.jpg)
កីឡាករ Neymar កាលនៅលេងអោយក្លិបអ្នកមានបុណ្យ។ រូបថត សហការី
ក្រុងម៉ា្រឌីដ៖ ក្រុម Barcelona (Barca) នឹងប្ដឹងកីឡាករ Neymar ពាក់ព័ន្ធនឹងទឹកប្រាក់ ១០,២ លានអឺរ៉ូ ($១២ លាន) ដែលពួកគេជឿថា បានចំណាយលើសចំនួនឱ្យទៅខ្សែប្រយុទ្ធអន្តរជាតិប្រេស៊ីលកាលនៅជាសមាជិករបស់ក្លិប។ នេះបើតាមសេចក្ដីរាយការណ៍របស់កាសែត El Mundo កាលពីថ្ងៃពុធ។
Neymar ទទួលបានរយៈកាលជោគជ័យមួយជាមួយ Barca ចន្លោះឆ្នាំ ២០១៣ ដល់ ២០១៧ មុនចាកចេញទៅក្រុមនៅបារាំង Paris Saint-Germain (PSG) ក្នុងតម្លៃខ្លួន ២២២ លានអឺរ៉ូ ($២៦១ លាន) ដែលជាតម្លៃកំណត់ត្រារបស់ពិភពលោក។
តែបើយោងតាមកាសែតអេស្ប៉ាញ El Mundo ការពិនិត្យឡើងវិញរបស់ការិយាល័យពន្ធដារអេស្ប៉ាញបានបង្ហាញថា Barca មិនបានធ្វើការកាត់ពន្ធឱ្យបានត្រឹមត្រូវឡើយ ពេលបង់ពន្ធឲ្យកីឡាករ Neymar។ នេះយោងតាមការពិនិត្យឡើងវិញ ចំពោះក្រុមអ្នកមានបុណ្យ ដែលបានអនុវត្តរហូតដល់ឆ្នាំ ២០១៥។
សេចក្ដីរាយការណ៍នោះបន្តថា ការិយាល័យពន្ធដារនៅប្រទេសអេស្ប៉ាញ បានធ្វើការប៉ាន់ស្មានថា Neymar ទទួលបានផលចំណេញពីការធ្វើមានធ្វើបានដែលមិនត្រឹមត្រូវ ហើយប្រភពមួយពីក្លិប Barca អះអាងប្រាប់ AFP ថា ក្លិបឥឡូវនេះ នឹងទាមទារមកវិញនូវចំនួនទឹកប្រាក់នោះ។
Neymar មិនបានបង់ពន្ធឱ្យអាជ្ញាធរអេស្ប៉ាញច្រើនជាងអ្នកដទៃ ដោយជាប់បំណុលពន្ធ ៣៤,៦ លានអឺរ៉ូ ($៤០ លាន)។ នេះបើយោងតាមឯកសារផ្លូវការ ដែលចេញផ្សាយកាលពីខែកញ្ញា។
ជាមួយគ្នានេះ ក៏មានសេចក្ដីរាយការណ៍ផងដែរថា អាជ្ញាធរសារពើពន្ធអេស្ប៉ាញ កំពុងធ្វើការស៊ើបអង្កេតចំពោះការផ្ទេរចំនួន ២ លើករបស់ Neymar គឺម្ដងពីក្លិប Santos របស់ប្រេស៊ីលមកទឹកដី Camp Nou កាលពីឆ្នាំ ២០១៣ និងម្ដងទៀតការផ្លាស់ពីទឹកដីអេស្ប៉ាញទៅបារាំង ដើម្បីចូលរួមជាមួយ PSG នៅ ៤ ឆ្នាំក្រោយមក។
នៅចន្លោះការផ្ទេរហ្នឹង Neymar ក៏បានបន្តកុងត្រាថ្មីជាមួយក្លិបនៅតំបន់កាតាឡាន់ដែរ ក្នុងឆ្នាំ ២០១៦ ដោយមានទាំងប្រាក់រង្វាន់ភក្ដីភាពចំនួន ២៦ លានអឺរ៉ូ ($៣០ លាន) ដែលក្រុម Barca បដិសេធមិនចំណាយឱ្យ បន្ទាប់ពីរូបគេចាកចេញទៅទឹកដី Parc des Princes៕ AFP/VN
