.jpg)
កីឡាករ Iker Casillas អតីតប្រធានក្រុមពេលអេស្ប៉ាញ។ រូបថត AFP
ក្រុងម៉ា្រឌីដ៖ អតីតប្រធានក្រុមពេលអេស្ប៉ាញឈ្នះពាន World Cup គឺកីឡាករ Iker Casillas បានប្រកាសកាលពីថ្ងៃចន្ទថា ខ្លួនបានបញ្ឈប់ការប៉ុនប៉ងក្នុងការឈរឈ្មោះជាបេក្ខភាពប្រកួតប្រជែងតំណែងប្រធានសហព័ន្ធបាល់ទាត់នៃអេស្ប៉ាញ (RFEF) ហើយ ដោយសារវិបត្តិដែលបណ្ដាលពីការរាតត្បាតវីរុសកូរ៉ូណា។
អ្នកចាំទីក្រុម Porto រូបនេះ សរសេរនៅលើបណ្តាញសង្គមថា៖ «ខ្ញុំសូមជូនដំណឹងដល់អ្នកទាំងអស់គ្នាថា ខ្ញុំបានសម្រេចចិត្តមិនចូលរួមឈរឈ្មោះសម្រាប់ការបោះឆ្នោត RFEF នាពេលខាងមុខនេះទេ»។
អតីតកីឡាកររបស់ក្រុមអធិរាជស Real Madrid វ័យ ៣៩ ឆ្នាំរូបនេះនិយាយថា បានដកខ្លួនពីការប្រជែងយកតំណែងកំពូលនៅក្នុងវិស័យបាល់ទាត់អេស្ប៉ាញ ដោយសារស្ថានភាពសង្គម សេដ្ឋកិច្ច និងសុខភាពដែលប្រទេសកំពុងទទួលរង»។
កីឡាករ Casillas និយាយថា ការផ្ទុះឡើងនូវជំងឺកូវីដ ១៩ ដែលគេអះអាងថា មានជនរងគ្រោះជាង ២៧ ០០០ នាក់ ក្នុងប្រទេសនោះបានយកការបោះឆ្នោតជារឿងសំខាន់ទី២ វិញ។
កីឡាករ Casillas ដែលបានជួយឲ្យក្រុមជម្រើសជាតិគោជល់អេស្ប៉ាញឈ្នះពានពិភពលោកលើកដំបូង ឆ្នាំ ២០១០ ប្រកាសពីគោលបំណងឈរឈ្មោះប្រជែងជាមួយប្រធាន RFEF បច្ចុប្បន្ន គឺលោក Luis Rubiales ក្នុងខែកុម្ភៈ ហើយការដកខ្លួននេះ ឥឡូវនេះបានទុកផ្លូវយ៉ាងទូលាយឲ្យលោក Rubiales បានកាន់តំណែងអាណត្តិទី២ សម្រាប់ការបោះឆ្នោតដែលគ្រោងនឹងធ្វើឡើងនៅថ្ងៃទី ១៧ ខែសីហា នាពេលខាងមុខនេះ។
មុនពេលធ្វើដំណើរទៅចូលរួមជាមួយក្រុម Porto នៅប្រទេសព័រទុយហ្គាល់ កីឡាករ Casillas ធ្លាប់បង្ហាញខ្លួនក្នុងនាមជាអ្នកឈរចាំបង្គោលទីឲ្យក្រុមអេស្ប៉ាញ ១៦៧ ប្រកួត ក្នុងនោះក្រៅពីឈ្នះពានពិភពលោកម្ដងក៏នៅមានពានរបស់តំបន់អឺរ៉ុប ២ ដងដែរ ក្នុងឆ្នាំ ២០០៨ និងឆ្នាំ ២០១២ (Euros 2008 & 2012) រីឯជាមួយក្រុម Real លេងបានរហូតដល់ទៅជាង ៧០០ ប្រកួត ជាមួយនឹងការឈ្នះពានរង្វាន់លីកលំដាប់កំពូល La Liga ចំនួន ៥ ដង និងពាន Champions League ចំនួន ៣ ដង៕ AFP/VN
