.jpg)
ខ្សែប្រយុទ្ធ Kevin-Prince Boateng (ស្តាំ) ចូលរួមជាមួយក្លិប Barcelona ក្នុងលក្ខខណ្ឌខ្ចីជើង។ AFP
ក្រុងបាសេឡូណា: ខ្សែប្រយុទ្ធអន្តរជាតិហ្គាណា Kevin-Pri-nce Boateng បានសន្យាថានឹងព្យាយាមបង្កើតឲ្យមានការចាប់អារម្មណ៍បំផុតពីការចូលរួមដ៏មិននឹកស្មានដល់របស់គេជាមួយក្លិប Barcelona ក្រោយពីការផ្ទេរក្នុងលក្ខខណ្ឌខ្ចីជើងសម្រាប់កីឡាកររូបនេះពីក្លិបអ៊ីតាលី Sassuolo ត្រូវបានបំពេញកាលពីថ្ងៃចន្ទ។
ក្រុមកំពុងនាំមុខលើតារាងក្របខ័ណ្ឌ La Liga មួយនេះបានឲ្យដឹងក្នុងសេចក្តីថ្លែងការណ៍មួយថាពួកគេបានយល់ព្រមលើការផ្ទេរមួយដើម្បីនាំយក Boateng ក្នុងលក្ខខណ្ឌខ្ចីជើងរហូតដល់បញ្ចប់រដូវកាលនេះជាមួយនឹងជម្រើសក្នុងការទិញយកដាច់នៅរដូវក្តៅខាងមុខ។
ក្លិប Barca បានឲ្យដឹងថា៖ «ការព្រមព្រៀងគ្នានេះក៏រាប់បញ្ចូលទាំងជម្រើសនៃការទិញយកដាច់ក្នុងតម្លៃខ្លួន ៨ លានអឺរ៉ូ (ស្មើនឹង ៩ លានដុល្លារអាមេរិក) ផងដែរ»។
ការចូលរួមរបស់ Boateng វ័យ ៣១ ឆ្នាំនឹងផ្តល់ជម្រើសនៃការជំនួសកន្លែងរបស់ Luis Suarez នៅតំបន់ប្រយុទ្ធក្នុងក្រុមរបស់លោក Ernesto Valverde ក្រោយពីការចាកចេញរបស់កីឡាករ Munir El Haddadi ទៅកាន់ Sevilla។
ខ្សែប្រយុទ្ធរូបនេះបានជួបភាពជោគជ័យគួរឲ្យកត់សម្គាល់កាលពីមុនដែលនាំឲ្យលោក Ernesto Valverde គ្រូបង្វឹកនៃក្រុម Barcelona ធ្វើការសម្រេចចិត្តក្នុងការនាំយករូបគេ។
លោក Valverde បានឲ្យដឹងថា៖ «រូបគេហាក់មិនចាំបាច់ត្រូវការពេលច្រើនក្នុងការសម្របខ្លួនឡើយ រូបគេដឹងពីសមត្ថភាពរបស់គេ និងអាចចាប់ផ្តើមលេងភ្លាមៗបាន»។ គ្រូបង្វឹករូបនេះបានប្រាប់គេហទំព័ររបស់ក្លិបបន្ថែមទៀតថា៖ «រូបគេអាចលេងក្នុងតួនាទីជាច្រើនដូចជាខ្សែប្រយុទ្ធកណ្តាលម្នាក់ ឬក៏លេងក្នុងតំបន់ប្រយុទ្ធផ្សេងទៀតផងដែរ»។ កីឡាកររូបគេខ្លួនឯងក៏មានសុទិដ្ឋិនិយមលើការផ្ទេរនេះផងដែរនៅពេលអ្នកកាសែតបាននិយាយទៅកាន់រូបគេនៅឯអាកាសយានដ្ឋានក្នុងប្រទេសអ៊ីតាលី៕ IS
