ភ្នំពេញ៖ គណៈកម្មការអចិន្ត្រៃយ៍របស់គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី ៣២ ឆ្នាំ ២០២៣ (CAMSOC) នឹងកោះហៅអ្នកពាក់ព័ន្ធឱ្យចូលរួមប្រជុំនៅដើមសប្តាហ៍នេះ ក្រោមការដឹកនាំដោយលោកបណ្ឌិត ថោង ខុន ដើម្បីត្រួតពិនិត្យវាយតម្លៃ និងតម្រង់ទិសការងារចំបាច់ចំនួន ២ គឺទី១ ត្រួតពិនិត្យវាយតម្លៃលើការរៀបចំប្រកួតរបស់កីឡាជនពិការឈ្មោះថា អាស៊ាន ប៉ារ៉ាហ្គេម លើកទី១២ ដែលកម្ពុជាត្រូវធ្វើម្ចាស់ផ្ទះ ក្រោយស៊ីហ្គេម ឆ្នាំ ២០២៣ ហើយទី២ ត្រួតពិនិត្យវាយតម្លៃចំពោះគណៈកម្មការដឹកជញ្ជូនការហូបចុក និងស្នាក់នៅ។
លោកបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាអនុប្រធានអចិន្ត្រៃយ៍ CAMSOC ថ្លែងប្រាប់ថា៖ «នៅសប្តាហ៍នេះ CAMSOC នឹងមានរបៀបវារៈចំនួន ២ ទៀត ដាក់ឆ្លងគណៈអចិន្ត្រៃយ៍ ខណៈដែលសប្តាហ៍មុន យើងបានសម្រេចយល់ព្រមជាគោលការណ៍នូវទីតាំងទីលានប្រកួតនៅរាជធានីភ្នំពេញ និងខេត្តមួយចំនួនទៅតាមជំនាញរបស់សហព័ន្ធកីឡាជាតិនីមួយៗ»។
លោកបានបន្ថែមថា៖ «ចំណែកនៅសប្តាហ៍នេះ CAMSOC នឹងប្រជុំពិនិត្យវាយតម្លៃ និងរៀបចំតម្រង់ទិសទៅលើប្រភេទកីឡាជនពិការ ដែលនឹងរៀបចំប្រកួត ក្រោយពេលស៊ីហ្គេមលើកទី៣២ បានបិទបញ្ចប់។ ជាមួយគ្នានេះ កីឡាប៉ារ៉ាហ្គេមលើកទី១២ ឆ្នាំ ២០២៣ នឹងបន្តរៀបចំធ្វើម្ចាស់ផ្ទះជាលើកដំបូងរបស់កម្ពុជាដែរ ហើយគណៈកម្មការរៀបចំប្រកួតអាស៊ានប៉ារ៉ាហ្គេមនេះ គឺយើងប្រើប្រាស់ធនធាន និងរចនាសម្ព័ន្ធ ដែលមានស្រាប់របស់ CAMSOC អ៊ីចឹងគណៈកម្មការអាស៊ានប៉ារ៉ាហ្គេម ក៏ជាផ្នែកមួយក្នុង CAMSOC ដែរ គឺមានឯកឧត្តម យី វាសនា ជាអគ្គលេខាធិការកីឡាជនពិការ និងជាអគ្គលេខាធិការរង CAMSOC»។
ប្រធានគណៈកម្មាធិការជាតិអូឡាំពិកកម្ពុជា (NOCC) លោកបណ្ឌិត ថោង ខុន ប្រាប់បន្ថែមទៀតថា៖ «ចំពោះរបៀបវារៈទី២ CAMSOC នឹងពិនិត្យវាយតម្លៃជំរុញទៅលើការងារសកម្មភាពរបស់គណៈកម្មការដឹកជញ្ចូនការហូបចុកស្នាក់នៅ ព្រោះក្រុមជំនាញការងារនេះ គប្បីស្គាល់ភូមិសាស្ត្រ ទីតាំង ទីលាន ព្រមទាំងពេលវេលាឱ្យបានច្បាស់ ទើបការងារផ្សារភ្ជាប់គ្នាមានប្រសិទ្ធភាពខ្ពស់»។
ចំណែកលោក យី វាសនា មិនទាន់អាចលម្អិតបានទេ ពីប្រភេទកីឡាជនពិការនេះ ដោយលោកបញ្ជាក់ថា ចាំប្រជុំហើយសិន ខណៈការប្រកួតកីឡាអាស៊ានប៉ារ៉ាហ្គេមនៅកម្ពុជានេះ នឹងចាប់ប្រកួតពីថ្ងៃទី ១ ដល់ថ្ងៃទី ១០ ខែ មិថុនា ឆ្នាំ ២០២៣ ដោយប្រើប្រាស់គណៈកម្មការមានស្រាប់របស់ CAMSOC។
លោក វ៉ាត់ ចំរើន អគ្គលេខាធិការ CAMSOC បានប្រាប់ថា៖ «កិច្ចប្រជុំនេះ នឹងប្រារព្ធធ្វើនៅថ្ងៃពុធ ដើមសប្តាហ៍នេះ ហើយរបៀបវារៈធំចំនួន ២ ដែលសំខាន់ គឺវឌ្ឍនភាពរបស់កីឡាជនពិការ និងជំរុញផ្សារភ្ជាប់វឌ្ឍនភាពការងាររបស់គណៈកម្មការទីលានការហូបចុកស្នាក់នៅនេះឱ្យបន្ស៊ីជាមួយប្រភេទកីឡា ក្នុងនោះមានពេលវេលាប្រកួត ដើម្បីជាមធ្យោបាយឱ្យសកម្មភាពប្រកួតទៅមានលក្ខណៈរលូន។ ហេតុនេះពេលវេលាហូបចុក ស្នាក់នៅ និងពេលវេលាប្រកួតត្រូវតែដឹងឱ្យបានច្បាស់ ព្រោះជាការប្រកួតក្នុងកម្រិតស្តង់ដាអន្តរជាតិ ព្រមទាំងជាមុខមាត់របស់កម្ពុជា ក្នុងនាមជាម្ចាស់ផ្ទះ»៕