.jpg)
អ្នកចាំទី Neuer កំពុងលើកពានរង្វាន់ DFB Pokal ខណៈមិត្តរួមក្រុមនាំគ្នាហ៊ោកញ្ជ្រៀវអបអរជាមួយ។ AFP
ប៊ែរឡាំង៖ បន្ទាប់ពីពានក្របខ័ណ្ឌ Bundesliga ឥឡូវនេះ ក្រុម Bayern Munich ឈ្នះពានក្នុងស្រុក ១ ទៀតហើយ គឺ German Cup ឬ DFB-Pokal ក្រោយពីបំបាក់ក្រុម Bayer Leverkusen ៤-២ អំឡុងការប្រកួតក្នុងវគ្គផ្ដាច់ព្រ័ត្រនៅឯកីឡដ្ឋាន Olympiastadion នាក្រុងប៊ែរឡាំងកាលពីថ្ងៃសោរ៍ចុងសប្ដាហ៍កន្លងទៅ ហើយជ័យជម្នះនេះ ធ្វើឲ្យក្រុមកំពូលរបស់អាល្លឺម៉ង់ ១ នេះ កំពុងដើរលើផ្លូវឆ្ពោះទៅរកការឈ្នះពានរង្វាន់ធំៗ ៣ រដូវកាលនេះ។
៤ គ្រាប់ ដែលធ្វើក្រុម Bayern កា្លយជាម្ចាស់ពាននេះ ជាលើកទី ២០ គឺគ្រាប់ទី១ ស៊ុតបញ្ចូលទីដោយខ្សែការពារសញ្ជាតិអូទ្រីស David Alaba នាទីទី១៦ ខណៈគ្រាប់ទី២ ធ្វើបានដោយខ្សែបម្រើ Serge Gnabry របស់អាល្លឺម៉ង់ នាទីទី២៤ ហើយគ្រាប់ទី៣ និងទី៤ បំប៉ោងសំណាញ់ទីដោយកីឡាករតែ ១ រូប គឺខ្សែប្រយុទ្ធអន្តរជាតិប៉ូឡូញ Robert Lewandowski នាទីទី៥៩ និង ៨៩។
ចំណែក ២ គ្រាប់របស់ក្រុម Leverkusen ធ្វើបានដោយកីឡាករសញ្ជាតិអាល្លឺម៉ង់ ២ រូប គឺ ១ គ្រាប់ ដោយខ្សែការពារ Sven Bender នៅនាទីទី៦៣ ដែលជាការតែតបាល់ជ្រុង និង ១ គ្រាប់ទៀត ទម្លុះសំណាញ់ទីដោយខ្សែបម្រើវ័យក្មេង Kai Havertz នាទីទី ៩០+៥ ដែលជាបាល់ពិន័យ ១១ ម៉ែត្រ។
ក្រោយការប្រកួតបញ្ចប់ទៅ គ្រូបង្វឹករបស់ក្រុម Bayern លោក Hansi Flick និយាយសរសើរកូនក្រុមរបស់ខ្លួនចំពោះសមិទ្ធផល ដែលពួកគេសម្រេចបាន ដោយប្រាប់ទូរទស្សន៍ Sky ថា៖ «យើងចាកចេញពីកីឡដ្ឋានជាមួយនឹងមោទនភាព ដែលពួកយើងសម្រេចបាននេះ។ អ្វីដែលក្រុម ធ្វើបានជោគជ័យនៅប៉ុន្មានសប្ដាហ៍ចុងក្រោយនេះ គឺអស្ចារ្យណាស់។ ខ្ញុំសប្បាយចិត្តណាស់ សប្បាយចិត្តមែនទែន។ វិធីដែលក្រុមកំពុងអនុវត្ត គឺពិសេសណាស់។ យើងមានសំណាងណាស់ ដែលឈ្នះពានរង្វាន់ដល់ទៅ ២ ថ្ងៃនេះ»។
ជាមួយគ្នានេះដែរ គ្រូបង្វឹកសញ្ជាតិអាល្លឺម៉ង់ លោក Flick ក៏បានសរសើរ Lewandowski ជាពិសេសថា កីឡាករវ័យ ៣១ ឆ្នាំរូបនេះ អាចឈ្នះពាន Ballon d''Or បន្ទាប់ពីរូបគេ រកគ្រាប់បាល់សរុបបានដល់ទៅ ៥១ គ្រាប់ នៅគ្រប់កម្មវិធីប្រកួតទាំងអស់ ជាពិសេសនោះគ្រាប់បាល់ នៅក្របខ័ណ្ឌកំពូល ៣៤ គ្រាប់ និង ១១ គ្រាប់ ក្នុងក្របខ័ណ្ឌ Champions League។
ដោយលោក Flick និយាយដូច្នេះថា៖ «៥១ គ្រាប់ គឺពិតជាអស្ចារ្យខ្លាំងណាស់។ គ្រាប់ទី១ របស់ Lewandowski ដែលជាគ្រាប់ទី៣ របស់ក្រុមយើង ពិតជាអស្ចារ្យណាស់។ វិធីដែលគេទទួលបាល់ និងរបៀប ដែលគេស៊ុតបញ្ចូលទី ពិតមែនហាក់ដូចជាសំណាងជួយ តែវានៅតែគួរឲ្យសរសើរដដែល ព្រោះអ្វីដែលធ្វើ គឺប្រកបដោយទំនុកចិត្ត និងគុណភាព»។
អ្នកចាត់ការវ័យ ៥៥ ឆ្នាំ បានបន្តទៀតថា៖ «ប្រសិនបើ ពេលនេះ ខ្ញុំរាប់ចំនួនគ្រាប់បាល់ ហើយខ្ញុំដឹងថា គាត់ស៊ុតបាន ៣៤ គ្រាប់ហើយ នៅ Bundesliga រដូវកាលនេះ ដូច្នេះ អ្នកសាកគិតមើលថា តើកីឡាករម្នាក់ពី Bundesliga អាចក្លាយជាម្ចាស់ជយលាភីពាន Ballon d''Or បានឬអត់? ហេតុអីមិនអាច? គេឈរនៅលើទីលានជាមួយនឹងជោគជ័យ ហើយខ្ញុំផ្ទាល់ខ្លួន ចង់ឲ្យគេកាន់តែប្រសើរឡើង ជាពិសេសឈ្នះពានដែលកីឡាករទាំងអស់់ប្រាថ្នាចង់បាន»។
បន្ទាប់ពីលើកពានក្នុងស្រុក ទាំង Bundesliga និង German Cup នេះហើយ ក្រុម Bayern នឹងត្រូវបន្តយុទ្ធនាការរបស់ខ្លួនប្រកួតប្រជែងដណ្ដើមពានដ៏ធំប្រចាំតំបន់អឺរ៉ុប គឺ UEFA Champions League ដែលពេលបានឡើងដល់វគ្គ ១៦ ក្រុមចុងក្រោយ ដោយត្រូវប្រឈមជាមួយក្រុមតោខៀវ Chelsea ក្នុងប្រកួតជើងទី២ ខណៈកាលពីជើងទី១ នៅទឹកដីប្រទេសអង់គ្លេស ពួកគេឈ្នះ ៣-០។ បើតាមការគ្រោងទុកក្របខ័ណ្ឌរបស់អឺរ៉ុបនេះ នឹងធ្វើនៅខែសីហា៕ AFP/VN
