.jpg)
អង្គប្រជុំបូកសរុបការងាររបស់ CAMSOC នៅវិមានមិត្តភាពក្រោមអធិបតីភាពលោក ទៀ បាញ់ កាលពីថ្ងៃអង្គារ។ រូប ឈន ណន
ភ្នំពេញៈ គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី ៣២ ឆ្នាំ ២០២៣ ហៅកាត់ថា CAMSOC បានដាក់ចេញនូវផែនការចំនួន ៥ ចំណុចសម្រាប់អាជ្ញាធរថ្នាក់ក្រោមជាតិ រាជធានី-ខេត្តទូទាំងប្រទេសឲ្យចូលរួមទ្រទ្រង់ចលនាកីឡា និងធ្វើឲ្យកាន់តែមានប្រសិទ្ធភាពសម្រាប់ការត្រៀមលក្ខណសម្បត្តិឆ្ពោះទៅធ្វើជាម្ចាស់ផ្ទះស៊ីហ្គេមជាប្រវត្តិសាស្ត្រនៅកម្ពុជានេះ។
ផែនការយុទ្ធសាស្ត្រនេះត្រូវបានដាក់ក្នុងកិច្ចប្រជុំបូកសរុបការងារឆ្នាំ ២០១៩ និងលើកទិសដៅការងារឆ្នាំ ២០២០ របស់ CAMSOC ក្រោមអធិបតីភាពលោក ទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ និងប្រធាន CAMSOC ព្រមទាំងអនុប្រធានអចិន្រៃ្តយ៍លោក ថោង ខុន និងមានការចូលរួមពីសមាជិកគណៈកម្មាធិការប្រតិបត្តិភាគីពាក់ព័ន្ធ និងតំណាងរាជធានី-ខេត្ត នៅវិមានមិត្តភាពទីស្តីការគណៈរដ្ឋមន្ត្រីកាលពីព្រឹកថ្ងៃអង្គារម្សិលមិញ។
ទោះបីជាយ៉ាងណាប្រភពជាច្រើនចេញពីសហព័ន្ធកីឡាជាតិនៅតែពុំមានជំនឿ ទៅលើផែនការនោះទេ ដោយសារកន្លងមកគណៈកម្មការហិរញ្ញវត្ថុរបស់ CAMSOC ស្ថិតនៅឆ្ងាយពីការចំណាយពិត និងជាក់ស្តែងរបស់សហព័ន្ធកីឡាជាតិ ព្រោះអស់រយៈពេលជិត ១ ឆ្នាំមកនេះ ពួកគេបានជួបប្រទះការលំបាកបំផុត ហើយបញ្ហានេះបាននាំឲ្យសហព័ន្ធកីឡាជាតិមួយចំនួនអស់ជំនឿ។
សម្រាប់ផែនការទាំង ៥ ចំណុចនោះគឺទី ១ ផ្សព្វផ្សាយ និងបញ្ជ្រាបចំណេះដឹងពីកម្ពុជាត្រៀមទទួលធ្វើម្ចាស់ផ្ទះស៊ីហ្គេម ឆ្នាំ ២០២៣ ទី ២ រៀបចំផ្លាស់ប្ដូរឥរិយាបថប្រជាជនក្នុងមូលដ្ឋានលើភាពស្អាត និងបៃតង និងកាត់បន្ថយភាពអសកម្មក្នុងសង្គម ទី ៣ រៀបចំអប់រំប្រជាជនឲ្យស្គាល់តម្លៃនៃការធ្វើសកម្មភាពអប់រំ និងកីឡា ដើម្បីសុខភាព មិត្តភាព និងសាមគ្គីភាព។
ចំណែកទី ៤ រៀបចំរូបសំណាក ឬផ្ទាំងផ្សព្វផ្សាយរៀបចំព្រឹត្តិការណ៍កីឡាមហាជន កម្មវិធីកីឡា កម្មវិធីសិល្បៈ វប្បធម៌ អំឡុងពេលស៊ីហ្គេម ឆ្នាំ ២០២៣ ហើយទី ៥ សហការ និងជួយរៀបចំសកម្មភាពរបស់គណៈកម្មាធិការជាតិ ស៊ីហ្គេមនៅរាជធានី-ខេត្ត។
ទោះជាយ៉ាងណាចំណុចសំខាន់នៃការចំណាយ ដែលមានគណៈកម្មការហិរញ្ញវត្ថុនោះនៅមិនទាន់ជំរុញ និងសម្រួលឲ្យតំណាងខាងសហព័ន្ធកីឡាជាតិមានជំនឿនៅឡើយទេ។
