ក្រុងប៉ារីស: មិនដល់ ៦ សប្តាហ៍ទេ ដែលក្រុម Bayern Munich បានឈ្នះការប្រកួតវគ្គផ្តាច់ព្រ័ត្រ រដូវកាលមុន អំឡុងការប្រកួតបិទទ្វារ ឥឡូវការចាប់ឆ្នោតសម្រាប់វគ្គចែកពូលនៃក្របខ័ណ្ឌ Champions League នាពេលបន្ទាប់ ក៏នឹងធ្វើឡើង នៅថ្ងៃព្រហស្បតិ៍នេះ ក្រោមការគំរាមកំហែងពីការឆ្លងរាលដាលនៃវីរុសកូរ៉ូណាជាថ្មីម្ដងទៀត ចំពោះកម្មវិធីប្រកួតនេះ។
ក្រុម Bayern បានគ្រងតំណែងជើងឯកអឺរ៉ុបជាលើកទី៦ បន្ទាប់ពីបានយកឈ្នះក្រុម Paris Saint-Germain នៅឯកីឡដ្ឋានទទេស្អាត Estadio da Luz នាក្រុងលីសបោន កាលពីខែសីហា ហើយការឈ្នះពាន ក្នុងកាលៈទេសៈដ៏ចម្លែកនេះ ហាក់បីដូចធ្វើជាតំណាងនៃភាពជោគជ័យរបស់សហព័ន្ធបាល់ទាត់អឺរ៉ុប (UEFA) ផងដែរ។
ស្ថាប័នគ្រប់គ្រងបាល់ទាត់អឺរ៉ុប បានរៀបចំការប្រកួតដ៏មានប្រជាប្រិយភាពរបស់ខ្លួនចប់ចុងចប់ដើម បើទោះមានការពន្យារពេលយ៉ាងយូរ ដោយសារវិបត្តិសុខភាពក៏ដោយ គ្រាន់តែថា រូបមន្តប្រកួតនៃជុំចុងក្រោយ ត្រូវបានធ្វើឡើងខុសពីមុន។
គ្រូបង្វឹកក្រុម Bayern លោក Hansi Flick បាននិយាយរអ៊ូរទាំថា៖ «ការប្រកួត ដែលអត់មានអ្នកគាំទ្រ គឺមិនមែនជាបាល់ទាត់ដែលយើងស្គាល់ឡើយ។ ប្រហែលពេលខាងមុខពួកគេ (អ្នកគាំទ្រ) អាចត្រឡប់មកមានវត្តមានក្នុងកីឡដ្ឋានវិញ»។
ការចាប់ឆ្នោត នៅថ្ងៃព្រហស្បតិ៍ ជាផ្នែក ១ នៃព្រឹត្តិការណ៍ ដែលនឹងឃើញផងដែរនូវវត្តមានរបស់កីឡាករ កីឡាការិនីឆ្នើមៗ ដែលជួយក្រុមឱ្យឈ្នះជើងឯករដូវកាលមុន។
UEFA ត្រូវលុបចោលគម្រោង ដែលប្រុងរៀបចំកម្មវិធីនេះ នៅក្រុងអាថែន ដោយការយកមកធ្វើនៅស្នាក់ការរបស់ខ្លួនវិញ នាក្រុងនីយ៉ុង ប្រទេសស្វ៊ីស ដែលនៅកន្លែងនោះ ការចាប់ឆ្នោតនឹងប្រព្រឹត្តទៅដោយអត់មានភ្ញៀវចូលរួមឡើយ។
ក្រុមគូប្រជែងវគ្គផ្ដាច់ព្រ័តទាំង ២ គឺ Bayern និង PSG នឹងស្ថិតនៅក្នុងក្រុម (ផត) ចំណាត់ថ្នាក់ទី១ រួមជាមួយ Liverpool, Real Madrid, Juventus, Porto, Zenit Saint-Petersburg និងក្រុមជើងឯកពាន Europa League គឺ Sevilla។
ចំណែកក្រុមនៅក្នុងក្រុមចំណាត់ថ្នាក់ទី ២ មានដូចជា Barcelona, Atletico Madrid, Manchester City, Manchester United, Shakhtar Donetsk, Borussia Dortmund, Chelsea និង Ajax។
ក្រុមចំណាត់ថ្នាក់ទី៣ ទើបកំណត់បាន ៤ ក្រុម គឺ RB Leipzig, Inter Milan, Lazio និង Atalanta ខណៈក្រុមចំណាត់ថ្នាក់ទី៤ មាន ៣ ក្រុម គឺ Borussia Moenchengladbach, Istanbul Basaksehir និង Stade Rennais។
រីឯក្រុម Lokomotiv Moscow, Marseille និង Club Brugge ព្រមទាំងក្រុមដែលមិនទាន់បានប្រកួតបញ្ចប់វគ្គនៅវគ្គជម្រុះ មិនទាន់បានកំណត់ក្រុមចំណាត់ថ្នាក់នៅឡើយទេ ដោយក្រុមទាំងនោះត្រូវចូលទៅបំពេញក្រុមចំណាត់ថ្នាក់ទី៣ និងទី៤។
ពាក់ព័ន្ធនឹងការវិបត្តិសុខភាព ប្រធាន UEFA លោក Aleksander Ceferin បានថ្លែងថា៖ «សុខភាពជាបញ្ហាចម្បងនាពេលនេះ តែយើងចង់នាំឱ្យមានក្ដីសង្ឃឹមឡើងវិញ។ អ្នកគាំទ្រ និងកីឡាករ គឺជាផ្នែកដ៏សំខាន់របស់បាល់ទាត់»៕ AFP/VN