ភ្នំពេញ៖ គណៈកម្មាធិការជាតិរៀបចំការប្រកួតកីឡាស៊ីហ្គេម ឆ្នាំ ២០២៣ ហៅកាត់ថា CAMSOC បាននិងកំពុងរង់ចាំការបើកភ្លើងខៀវពីក្រសួងសុខាភិបាលក៏ដូចជារាជរដ្ឋាភិបាលកម្ពុជា ជុំវិញវិបត្តិនៃជំងឺឆ្លងកូវីដ ១៩ ដើម្បីឈានដល់ការបញ្ជូនកីឡាករ កីឡាការិនីជម្រើសជាតិកម្ពុជាជាង ១០០ នាក់ ចេញទៅហ្វឹកហាត់រយៈពេលវែង នៅប្រទេសចិន ទៅតាមគម្រោងចាស់ដែលមានស្រាប់។
លោក វ៉ាត់ ចំរើន អគ្គលេខាធិការគណៈកម្មាធិការ CAMSOC បានផ្តល់សម្ភាសជាមួយភ្នំពេញ ប៉ុស្តិ៍ ថា៖ «តាមស្ថានភាពជាក់ស្តែង ទំនងដូចជាធូរស្រាល ហើយគណៈកម្មាធិការជាតិ CAMSOC កំពុងរង់ចាំការបើកភ្លើងខៀវពីក្រសួងសុខាភិបាល ក៏ដូចរាជរដ្ឋាភិបាលសិន ដោយយើងបានតៀមផែនការចំនួន ២ លើក ដើម្បីបញ្ជូនអត្តពលិកជម្រើសជាតិជាង ១០០ នាក់ មកពី ១២ ប្រភេទកីឡាទៅហ្វឹកហាត់បំប៉ន នៅប្រទេសប្រជាមានិតចិន តាមកិច្ចព្រមព្រៀងចាស់កន្លងមក»។
គួរបញ្ជាក់ថា ការរីករាលដាលនៃជំងឺឆ្លងកូវីដ ១៩ បានធ្វើឲ្យសកម្មភាពកីឡា ដ៏ដូចវិស័យផ្សេងៗទៀតដែរ ត្រូវជាប់គាំង។ ជាមួយគ្នានេះ ផែនការយុទ្ធសាស្រ្តក្នុងការបញ្ជូនក្រុមជម្រើសជាតិទៅហ្វឹកហាត់នៅក្រៅប្រទេស ដើម្បីពង្រឹងគុណភាព ត្រៀមការប្រកួតស៊ីហ្គេម ឆ្នាំ ២០២៣ ក៏ត្រូវបានផ្អាករហូតមកដល់ពេលនេះ។ ប៉ុន្តែ CAMSOC ទើបតែបើកកិច្ចប្រជុំជាមួយតំណាងសហព័ន្ធកីឡាជាតិ កាលពីពេលថ្មីៗនេះ ដើម្បីកំណត់ពេលវេលា ក្នុងការបញ្ជូនក្រុមអត្តពលិកជម្រើសជាតិទៅហាត់ នៅប្រទេសចិន ឡើងវិញ។
លោក វ៉ាត់ ចំរើន បានបន្តថា៖ «តាមរយៈកិច្ចប្រជុំជាមួយសហព័ន្ធកីឡាជាតិចំនួន ១២ ស្តីពីគម្រោងបញ្ជូនកីឡាករ កីឡាការិនីទៅហ្វឹកហាត់នៅប្រទេសចិន រយៈពេលយូរ នៅទីស្នាក់ការគណៈកម្មាធិការជាតិអូឡាំពិកកម្ពុជាកន្លងមកនេះ យើងបានដាក់គម្រោងបណ្តោះអាសន្នទី១ ដោយយើងនឹងបញ្ជូនអត្តពលិកទៅហ្វឹកហាត់នៅប្រទេសចិន ដែលនឹងធ្វើឡើងនៅថ្ងៃទី ២២ ខែ វិច្ឆិកា ឆ្នាំ ២០២០»។
«ប៉ុន្តែបើករណីបញ្ហាមេរោគកូវីដ ១៩ ឬការអនុញ្ញាតពីក្រសួងសុខាភិបាល នៅតែមិនទាន់បានធូរស្រាលទេនោះ យើងនឹងអាចលើកពេលទៅគម្រោងផែនការទី២ ដោយយើងគ្រោងទៅនៅខែមីនា ឆ្នាំ ២០២១ វិញ ហើយក្រៅពីផែនការបណ្តុះបណ្តាល សម្រាប់ត្រៀមស៊ីហ្គេម ឆ្នាំ ២០២៣ នៅកម្ពុជានេះ យើងត្រូវត្រៀមក្នុងព្រឹត្តិការណ៍បន្ទាន់មួយទៀត ដើម្បីចូលរួមការប្រកួតកីឡាស៊ីហ្គេម លើកទី ៣១ ក្នុងឆ្នាំ ២០២១ នៅឯក្រុងហាណូយ ប្រទេសវៀតណាម»។
លោក វ៉ាត់ ចំរើន ដែលជាអគ្គលេខាធិការគណៈកម្មាធិការជាតិអូឡាំពិកកម្ពុជាផងនោះ បានប្រាប់បន្ថែមទៀតថា សម្រាប់ការធ្វើដំណើរទៅហ្វឹកហាត់នៅប្រទេសចិន គឺ CAMSOC ចេញថ្លៃសំបុត្រយន្តហោះ ចំណែកប្រាក់ហោប៉ៅឧបត្ថម្ភ CAMSOC នឹងធ្វើការពិភាក្សាជាមួយក្រសួងអប់រំ យុវជន និងកីឡា ដើម្បីរកដំណោះស្រាយ។
ប្រភពចេញពីក្រុមអត្តពលិកជម្រើសជាតិមួយចំនួនបានឲ្យដឹងថា បញ្ហាជំងឺកូវីដ ១៩ នេះ បានធ្វើឲ្យពួកគេខកខានការហ្វឹកហាត់ និងបានធ្វើឲ្យកម្រិតបច្ចេកទេសធ្លាក់ជាងមុន ដោយយើងហាត់តាមលក្ខណៈឯកជនរៀងៗខ្លួន ប៉ុន្តែនេះជាវិបត្តិសកលលោក អ៊ីចឹងគុណផលនៃការហ្វឹកហាត់របស់អត្តពលិកនៅប្រទេសគេ គឺអាចនឹងថយចុះដូចគ្នា៕