.jpg)
កីឡាករជាបងប្អូនបង្កើត សំបូរ សោភ័ណ្ឌ (ពីឆ្វេង) សំបូរ នន់ និង សំបូរ ណាន ដែលសុទ្ធតែធ្លាប់ឈ្នះមេដាយជូនជាតិ ប៉ុន្តែស៊ីហ្គេមលើកនេះ អ្នកទាំង ៣ មិនបានចូលរួមនោះទេ។
ក្រុមកាយវប្បកម្ម (បង្ហាញសាច់ដុំ) ដែលធ្លាប់មានស្នាដៃ ដណ្តើមមេដាយមាស ប្រាក់ និងសំរឹទ្ធ ពីការប្រកួតជើងឯកពិភពលោកជូនជាតិនោះ ត្រូវបានគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី ៣២ ឆ្នាំ ២០២៣ (CAMSOC) និងក្រសួងអប់រំ យុវជន និងកីឡា សម្រេចដាក់ឱ្យចូលរួមនៅក្នុងការប្រកួតស៊ីហ្គេមជាថ្មី ដែលនឹងត្រូវធ្វើនៅប្រទេសវៀតណាមនាចុងឆ្នាំ ២០២១ នេះ ហើយមន្ត្រីជំនាញរបស់ CAMSOC មានការជឿជាក់ថា ក្រុមកាយវប្បកម្មអាចនឹងឈ្នះបានមេដាយមាសជូនជាតិ។
បើទោះបីជា សហព័ន្ធកីឡាកាយវប្បកម្មកម្ពុជាមានការបែកបាក់ផ្ទៃក្នុង ដោយសារតែការដឹកនាំគ្រប់គ្រង ពេលខ្លះធ្វើឱ្យកីឡាករមិនសប្បាយចិត្តជាមួយប្រាក់រង្វាន់ នៅពេលពួកគេឈ្នះបានមេដាយកន្លងមក ប៉ុន្តែក្រោមការសម្របសម្រួលពីគណៈកម្មាធិការជាតិអូឡាំពិកកម្ពុជា (NOCC) អគ្គនាយកដ្ឋានកីឡា និងមជ្ឈមណ្ឌលជាតិហ្វឹកហ្វឺនកីឡាបានធ្វើឱ្យសហព័ន្ធនេះមានការបង្រួបបង្រួមគ្នាឡើងវិញ តែបានផ្លាស់ប្តូរក្បាលម៉ាស៊ីនដឹកនាំ ដោយបានតែងតាំងម្ចាស់មេដាយប្រាក់ពិភពលោក តឹក ប៊ុនវី ឱ្យឡើងធ្វើជាប្រធានសហព័ន្ធជំនួសតំណែងជាអគ្គលេខាធិការ។
ជាមួយគ្នានេះសហព័ន្ធកីឡាកាយវប្បកម្មកម្ពុជាត្រូវបានក្រសួងអប់រំ អនុញ្ញាតឱ្យមានការប្រមូលផ្តុំ គ្រូបង្វឹក និងក្រុមអត្តពលិកចំនួន ៥ នាក់នៅឆ្នាំ ២០២១ នេះ ប៉ុន្តែនៅក្នុងបេក្ខភាពទាំងនេះ គ្មានវត្តមានកីឡាករជាបងប្អូនបង្កើត សំបូរ ណាន និង សំបូរ សោភ័ណ្ឌ ដែលធ្លាប់ឈ្នះបានមេដាយមាសជើងឯកពិភពលោកជូនជាតិកន្លងមកនោះទេ។
ជុំវិញបញ្ហានេះលោក សុខ វណ្ណៈ អគ្គលេខាធិការសហព័ន្ធកីឡាកាយវប្បកម្មកម្ពុជាបានប្រាប់ភ្នំពេញប៉ុស្តិ៍ថា៖ «យើងបានទាក់ទងទៅពួកគាត់ដែរ ប៉ុន្តែកីឡាករ សំបូរ ណាន, សំបូរ សោភ័ណ្ឌ, សំបូរ នន់ និងកីឡាករមួយចំនួនទៀត ដែលល្បីៗនោះបានប្រាប់មកវិញថា ពួកគាត់ចាស់ និងឈប់ហាត់អស់ហើយ គឺពួកគាត់បានប្តូរទៅប្រកបមុខរបរផ្សេងដោយបានហាត់ប្រាណធម្មតាៗ ដើម្បីត្រឹមសុខភាព»។
