ភ្នំពេញ៖ គណៈកម្មាធិការជាតិរៀបចំការប្រកួតកីឡាស៊ីហ្គេមឆ្នាំ ២០២៣ ហៅកាត់ថា CAMSOC បានព្រាងផែនការប្រមូលផ្តុំបង្វឹកកីឡាជម្រើសជាតិ ដោយស្នើសុំការអនុញ្ញាតជាគោលការណ៍ទៅលោក ទៀ បាញ់ ដែលជាប្រធាន ដើម្បីធ្វើការប្រមូលផ្តុំហ្វឹកហាត់ជាថ្មីនៅចុងឆ្នាំ ២០២០ តទៅ ហើយអ្នកជំនាញអះអាងថា អាចនឹងទៅរួច បើសិនការព្យាករស្ថានភាពបញ្ហាកូវីដ ១៩ ត្រូវបានគ្រប់គ្រងបានល្អឡើងវិញ នៅក្នុងខែឧសភានេះ ឬខែមិថុនានោះ ខណៈការប្រមូលផ្តុំហ្វឹកហាត់នេះនឹងប្រឹងប្រែងឲ្យបានសកម្មតែម្តង។
លោក វ៉ាត់ ចំរើន អគ្គលេខាធិការ CAMSOC បានឲ្យដឹងថា ក្រសួងអប់រំ យុវជន និងកីឡា និង NOCC បានរៀបចំធ្វើផែនការបង្ការតាំងពីពេលមុនការផ្ទុះខ្លាំងនៃវិបត្តិជំងឺឆ្លងផ្លូវដង្ហើមប្រភេទថ្មីនេះទៅទៀត ក្នុងនោះយើងបានត្រៀមកីឡាជំនាញសម្រាប់សហព័ន្ធកីឡាជាតិបានល្អ ក្នុងការចេញទៅហ្វឹកហាត់នៅក្រៅប្រទេសជាមួយដៃគូ ប៉ុន្តែត្រូវបានខកខានដោយបញ្ហាកូវីដ ១៩ ដែលជាវិបត្តិសកលលោកទាំងមូលផងដែរ។
អគ្គលេខាធិការ NOCC រូបនេះបានបន្តថា៖ «ពាក់ព័ន្ធទៅនឹងការប្រមូលផ្តុំហ្វឹកហាត់ យើងបានស្នើសុំការអនុញ្ញាតជាគោលការណ៍ពីសម្តេចពិជ័យសេនា ទៀ បាញ់ ថានឹងចាប់ផ្តើមជាថ្មី នៅចុងឆ្នាំ ២០២០ តទៅ ឲ្យបានពេញលេញ ដោយការហ្វឹកហាត់បង្កើនគុណភាពបច្ចេកទេសដល់អត្តពលិកទាំងអស់ ព្រោះយើងនៅសល់ពេលមិនច្រើនទេ នឹងដល់ស៊ីហ្គេមឆ្នាំ ២០២៣ គឺយើងមិនអាចប្រហែសបាននោះទេ»។
លោក ចំរើន បានបន្ថែមថា៖ «បើស្ថានភាពល្អឡើងវិញ នៅក្នុងខែឧសភា ឬខែមិថុនា ឆ្នាំ ២០២០ នេះ គឺការប្រមូលផ្តុំហ្វឹកហាត់នឹងត្រូវបន្តចាប់ផ្តើមឲ្យមានលក្ខណៈទ្វេដង។ ជាមួយគ្នានេះ បើស្ថានភាពជាក់ស្តែងនៃជំងឺកូវីដ ១៩ នៅលើពិភពលោកមិនទាន់ស្ងប់ស្ងាត់ល្អនោះទេ យើងនឹងអញ្ជើញគ្រូជំនាញមកបង្វឹកផ្ទាល់ នៅក្នុងប្រទេសយើងតែម្តងដោយអនុវត្តតាមការណែនាំរបស់ក្រសួងសុខាភិបាល ក្នុងការរក្សាការពារអនាម័យឲ្យបានល្អ និងមានសុវត្ថិភាពខ្ពស់»។
បន្ថែមពីលើនេះ លោក វ៉ាត់ ចំរើន បានអះអាងថា៖ «កម្ពុជាកំពុងត្រៀមយុទ្ធសាស្ត្ររៀបចំស៊ីហ្គេម ឆ្នាំ ២០២៣ រួចរាល់ ដោយយើងត្រូវស្វែងយល់អំពីស្ថានភាពទូទៅ និងវិសាលភាពនៃផលប៉ះពាល់នៃជំងឺកូវីដ ១៩ នេះ ព្រោះយើងដឹងហើយថា ឆ្នាំ ២០២០ គឺជាឆ្នាំដែលកម្ពុជា ត្រូវបញ្ចូនអត្តពលិកជម្រើសជាតិចេញទៅហាត់នៅក្រៅប្រទេសច្រើន ប៉ុន្តែត្រូវខកខានវិញ»។
លោកបញ្ជាក់ថា៖ «ក្នុងស្ថានភាពនេះ អត្តពលិកជម្រើសជាតិទាំងអស់ត្រូវបានឈប់សម្រាក ប៉ុន្តែជាការសម្រាកសកម្ម ដែលនៅមានការហ្វឹកហាត់តាមផ្ទះ ព្រោះគោលដៅស៊ីហ្គេម ២០២៣ ត្រូវតែធ្វើលើស្មារតីទទួលខុសត្រូវ និងធ្វើឲ្យជោគជ័យ»។
នៅក្នុងមហាសន្និបាតរបស់ NOCC កាលពីដើមឆ្នាំ ២០២០ លោក ថោង ខុន ប្រធាន NOCC រួមទាំងស្ថាប័នពាក់ព័ន្ធកីឡា បានប្តេជ្ញាចិត្តខ្ពស់ថា ត្រូវតែរួមគ្នាធ្វើឲ្យទទួលបាននូវភាពជោគជ័យក្នុងគោលដៅយកចំណាត់ថា្នក់ ចន្លោះទី ៥ និងទី ៦ ក្នុងចំណោមប្រតិភូកីឡាទាំង ១១ ប្រទេស ដែលនឹងចូលរួមស៊ីហ្គេម ឆ្នាំ ២០២៣ នៅប្រទេស កម្ពុជា។
លោក ថោង ខុន បានបន្ថែមថា គណៈកម្មការជំនាញទាំង ១៥ របស់ CAMSOC មានពេលវេលា ធ្វើកិច្ចការនេះបាន ប៉ុន្តែស្ថានភាពកូវីដ ១៩ បានរំខាន។ ទោះបីជាយ៉ាងណា យើងនៅតែបន្តសាងសង់ពហុកីឡដ្ឋានជាតិមរតកតេជោយ៉ាងសកម្ម ហើយផែនការសាងសង់ភូមិកីឡា ក៏កំពុងតែដំណើរការ ដើម្បីទទួលប្រតិភូមកពីតំបន់អាស៊ាន ទៅតាមគម្រោងឲ្យបានជាក់លាក់៕