ក្រុងស៊ាងហៃ៖ លោក Fabio Cannavaro បាននិយាយថា ការដឹកនាំក្លិប Guangzhou Evergrande ឲ្យលើកពានលីកកំពូលប្រទេស ចិន គឺជា «រឿងអស្ចារ្យមួយ» និងផ្ដល់កម្លាំងចិត្តកាន់តែខ្លាំងដល់គាត់ក្នុងការរំពឹងថា នឹងបន្តតំណែងនេះជាបន្តទៀត។
ម្ចាស់ជើងឯក World Cup សញ្ជាតិអ៊ីតាលីអាយុ ៤៦ ឆ្នាំរូបនេះ ត្រូវបានបញ្ឈរជើងជាគ្រូបង្វឹកបណ្ដោះអាសន្ននៅខែតុលា ប៉ុន្តែបានវិលទៅដឹកនាំក្លិបដ៏ធំបំផុតនៅប្រទេស ចិន មួយនេះបានធ្វើជាម្ចាស់ជើងឯកកាលពីថ្ងៃអាទិត្យ។
នេះជាជ័យជម្នះដ៏សំខាន់លើកដំបូងរបស់អតីតខ្សែការពារក្លិប Juventus និងក្លិប Real Madrid រូបនេះក្នុងនាមជាគ្រូបង្វឹក និងជាជ័យជម្នះផ្ទាល់ខ្លួន ក្រោយពីគាត់បានជួបបញ្ហាដែលអាចធ្វើឲ្យរូបគាត់ស្ថិតនៅក្នុងគ្រោះថ្នាក់នៃការបណ្ដេញចេញពីតំណែង។
លោក Cannavaro បានប្រាប់កាសែត Guangzhou Daily ពីថ្ងៃអង្គារថា៖ «ខ្ញុំដឹងថា មានឈ្មោះគ្រូបង្វឹកជាច្រើនត្រូវបានត្រៀមដាក់ជំនួសខ្ញុំរួមទាំងលោក Jose Mourinho លោក Zinedine Zidane និងលោក Scolari ផងដែរ»។
គ្រូបង្វឹករូបនេះបាននិយាយថា៖ «សម្រាប់ក្រុមមួយដូចជាក្រុម Evergrande នេះ អ្នកគាំទ្រសង្ឃឹមថា នឹងមានគ្រូបង្វឹកឆ្នើមៗមកដឹកនាំដែល ពួកគេនឹងត្រូវប្រឈមនឹងសម្ពាធជាច្រើន»។
លោក Cannavaro បានបន្ថែមថា៖ «ខ្ញុំពិតជាមិនមែនជាគ្រូបង្វឹកអស្ចារ្យបំផុតនោះទេ ហើយវាមិនអាចធ្វើឲ្យគ្រប់គ្នាពេញចិត្តនោះទេ»។
ក្លិប Guangzhou នៅតែឈរនៅលើកំពូលតារាងនៃក្របខ័ណ្ឌលីកកំពូលចិនកាលពីចុងខែតុលា ប៉ុន្តែទម្រង់លេងមិនបានល្អបានធ្វើឲ្យពួកគេបញ្ឈរជើងគ្រូបង្វឹករូបនេះមួយរយៈពេលខ្លីសិនដោយដាក់ឲ្យប្រធានក្រុមជើងចាស់ Zheng Zhi ដឹកនាំបន្ត។
លោក Cannavaro បានវិលចូលដឹកនាំគួរឲ្យភ្ញាក់ផ្អើលវិញនៅដើមខែវិច្ឆិកា ក្រោយពីក្លិបបានណែនាំប្រាប់គាត់កុំឲ្យមានកំហុសឆ្គងតទៀត។
ក្លិប Guangzhou បានបន្តឈ្នះ ៣ ប្រកួតបន្តទៀត និងបានឈ្នះពានលើកទី ៨ របស់ខ្លួនក្នុងរយៈពេល ៩ ឆ្នាំ ជាមួយជ័យជម្នះ ៣-០ ទៅលើក្រុម Shanghai Shenhua កាលពីចុងសប្ដាហ៍មកនេះ។
លោក Cannavaro បាននិយាយពីការដែលត្រូវបានគេបញ្ឈរជើងនៅពេលនោះថា៖ «ខ្ញុំដឹងច្បាស់ថា ពិភពខាងក្រៅបានបញ្ចេញមតិយោបល់ពីបញ្ហានេះផ្សេងៗគ្នា»។
គ្រូបង្វឹករូបនេះបានបន្ថែមទៀតថា គាត់មានអាទិភាពមួយចំនួនសម្រាប់រដូវកាលបន្ទាប់ទៀត ដោយអះអាងថា គាត់រំពឹងថានឹងនៅតែបានបន្តដឹកនាំក្លិប Guangzhou នេះជាបន្តទៀត៕ AFP/SN