លោក វ៉ាត់ ចំរើន អគ្គលេខាធិការ CAMSOC បានថ្លែងថា៖ «ផែនការសំខាន់នេះនឹងត្រូវដាក់ចេញសម្រាប់អាជ្ញាធរថ្នាក់ក្រោមជាតិ ពិសេសថ្នាក់រាជធានី-ខេត្តទាំងអស់ត្រូវចូលរួមអនុវត្តព្រមទាំងណែនាំឲ្យប្រជាពលរដ្ឋ ដើម្បីជ្រាប និងដឹងនូវកាតព្វកិច្ចរបស់ខ្លួនគឺកីឡាដើម្បីទាំងអស់គ្នា ហើយលុបបំបាត់នូវរូបភាពអវិជ្ជមានក្នុងសង្គមជាតិ និងកសាងកេរ្ដិ៍ឈ្មោះ និងបង្ហាញសក្តានុពលកម្ពុជាឲ្យបណ្ដាប្រទេសលើសកលលោកស្គាល់តាមរយៈចូលរួមប្រកួតស៊ីហ្គេមមានភាពកក់ក្ដៅ និងកោតសរសើរដល់ការធ្វើម្ចាស់ផ្ទះ លើកដំបូងរបស់ព្រះរាជាណាចក្រកម្ពុជា។
លោក វ៉ាត់ ចំរើន ដែលជាអគ្គលេខាធិការគណៈកម្មាធិការជាតិកម្ពុជាផងនោះ បានបន្ថែមថា៖ «អ្វីដែលពិសេស គឺការបំផុសកម្មភាពកីឡាផ្សារភ្ជាប់ជាមួយការផ្សព្វផ្សាយកម្ពុជាត្រៀមធ្វើម្ចាស់ផ្ទះស៊ីហ្គេមឲ្យបានទៅដល់មូលដ្ឋានទីកន្លែងតាម រាជធានី-ខេត្តទូទាំងប្រទេសអ៊ីចឹងនៅគ្រប់វេទិកា សាធារណៈ និងការជួបជុំនានា គឺអង្គប្រជុំត្រូវមានប្រសាសន៍ពីស៊ីហ្គេមលើកទី ៣២ ដែលនឹងត្រូវធ្វើពីថ្ងៃទី ៥ ដល់ថ្ងៃទី ១៥ ខែឧសភា ឆ្នាំ ២០២៣»។
ជាមួយគ្នានេះលោក ទៀ បាញ់ បានសម្ដែងការកោតសរសើរចំពោះវឌ្ឍនភាពការងាររបស់ CAMSOC ក្នុងឆ្នាំ ២០១៩ និងការដាក់ចេញនូវផែនការការងារថ្មីៗសម្រាប់អនុវត្តបន្ដក្នុងឆ្នាំ ២០២០ ដែលជាជំហានមួយដ៏សំខាន់ ពិសេសផែនការសម្រាប់អាជ្ញាធរថ្នាក់ក្រោមជាតិ រាជធានី-ខេត្តទូទាំងប្រទេសដែលសុទ្ធតែមានភារកិច្ចដូចគ្នា ដើម្បីសហការឆ្ពោះទៅរកភាពជោគជ័យក្នុងការធ្វើម្ចាស់ផ្ទះការប្រកួតកីឡាស៊ីហ្គេម ឆ្នាំ ២០២៣។
យ៉ាងណាក៏ដោយតាមរយៈបទសម្ភាសជាមួយភ្នំពេញប៉ុស្តិ៍តំណាងសហព័ន្ធកីឡាជាតិចំនួន ៣ បានប្រាប់ភ្នំពេញប៉ុស្តិ៍ ដោយសុំមិនបញ្ចេញឈ្មោះគឺពួកគាត់បាននិយាយរិះគន់ពីកម្មវិធីចំណាយរបស់ CAMSOC កាលពីឆ្នាំ ២០១៩ ព្រោះការចំណាយទៅលើធនធានបណ្តុះបណ្តាលមិនសមទៅនឹងស្ថានភាពការចំណាយជាក់ស្តែងគឺចំនួនតិចតួច ហើយត្រូវប្រើពេលច្រើនខែទៀតទើបបើកថវិកានោះបាន ដែលនេះជាទម្លាប់ចាស់គំរឹលមួយគួរតែមានកំណែទម្រង់។ ហេតុនេះពួកគាត់នៅតែមិនទាន់មានភាពជឿជាក់ទៅលើគណៈកម្មការហិរញ្ញវត្ថុរបស់ CAMSOC នៅឡើយ៕
