Kane។
ការប្រកួតនេះ ក៏បង្កឱ្យមានភាពចម្រូងចម្រាសបន្តិចដែរ ដោយលោក Mourinho យល់ថា កីឡាកររបស់ក្រុមគូប្រជែង Solly March បានប្រព្រឹត្តកំហុសលើ Pierre-Emile Hojbjerg ច្បាស់ណាស់ មុននឹងមានបាល់បញ្ជូនទៅដល់ជើងរបស់ Lamptey ដែលស៊ុតឱ្យក្រុមតាមស្មើបាននោះ។
បុរសសញ្ជាតិព័រទុយហ្គាល់ លើកឡើងថា៖ «ទំនងជា លោកអាជ្ញាកណ្ដាលគួរតែទៅធ្វើសន្និសីទសារព័ត៌មាន ហើយធ្វើការបកស្រាយ។ គាត់មានពេលទៅមើលម៉ូនីទ័រ ដើម្បីឱ្យគាត់អាចពន្យល់ថា ហេតុអ្វីបានព្រមអនុញ្ញាតគ្រាប់បាល់នោះ»។
Bale ក្រោយការប្រកួតបញ្ចប់ទៅនិយាយថា៖ «មានអារម្មណ៍រំភើបណាស់។ ខ្ញុំគ្រាន់តែចង់ប្រឹងឱ្យអស់លទ្ធភាព ដើម្បីនាំភាពជោគជ័យឱ្យក្លិប។ គ្រប់គ្នានិយាយពីការលេងផ្ទាល់ខ្លួន តែខ្ញុំនិយាយជានិច្ចថា ខ្ញុំជាកីឡាកររបស់ក្រុម។ រឿងសំខាន់បំផុត គឺសាមគ្គីគ្នាក្នុងក្រុម»។
ក្រោយបញ្ចប់ប្រកួតសប្ដាហ៍ទី៧ នេះ ក្រុម Spurs ត្រូវបានឈរទីកំពូលតារាងបាត់ទៅហើយ បើកុំតែភ្លាត់បាត់អស់ ៤ ពិន្ទុ ដោយសារស្មើជាមួយក្រុម Newcastle និង West Ham នៅផ្ទះខ្លួនឯង ទាំងដែលប្រកួតទាំងនោះ ខ្លួនជាអ្នកមានគ្រាប់បាល់នាំមុខរហូត។
ពេលនេះ ពួកគេ តាមពីក្រោយក្រុមជើងឯកចាស់ Liverpool ដែលនៅលេខ ១ ជាមួយនឹង ១៦ ពិន្ទុ តែ ២ ពិន្ទុប៉ុណ្ណោះ តែទាំងលោក Mourinho និង Bale សុទ្ធតែនិយាយដូចគ្នាថា មិនទាន់គិតដល់ការប្រជែងពាននោះឡើយ។
លោក Mourinho បានបន្ថែមថា៖ «ឆ្នាំ ២០០៤ ពេលខ្ញុំមកកាន់អង់គ្លេស ប្រកួតខ្លះ គឺក្រុមខ្លាំងៗ ច្រើនបាន ៣ ពិន្ទុ។ តែឥឡូវនេះ មិនអ៊ីចឹងទេ បានន័យថា ក្រុមទាំងអស់ មានពិន្ទុប្រដេញគ្នា។ បើភ្លាត់តែបាត់ ២ ពិន្ទុ នោះអាចធ្លាក់ទៅលេខ ៧ ៨ ឬក៏លេខ ៩៕ AFP/VN
