.jpg)
កីឡាករ Kimmich (លេខ ៣២) របស់ Bayern កំពុងអបអរជាមួយមិត្តរួមក្រុម ក្រោយរកគ្រាប់បាល់បាន ។ AFP
ក្រុងប៊ែរឡាំង៖ ការរកបាន ១ គ្រាប់ នៅចុងម៉ោងនៃតង់ទី១ របស់កីឡាករ Joshua Kimmich បានក្លាយជាគ្រាប់បាល់យ៉ាងសំខាន់ក្នុងការជួយឲ្យក្រុម Bayern Munich រំកិលទៅមុខ ១ ជំហានទៀតយ៉ាងធំ កៀកនឹងការឈ្នះពានរង្វាន់ក្របខ័ណ្ឌ Bundesliga អាល្លឺម៉ង់ ៨ រដូវកាលជាប់ៗគ្នា ព្រោះនេះជាគ្រាប់បាល់ជ័យជម្នះលើក្រុមម្ចាស់ផ្ទះ Borussia Dortmund តែម្ដងក្នុងការប្រកួតយ៉ាងស្វិតស្វាញ កាលពីយប់ថ្ងៃអង្គារ។
ទោះឈ្នះទាំងប្រផិតប្រផើយត្រឹមលទ្ធផល ១-០ ក៏ពិតមែន តែក៏ជាការដណ្ដើមបាន ៣ ពិន្ទុយ៉ាងសំខាន់សម្រាប់ Bayern ក្នុងការប្រកួតដែលធ្វើឡើង ដោយឥតមានអ្នកគាំទ្រចូលរួមទស្សនានាកីឡដ្ឋាន Signal Iduna Park ពីក្រុម Dortmund ព្រោះជាគូប្រជែងតែមួយគត់ ដែលមានសិទ្ធិខ្ពស់ជាងគេ ក្នុងការដណ្ដើមពានលីកកំពូលនារដូវកាលនេះ ដោយពេលនេះ មានគម្លាតនាំមុខដល់ទៅ ៧ ពិន្ទុ ខណៈការប្រកួតនៅសល់ ៦ សប្ដាហ៍ទៀតនឹងបញ្ចប់ជាស្ថាពរ។
ក្រោយមានលទ្ធភាពអាចបំប៉ោងសំណាញ់ទី ជួយក្រុមឲ្យឈ្នះនេះ កីឡាករ Kimmich ដែលអាចលេងទាំងតំណែងខ្សែបម្រើ និងការពារ បាននិយាយថា៖ «វាពិតជាគ្រាប់បាល់ដ៏សំខាន់បំផុត។ ខ្ញុំសម្លឹងមើលជុំវិញខ្លួន ដើម្បីឲ្យឃើញថា តើគ្រប់គ្នាដឹងទេថា គ្រាប់បាល់ហ្នឹងសំខាន់យ៉ាងដូចម្ដេចសម្រាប់ក្រុម»។
ដូចគ្នានេះដែរ ប្រធានក្រុម គឺអ្នកចាំទី Manuel Neuer ក៏បាននិយាយច្រំដែលនូវពាក្យសម្ដីរបស់កីឡាកររួមក្រុម និងរួមជាតិអាល្លឺម៉ង់ ដោយប្រាប់ថា៖ «ពិតមែន វាពិតជាសញ្ញាសំខាន់ខ្លាំងណាស់»។
ក្រុម Bayern នៅតែបន្តកំណត់ត្រាបានយ៉ាងអស្ចារ្យ ក្នុងការលេងទល់នឹងក្រុមលេខ ២ Dortmund រដូវកាលនេះ ដោយកាលពីជួបគ្នា នៅទឹកដីខ្លួនឯងក្នុងក្រុងមុយនិច កាលពីខែវិច្ឆិកា បានបំបាក់ក្រុមគូប្រជែងយ៉ាងចាស់ដៃ ៤-០។
ដោយឡែកគ្រូបង្វឹករបស់ក្រុម Bayern លោក Hansi Flick ទោះជាទទួលស្គាល់ថា ជ័យជម្នះនេះ ជាជំហានដ៏ធំ ឆ្ពោះទៅកាន់ការឈ្នះពាន Bundesliga ក៏ពិតមែន តែលោកប្រាប់ថា ការប្រជែងគ្នា នៅមិនទាន់ចប់នៅឡើយទេ ដោយបុរសវ័យ ៥៥ ឆ្នាំ ថ្លែងដូច្នេះថា៖ «មែន វាជាជ័យជម្នះដ៏សំខាន់។ យើងធ្វើដំណើរទៅមុខមួយជំហានទៀតយ៉ាងធំ តែសួរថា យើងជាជើងឯកមែនទេ? ខ្ញុំគិតថា យើងមិនអាចនិយាយអ៊ីចឹងបានទេ គ្រប់យ៉ាងមិនទាន់ចប់នោះទេ»។
លោក Flick បានបន្តទៀតថា៖ «យើងចាប់ផ្ដើមមានអារម្មណ៍ប្រសើរបន្តិច ពេលបាននាំមុខ ៧ ពិន្ទុ។ មុនសម្រាករដូវរងារ យើងតាមពីក្រោយក្រុមគូប្រជែង ៤ ពិន្ទុ ដូច្នេះយើងបានព្យាយាមរៀបចំឲ្យមានការលេងបាល់ទាត់ដ៏ជោគជ័យ ក៏ដូចជា បាល់ទាត់ដ៏ស្រស់បំព្រងមួយនៅឆ្នាំនេះ។
ក្រោយពីមិនមានលទ្ធភាពជួយក្រុមទទួលបានលទ្ធផលល្អ សម្រាប់ការប្រកួតនេះ ខ្សែការពារ Mats Hummels ជាប្រធានក្រុម Dortmund បាននិយាយដោយអារម្មណ៍មួហ្មងថា៖ «ឥឡូវនេះ មានតែក្រុម Bayern ប៉ុណ្ណោះ ដែលសម្រេចថា អ្វីនឹងកើតឡើង។ ពេលខ្លះ ការប្រកួត ត្រូវបានកាត់ក្ដីដោយឱកាសល្អៗ តែថ្ងៃនេះ គ្មានអីត្រូវនិយាយទេ»។
មិនត្រឹមតែបរាជ័យ ដែលធ្វើឲ្យបាត់ឱកាសតាមប្រជែងយកពានប៉ុណ្ណោះទេ ប៉ុន្តែ Dortmund ថែមទាំងបាត់បង់ខ្សែប្រយុទ្ធឆ្នើមរបស់ក្រុម Erling Braut Haaland ផងដែរ ក្រោយពីមានរបួស នៅវគ្គទី ២ បន្ទាប់ពីត្រូវបានខ្សែការពារ Jerome Boateng របស់ Bayern Munich ប្រជែងយកបាល់ ព្រោះក្រោយហេតុការណ៍នោះ គេឃើញកីឡាករអន្តរជាតិន័រវែសរូបនេះ ដើរខ្ទើតៗចេញពីទីលាន ខណៈការប្រកួតនៅសល់ ២០ នាទីចុងក្រោយ៕ AFP/VN