យ៉ាងណាក៏ដោយ លោក សុខ វណ្ណៈ បានអះអាងថា កីឡាករទាំង ៤ នាក់ ដែលត្រូវបានដាក់ឱ្យហ្វឹកហាត់ក្នុងក្រុមជម្រើសជាតិជាមួយលោកគ្រូ ចាប វ៉ាននី រួមមានកីឡាករ កែវ សំណាង, ទ្រីង ចាន់, អ៊ុន បូរ៉ាត់ និងកីឡាករ អ៊ិត សុធា សម្រាប់ត្រៀមការប្រកួតស៊ីហ្គេមលើកទី ៣១ នៅវៀតណាមឆ្នាំនេះ ក៏មានសមត្ថភាពល្អផងដែរ ហើយទោះស្ថិតក្នុងអំឡុងពេលវិបត្តិជំងឺកូវីដ១៩ ក៏ដោយ ក៏ពួកគេបានហ្វឹកហាត់យ៉ាងសកម្ម នៅទីលានហ្វឹកហាត់ ១ កន្លែងលើផ្សារសំណង់១២ ដើម្បីពង្រឹងសមត្ថភាព និងបច្ចេកទេស។
អគ្គលេខាធិការរូបនេះ បានបន្ថែមថា៖ «កីឡាករទាំង ៤ នាក់ដែលដាក់ឱ្យហ្វឹកហាត់ ត្រៀមការប្រកួតស៊ីហ្គេមនេះ ក៏ស្ថិតនៅក្នុងក្តីសង្ឃឹមផងដែរ ព្រោះពួកគាត់ធ្លាប់បានឈ្នះមេដាយមាស ប្រាក់ និងសំរឹទ្ធក្នុងការប្រកួតអន្តរជាតិ កន្លងមក ហើយពេលនេះពួកគាត់បានប្រឹងប្រែងហ្វឹកហាត់យ៉ាងសកម្ម ដើម្បីធ្វើឱ្យសាច់ដុំកាន់តែល្អថែមទៀត»។
ចំណែកលោក វ៉ាត់ ចំរើន អគ្គលេខាធិការ CAMSOC បានថ្លែងថា ៖ «កីឡាកាយវប្បកម្មជាប្រភេទកីឡា មានសក្តានុពលល្អអាចមានសមត្ថភាពដណ្តើមមេដាយណាមួយជូនកម្ពុជា ព្រោះតាមលទ្ធផលប្រកួតកន្លងមក ពួកគាត់ដណ្តើមបានមេដាយជូនជាតិគួរឱ្យកត់សម្គាល់។ ហេតុនេះ សម្រាប់ស៊ីហ្គេមនៅប្រទេសវៀតណាមឆ្នាំនេះ និងស៊ីហ្គេមនៅកម្ពុជា ឆ្នាំ ២០២៣ យើងហ៊ានវាយតម្លៃថា នឹងមានការប្រកួតប្រជែងក្នុងលំដាប់ជួរមុខ»។
លោក វ៉ាត់ ចំរើន ដែលជាអគ្គលេខាធិការ NOCC ផងនោះបានបន្ថែមថា៖«កីឡាកាយវប្បកម្មពេលទៅប្រកួតលើឆាកអន្តរជាតិតែងតែឈ្នះបានមេដាយមាស ប្រាក់ និងសំរឹទ្ធ ហេតុនេះក្នុងកម្រិតស៊ីហ្គេមលើកនេះ យើងក៏នៅតែមានទំនុកចិត្តថា ទទួលផលល្អដែរ ដោយយើងព្យាករថា នឹងអាចដណ្តើមបានមេដាយមាស ២ គ្រឿង ព្រោះសហព័ន្ធកីឡាកាយវប្បកម្ម បានជ្រើសរើសកីឡាករជើងខ្លាំង មកហ្វឹកហាត់ឡើងវិញ ត្រៀមការប្រកួតនេះ»។
តាមការបញ្ជាក់ពីលោក តឹក ប៊ុនវី ជាប្រធានសហព័ន្ធបានឱ្យដឹងថា សម្រាប់លទ្ធផលនៃការប្រកួតកន្លងមក ក្រុមកាយវប្បកម្មធ្លាប់ឈ្នះបានមេដាយមាស ៥ ប្រាក់ ៣ និងសំរឹទ្ធ ២ ពីការប្រកួតជើងឯកអាស៊ីអាគ្នេយ៍ ចំណែកការប្រកួតជើងឯកពិភពលោក យើងធ្លាប់ឈ្នះបានមេដាយមាស ២ ប្រាក់ ១ និងមេដាយសំរឹទ្ធ ២ គ្រឿង៕
