ភ្នំពេញ៖ ខណៈផែនការសកម្មភាពមួយចំនួនត្រូវបានជាប់គាំង និងត្រូវបានពន្យារពេលដោយសារវិបត្តិកូវីដ ១៩ ជាលក្ខណៈសកលនោះ គណៈកម្មាធិការជាតិរៀបចំការប្រកួតស៊ីហ្គេមលើកទី៣២ ឆ្នាំ ២០២៣ ហៅកាត់ថា CAMSOC បាននិងកំពុងតែពិនិត្យទៅលើករណីសំខាន់ធំចំនួន ២ ដែលត្រូវធ្វើនៅក្នុងឆមាសទី២ ឆ្នាំ ២០២០ នេះគឺទី១ ពិនិត្យវាយតម្លៃកំណត់យកទីលានកីឡាប្រភេទលើទឹកថ្មីចំនួន ៣ កន្លែងបន្ថែមទៀត ហើយទី២ ពិនិត្យ វាយតម្លៃ ព្រមទាំងភ្ជាប់ទំនាក់ទំនងឡើងវិញ នូវប្រទេសជាង ១០ ដែលគ្រោងទទួលអត្តពលិកកម្ពុជាទៅហ្វឹកហាត់សម្រាប់ត្រៀមស៊ីហ្គេម ឆ្នាំ ២០២៣។
ជាមួយគ្នានេះដែរ គម្រោងចំណាយរបស់ CAMSOC ត្រូវបានកាត់បន្ថយរហូតចំនួន ៧០ ភាគរយ មានន័យថា ប្រតិបត្តិការសកម្មភាពដែលផ្តោតទៅលើរដ្ឋបាល និងបណ្តុះបណ្តាលផ្សេងៗ គឺចំណាយត្រឹម ៣០ ភាគរយទេ នៃគម្រោងទាំងមូល។
លោក វ៉ាត់ ចំរើន អគ្គលេខាធិការ CAMSOC បានប្រាប់ថា ពេលនេះមានប្រទេសចំនួន ១២ ដែលយើងបានភ្ជាប់ទំនាក់ទំនងក្នុងការទទួលយកអត្តពលិកកម្ពុជាសម្រាប់ហ្វឹកហាត់ត្រៀមស៊ីហ្គេមឆ្នាំ ២០២៣ ដែលកម្ពុជាធ្វើជាម្ចាស់ផ្ទះ ហើយដោយសារកូវីដ ១៩ បានធ្វើឲ្យមានការពន្យារពេលក្នុងការបញ្ជូនអត្តពលិករបស់ខ្លួនទៅហ្វឹកហាត់នៅក្រៅប្រទេស។
ទោះជាយ៉ាងនេះក្តី លោក វ៉ាត់ ចំរើន បានបញ្ជាក់ថា៖ « CAMSOC ដាក់គោលដៅទៅហ្វឹកហាត់នៅក្រៅប្រទេសជារឿងសំខាន់ ហើយកាលបរិច្ឆេទចុងក្រោយ គឺខែវិច្ឆិកា នាចុងឆ្នាំ ២០២០ នេះ។ ប្រសិនបើកូវីដ ១៩ មានការថមថយនោះ កម្ពុជានឹងបើកយុទ្ធនាការបញ្ជូនអត្តពលិកចេញទៅហ្វឹកហាត់នៅក្រៅប្រទេសក្នុងទ្រង់ទ្រាយធំតែម្តង ព្រោះឆ្នាំ ២០២១ យើងត្រៀមចូលប្រកួតស៊ីហ្គេមលើកទី៣១ នៅវៀតណាមផងដែរ»។
