ក្រុងសេវីលៈ ក្រុម Barcelona ចង់លើកពានអេស្ប៉ាញ Copa del Rey យ៉ាងខ្លាំងដើម្បីបន្ធូរការឈឺចាប់ក្រោយមិនបានលើកពាន Champioans League រដូវកាលនេះ ប៉ុន្តែគោលបំណងរបស់ក្រុមនេះត្រូវបរាជ័យក្រោយពីចាញ់ក្រុម Valencia ២-១ កាលពីចុងសប្ដាហ៍កន្លងមកនេះ។
គោលបំណងរបស់ក្រុម Barcelona ដើម្បីលើកពាន Copa del Rey ឲ្យបាន ៥ លើកជាប់ៗគ្នានេះគឺមិនបានសម្រេចទេ ក្រោយពីកីឡាករឆ្នើម Lionel Messi របស់ក្រុម Barcelona រកបានតែ ១ គ្រាប់គត់សម្រាប់ក្រុមនេះធ្វើឲ្យចាញ់ក្រុម Valencia ដែលកំពុងតែចង់បានពាននេះផងដែរ។
ជុំវិញលទ្ធផលនៃការប្រកួតនេះគឺក្រុម Valencia បាននាំមុខក្រុម Barcelona ២ គ្រាប់ដោយការបញ្ចូលទីរបស់កីឡាករ Kevin Gameiro នៅនាទីទី ២១ និងកីឡាករ Rodrigo នៅនាទីទី ៣៣ ប៉ុន្តែនៅក្នុងតង់ទី ២ ក្រុម Barcelona បានខិតខំវាយសម្រុកយ៉ាងខ្លាំងរហូតរកបាន ១ គ្រាប់វិញដោយកីឡាករឆ្នើម Messi នៅនាទីទី ៧៣ ប៉ុន្តែគ្មានឱកាសរកបាន ១ គ្រាប់ទៀតដើម្បីតាមស្មើគូប្រកួតខ្លួននោះឡើយ។
គ្រូបង្រឹកក្លិប Valencia លោក Marcelino ដែលអាចត្រូវបានបណ្ដេញចេញនៅពេលក្រុមរបស់គាត់ជិតធ្លាក់ដល់បាតតារាងកាលពីខែមករានោះបានមានអារម្មណ៍ល្អប្រសើរឡើងវិញក្រោយពីបានយកឈ្នះក្រុម Barcelona ដើម្បីលើកពាន Copa del Rey នេះ។
លោក Marcelino បាននិយាយថា៖ «យើងតែងតែមានជំនឿចិត្តជានិច្ច ហើយការយកឈ្នះក្រុម Barcelona ដើម្បីលើកពាននេះគឺពិសេសខ្លាំងណាស់ព្រោះយើងសមនឹងទទួលបានពាននេះ»។
ចំណែកកីឡាករ Messi វិញបាននិយាយពីថ្ងៃសុក្រថា ក្រុមរបស់គាត់នៅមានការឈឺចាប់នៅឡើយក្រោយពីចាញ់ក្រុម Liverpool ៤-០ យ៉ាងចាស់ដៃក្នុងការប្រកួតជើងទី ២ នៃវគ្គ ៤ ក្រុមចុងក្រោយក្នុងក្របខ័ណ្ឌ Champions League នៅក្នុងខែឧសភានេះ។
កីឡាករ Messi ក៏បានគាំទ្រគ្រូបង្វឹកក្រុម Barcelona លោក Ernesto Valverde ផងដែរ ប៉ុន្តែគេនៅតែរង់ចាំមើលថា តើនៅមានការគាំទ្រគ្រូបង្វឹកនេះដដែលឬយ៉ាងណាក្រោយពីទទួលបរាជ័យចំនួន ២ លើកធ្វើឲ្យប៉ះពាល់ដល់ភាពខ្លាំងរបស់ខ្លួនដែលបានលើកពាន La Liga មុនពេលកំណត់នោះ។
លោក Valverde បាននិយាយថា៖ «ខ្ញុំមិនអីទេ ហើយខ្ញុំដឹងថាការបរាជ័យសម្រាប់ក្លិបនេះគឺមានការឈឺចាប់បន្តិចហើយ»។
លោក Josep Maria Bartomeu ប្រធានក្លិប Barc បាននិយាយថា៖ «ខ្ញុំគិតថា វាមិនមែនជាកំហុសរបស់គ្រូបង្វឹកនោះទេ ហើយខ្ញុំតែងគិតថាលោក Ernesto នឹងត្រូវបានបន្តកុងត្រាសម្រាប់រដូវកាលក្រោយទៀត»។
កីឡាករ Gerard Pique របស់ក្លិប Barcelona បាននិយាយថា៖ «ខ្ញុំក៏គិតដែរថា គាត់បានធ្វើការងារល្អរួចទៅហើយ ប៉ុន្តែវាមិនអាស្រ័យលើពួកយើងនោះទេ»។
ក្រុម Barcelona បានលើកពាននេះជាលើកដំបូងតាំងពីឆ្នាំ ២០០៨ ជាពេលមួយដែលក្រុមនេះទទួលបានជ័យជម្នះ ១៥ ប្រកួតជាប់ៗគ្នា៕ SN