.jpg)
ក្រុងហ្សួរិច៖ ក្រុម Bayern Munich ត្រូវប្រឈមជាមួយក្រុមជើងឯកអាហ្វ្រិក Al Ahly ឬ Al Duhail របស់កាតា ក្នុងវគ្គពាក់កណ្ដាលផ្ដាច់ព័ត្រកម្មវិធី Club World Cup ខែក្រោយ ក្រោយបញ្ចប់ការចាប់ឆ្នោតនៅឯស្នាក់ការសហព័ន្ធបាល់ទាត់ពិភពលោក (FIFA) នាក្រុងហ្សួរិច កាលពីថ្ងៃអង្គារ។
វគ្គ ៤ ក្រុមនេះ នឹងត្រូវលេងនៅថ្ងៃចន្ទ ទី ៨ ខែកុម្ភៈ នៅឯកីឡដ្ឋាន Ahmad Bin Ali នាក្រុង Al Rayyan របស់កាតា។
មុនជំនួបនោះ ក្រុម Al Ahly និង Al Duhail នឹងជួបប្រកួតគ្នានៅថ្ងៃទី ៤ ខែកុម្ភៈ នៅ Education City ដែលជាកីឡដ្ឋានមួយត្រូវជ្រើសរើសទុកសម្រាប់រៀបចំព្រឹត្តិការណ៍បាល់ទាត់ World Cup 2022 នៅកាតាផងដែរ។
ក្រុមយក្សទៅពីក្រុងគែររបស់អេហ្ស៊ីប Al Ahly របស់គ្រូបង្វឹកជាតិអាហ្វ្រិកខាងត្បូង លោក Pitso Mosimane គឺក្លិបជោគជ័យបំផុតរបស់ទ្វីបអាហ្វ្រិក ដោយកា្លយជាជើងឯករបស់ទ្វីបនេះរហូតដល់ទៅ ៩ ដង។
ជាមួយគ្នានេះ ក្រុម Al Duhail ដែលអ្នកចាត់ការ លោក Sabri Lamouchi ជាអតីតកីឡាកររបស់ក្រុមបារាំង និង Rennes ព្រមទាំងជាអតីតគ្រូបង្វឹករបស់ក្រុម Nottingham Forest បានសិទ្ធិមកទាត់វគ្គនេះ ក្នុងនាមជាជើងឯកលីគកំពូលរបស់ប្រទេស ដែលជាម្ចាស់ផ្ទះរៀបចំកម្មវិធីនេះ។
គូផ្សេងទៀតនៃការចាប់ឆ្នោតក្រុមម៉ិកស៊ិក Tigres UANL ដែលជាជើងឯក Champions League នៅតំបន់ CONCACAF នឹងត្រូវជួបក្រុមជើងឯកទ្វីបអាស៊ី Ulsan Hyundai របស់កូរ៉េខាងត្បូង នៅថ្ងៃទី ៤ ខែកុម្ភៈ ដើម្បីដណ្ដើមសិទ្ធិឡើងទៅជួបម្ចាស់ពាន Copa Libertadores ក្នុងជំនួបវគ្គ ១/២ គូទី ១ នាថ្ងៃទី ៧ ខែកុម្ភៈ។
ការប្រកួតវគ្គផ្ដាច់ព្រ័ត្រពាន Copa Libertadores របស់តំបន់អាមេរិកឡាទីន ដែលត្រូវបានពន្យារពេលនោះ គឺ Santos និង Palmeiras ត្រូវតទល់គ្នា ហើយការបញ្ចេញសាច់ដុំដាក់គ្នារវាងក្រុមនៅប្រទេសប្រេស៊ីល តែ ១ នេះ នឹងកើតឡើងនៅថ្ងៃទី ៣០ ខែមករា នាកីឡដ្ឋាន Maracana ក្នុងក្រុងរីយោដឺហ្សេនេរ៉ូ។
ក្រុមជើងឯកចាស់ Club World Cup ឆ្នាំ២០១៩ គឺ Liverpool ដោយធ្វើឱ្យក្រុមនៅអឺរ៉ុបឈ្នះពាននេះ ឆ្លាស់គ្នាក្នុងចំណោម ៧ លើកចុងក្រោយ។
ជយលាភីនោះ ផ្ដើមពី Bayern ឆ្នាំ ២០១៣ នៅម៉ារ៉ុក ខណៈក្រុមរបស់លោក Hansi Flick រំពឹងថា នឹងបន្ថែមពាន របស់ FIFA នេះ ទៅក្នុងពានទាំង ៥ ក្នុងឆ្នាំ ២០២០ មាន Bundesliga, German Cup, Champions League, UEFA Super Cup និង German Super Cup៕ AFP/VN