អគ្គលេខាធិការ NOCC រូបនេះ បន្ថែមថា ប្រទេសជាដៃគូសហការទទួលយកអត្តពលិកកម្ពុជានោះ មានដូចជាចិន (ច្រើនជាងគេ) កូរ៉េ ជប៉ុន ថៃ វៀតណាម និងបណ្ដាប្រទេសមួយចំនួននៅទ្វីបអាស៊ី អឺរ៉ុប និងអាមេរិក គេស្ម័គ្រចិត្តទទួលយកកីឡាករ កីឡាការិនីកម្ពុជាទៅហ្វឹកហាត់ផងដែរ។
លោក វ៉ាត់ ចំរើន បានបន្តថា៖ «ចំណែកអត្តពលិកកម្ពុជា ដែលត្រៀមខ្លួនចេញទៅហ្វឹកហាត់នៅក្រៅប្រទេសមានចំនួន ១១០ នាក់ ក្នុងនោះមានប្រភេទកីឡា ដែលមានសក្ដានុពលដូចជា ប៉េតង់ ចំបាប់ វូស៊ូ វ៉ូវីណាម តេក្វាន់ដូ សូហ្វតិន្នីស វាយកូនបាល់ វាយសី និងប្រភេទកីឡាជាច្រើនទៀត។ មិនតែប៉ុណ្ណោះ ប្រភេទកីឡាមួយចំនួន ដែលកន្លងមក ពុំធ្លាប់ប្រជែងបានមេដាយនោះ ក៏កំពុងតែធ្វើឲ្យបណ្ដាប្រទេសក្នុងតំបន់ចាប់អារម្មណ៍ខ្លាំងណាស់ដែរ ដូចជា ម៉ូតូទឹក ជាដើម»។
តាមកិច្ចប្រជុំវាយតម្លៃសកម្មភាពផែនការឆមាសទី២ ឆ្នាំ ២០២០ លោក ថោង ខុន អនុប្រធានអចិន្ត្រៃយ៍ CAMSOC បានថ្លែងថា ក្រៅពីមជ្ឈមណ្ឌលកីឡាលើទឹកនៅខេត្តកំពត យើងមានស្រាប់ គឺយើងកំពុងពិនិត្យទៅលើទីលានចំនួន ៣ កន្លែងទៀត គឺ បឹងតាមោក (ភ្នំពេញ) បឹងទឹកសាបកង្កែប ជិតតំបន់ឆ្នេរខេត្តព្រះសីហនុ និងនៅខេត្តកែប ដែលតម្រូវទៅលើកីឡាទ្រីយ៉ាត្លុង ដែលយើងធ្លាប់ប្រើប្រាស់នៅទីនោះ ព្រោះប្រភេទកីឡាលើទឹកត្រូវការទីលានច្រើន ដ្បិតអីក្រៅពីប្រកួតហែលនៅមានប្រណាំងទូក (ទូកប្រពៃណី ទូករ៉ូវឹង និងកាយ៉ាក់) ប្រណាំងម៉ូតូទឹក, ប្រណាំងទូកក្តោង, ជិះស្គី និងកីឡាទ្រីយ៉ាត្លុង (រត់ ជិះកង់ និងហែលទឹក) ជាដើម។
លោក ថោង ខុន ដែលជាប្រធានគណៈកម្មាធិការជាតិអូឡាំពិកកម្ពុជា (NOCC) ផងនោះ បានបន្ថែមថា៖ «យើងមានទីលានកីឡាលើទឹកនៅខេត្តកំពត ប្រើប្រាស់យូរហើយ ប៉ុន្តែមិនទាន់អាចបម្រើការប្រកួតលក្ខណៈទ្រង់ទ្រាយធំជាអន្តរជាតិដូចស៊ីហ្គេមនេះបាននៅឡើយ ហេតុនេះយើងកំពុងពិនិត្យវាយតម្លៃ និងដាក់ជូនប្រធាន CAMSOC និងក្រុមបច្ចេកទេសពិនិត្យសម្រេចជាចុងក្រោយ ក្នុងការសម្របសម្រួលទីលានឲ្យត្រូវខ្នាតអន្តរជាតិ»៕