ក្រុងម៉ាឌ្រីដ: ខ្សែប្រយុទ្ធ Lionel Messi និង Luis Suarez បានជួយឲ្យក្រុម Barcelona បោះជំហានកាន់តែកៀកឆ្ពោះទៅកាន់ការឈ្នះពានក្នុងស្រុក២នៅរដូវកាលនេះ ខណៈដែលពួកគេបានលត់ក្រុម Sevilla យ៉ាងចាស់ដៃក្នុងលទ្ធផល ៥-០ កាលពីថ្ងៃសៅរ៍ ដើម្បីឈ្នះពាន Copa del Rey។
Messi បានស៊ុតបាល់បញ្ចូលទី១ ហើយ Suarez រកបាន២គ្រាប់ នៅមុនពេលបញ្ចប់ការប្រកួតតង់ទី១នាកីឡដ្ឋាន Wanda Metropolitano ខណៈដែលខ្សែបម្រើបម្រុង Andres Iniesta និង Philippe Coutinho បានបន្ថែម២គ្រាប់ទៀតដើម្បីបំពេញការបរាជ័យដ៏ធំសម្រាប់ក្រុម Sevilla តែម្តង។
ការបង្ហាញពីទម្រង់លេងដ៏ល្អឥតខ្ចោះរបស់ក្រុម Barcelona បានជួយឲ្យពួកគេឈ្នះពាន Copa del Rey ជាលើកទី៣០របស់ពួកគេ និងជាលើកទី៤ជាប់ៗគ្នា ក្រោយពីបានឈានទៅវគ្គផ្តាច់ព្រ័ត្ររាល់រយៈពេល៥ឆ្នាំចុងក្រោយនេះ។
ប៉ុន្តែ ទោះបីជាបានបង្ហាញពីទម្រង់លេងដ៏ល្អ និងរកបានគ្រាប់បាល់ដល់ទៅ៥គ្រាប់ក៏ដោយ ការអបអរយ៉ាងពិតប្រាកដនឹងត្រូវពន្យារពេលរហូតដល់ថ្ងៃអាទិត្យសប្តាហ៍ក្រោយ ដែលនៅពេលនោះការដណ្តើមបានជ័យជម្នះលើក្រុម Deportivo La Coruna នឹងធ្វើឲ្យក្រុមរបស់លោក Ernesto Valverde លើកពានក្របខ័ណ្ឌ La Liga។
ប៉ុន្តែ ការលើកពានក្នុងស្រុកទាំង២ ក៏ដូចជាការបន្តកំណត់ត្រាមិនស្គាល់ចាញ់សោះក្នុងក្របខ័ណ្ឌ La Liga ក៏ដោយ ប្រហែលជាមិនអាចលុបចោលការខកចិត្តផ្សេងៗពីការធ្លាក់ចេញរបស់ក្រុម Barca ក្នុងក្របខ័ណ្ឌ Champions League ក្រោមស្នាដៃក្រុម Roma ឡើយ៕ IS