.jpg)
CAMSOC នឹងប្រកាសជយលាភីនិមិត្តសញ្ញាស៊ីហ្គេម និងអាស៊ានប៉ារ៉ាហ្គេម នៅថ្ងៃសុក្រ។ រូបថត ឈន ណន
ភ្នំពេញ៖ គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ (ស៊ីហ្គេម) លើកទី៣២ ឆ្នាំ ២០២៣ ហៅកាត់ថា CAMSOC បានកំណត់យកថ្ងៃសុក្រ ទី ៧ ខែ សីហា ឆ្នាំ ២០២០ ដើម្បីប្រារព្ធកម្មវិធីជាផ្លូវការដ៏ធំមួយ គឺការប្រកាសពានរង្វាន់ជូនជយលាភីដល់បេក្ខជនដែលឈ្នះស្លាកសញ្ញា ឬនិមិត្តសញ្ញាស៊ីហ្គេមលើកទី៣២ និងស្លាកសញ្ញាអាស៊ានប៉ារ៉ាហ្គេមលើកទី១១ ឆ្នាំ ២០២៣ ព្រមទាំងពិធីរាប់ថយក្រោយ ១ ០០០ ថ្ងៃ។
កម្មវិធីដ៏ធំនេះ គ្រោងនឹងធ្វើឡើងនៅពហុកីឡដ្ឋានជាតិមរតកតេជោ ខណ្ឌជ្រោយចង្វារ រាជធានីភ្នំពេញ ដោយមានការចូលរួមពីលោកឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ ទៀ បាញ់ ដែលជាប្រធាន CAMSOC ហើយស្ថាប័នជំនាញមួយនេះ បានកំណត់យកការរាប់ថយក្រោយ ១ ០០០ ថ្ងៃ ឲ្យដល់ថ្ងៃទី ៥ ខែ ឧសភា ឆ្នាំ ២០២៣ ដើម្បីបង្ហាញជាពាក្យស្លោករបស់ស៊ីហ្គេម និងអាស៊ានប៉ារ៉ាហ្គេម គឺកីឡារស់ក្នុងសន្តិភាព។
លោក វ៉ាត់ ចំរើន ជាអគ្គលេខាធិការ CAMSOC បានប្រាប់ភ្នំពេញ ប៉ុស្តិ៍ថា CAMSOC គ្រោងរៀបចំកម្មវិធីនៅថ្ងៃសុក្រ ទី ៧ ខែ សីហា ឆ្នាំ ២០២០ នាវេលាម៉ោង ៥ ល្ងាច ហើយកម្មវិធីសំខាន់ៗរួមមាន របាំជូនពរ, សុន្ទរកថាស្វាគមន៍ដោយលោកបណ្ឌិត ថោង ខុន អនុប្រធានអចិន្រ្តៃយ៍ CAMSOC, មតិសំណេះសំណាល និងការផ្តល់អនុសាសន៍ណែនាំដ៏ខ្ពង់ខ្ពស់ពីលោកឧបនាយករដ្ឋមន្រ្តី ទៀ បាញ់, ពិធីប្រកាសបេក្ខជន បេក្ខនារី ដែលជាម្ចាស់ជយលាភី ស្លាកសញ្ញានិមិត្តសញ្ញាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១១ ឆ្នាំ ២០២៣ ព្រមទាំងជូនរង្វាន់លើកទឹកចិត្ត។
លោក វ៉ាត់ ចំរើន ជាអគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) ផងនោះ បានបន្ថែមថា៖ «កម្មវិធីយើង មានសម្តែងសិល្បៈ និងពិធីរាប់ថយក្រោយចំនួន ១ ០០០ ថ្ងៃ ដោយសន្ធឹកស្គរជ័យ អបអរសាទរ ចំពោះពាក្យស្លោករបស់ស៊ីហ្គេម និងអាស៊ានប៉ារ៉ាហ្គេមដែលយើងបានជ្រើសរើសថា កីឡារស់ក្នុងសន្តិភាព ឬ SPORT LIVE IN PEACE»។
ជាមួយគ្នានេះដែរ កម្មវិធីក៏បានបូកបញ្ជូលនូវការទទួលរៀបចំធ្វើម្ចាស់ផ្ទះព្រឹត្តិការណ៍កីឡាអាស៊ានប៉ារ៉ាហ្គេម (កីឡាជនពិការ) លើកទី១២ ឆ្នាំ ២០២៣ បន្ទាប់ពីបញ្ចប់ស៊ីហ្គេមលើកទី៣២ រយៈពេលជាង ១០ ថ្ងៃផងដែរ ដោយមានកាលបរិច្ឆេទពីថ្ងៃទី ១ ដល់ថ្ងៃទី ១០ ខែ មិថុនា ឆ្នាំ ២០២៣។
លោក យី វាសនា អគ្គលេខាធិការគណៈកម្មាធិការជាតិប៉ារ៉ាឡាំពិកកម្ពុជា និងជាអគ្គលេខាធិការរង CAMSOC មិនអាចសុំសម្ភាសបាន ប៉ុន្តែលោក ម៉ៅ សុជា ប្រធានរដ្ឋបាលនៃកីឡាជនពិការ បានឲ្យដឹងថា កីឡាករជនពិការបច្ចុប្បន្នមានចំនួន ១៦ ប្រភេទ ហើយមានសកម្មភាពខ្លាំងចំនួន ៩ ប្រភេទ ដើម្បីត្រៀមជាបណ្តើរៗ សម្រាប់ព្រឹត្តិការណ៍អាស៊ានប៉ារ៉ាហ្គេម ឆ្នាំ ២០២៣។
លោក ម៉ៅ សុជា បន្ថែមថា៖ «តាមគោលការណ៍ច្បាប់របស់កីឡាអាស៊ានប៉ារ៉ាហ្គេម ដែលម្ចាស់ផ្ទះរៀបចំ គឺមិនអាចមានប្រភេទកីឡាតិចជាងប្រទេសម្ចាស់ផ្ទះរៀបចំមុនៗនោះទេ គឺមានន័យថា បើម្ចាស់ផ្ទះស៊ីហ្គេមនៅវៀតណាមមាន ១៦ ប្រភេទ គឺអ្នករៀបចំក្រោយបន្តបន្ទាប់ ត្រូវតែច្រើនជាង ហេតុនេះកម្ពុជានឹងរង់ចាំមើលការប្រកួតអាស៊ានប៉ារ៉ាហ្គេមលើកទី១១ ឆ្នាំ ២០២១ នៅប្រទេសវៀតណាម សិន»៕
