ឡុងដ៍៖ ក្រុម Manchester United ឆក់បានខ្សែប្រយុទ្ធ Edinson Cavani ដែលជាម្នាក់ក្នុងចំណោមកីឡាករចំណូលថ្មី ៤ នាក់ កាលពីថ្ងៃចន្ទ ខណៈក្រុម Arsenal បញ្ចប់នូវកិច្ចព្រមព្រៀងដ៏ធំ ១ នៅថ្ងៃបិទទីផ្សារដោះដូរកីឡាករដោយការនាំយក Thomas Partey ពីក្រុម Atletico Madrid។
ក្រុម Man United កំពុងស្ថិតក្រោមក្រសែភ្នែករបស់គ្រប់គ្នា ក្រោយលេងចាញ់ក្រុម Tottenham យ៉ាងអាម៉ាស់ ៦-១ នៅទឹកដីខ្លួនឯង អំឡុងការប្រកួតនៃក្របខ័ណ្ឌ Premier League កាលពីថ្ងៃអាទិត្យ។
ខ្សែបម្រើហូឡង់ Donny van de Beek តែម្នាក់ប៉ុណ្ណោះ ដែលត្រូវបានបន្ថែមក្នុងក្រុមរបស់លោកគ្រូបង្វឹក Ole Gunnar Solskjaer មុនមានការមកដល់របស់កីឡាករទាំង ៤ រូប ដូចជា Cavani, Alex Telles, Amad Diallo និង Facundo Pellistri កាលពីថ្ងៃចន្ទ។
កីឡាករគួរឱ្យចាប់អារម្មណ៍ជាងគេ Cavani វ័យ ៣៣ ឆ្នាំ ដែលមិនទាន់មានក្លិបលេងនៅឡើយតាំងពីផុតកុងត្រាជាមួយ Paris Saint-Germain កាលពីខែមិថុនា បានកាន់ប៊ិចចុះហត្ថលេខាព្រមព្រៀងពាក់ឯកសណ្ឋានរបស់ក្រុមយក្សអង់គ្លេសរយៈពេល ១ ឆ្នាំ អមដោយជម្រើសបន្ត ១ រដូវកាលទៀត។
កីឡាករសញ្ជាតិអ៊ុយរូហ្គាយរកបាន ២០០ គ្រាប់ ក្នុងរយៈពេល ៧ រដូវកាល អំឡុងពេលប្រកបអាជីពនៅរដ្ឋធានីនៃប្រទេសបារាំង ហើយធ្វើឱ្យគេក្លាយជាអ្នករកគ្រាប់បាល់បានច្រើនជាងគេបំផុត ក្នុងកំណត់ត្រារបស់ក្លិប PSG។
Cavani បាននិយាយថា៖ «Manchester United គឺជាក្រុមកំពូល ១ ក្នុងលោក ដូច្នេះវាពិតជាកិត្តិយសណាស់ ដែលបានមកដល់ទីនេះ។ ខ្ញុំពិតជាប្រឹងប្រែងហ្វឹកហាត់ណាស់ ពេលអត់ទាន់មានក្លិបលេង ហើយខ្ញុំមានអារម្មណ៍អន្ទះសាចង់ប្រកួតប្រជែង និងបង្ហាញខ្លួនជាមួយក្លិបដ៏អស្ចារ្យនេះ»។
លើសពីនេះទៀត ការមកដល់របស់ខ្សែការពារឆ្វេង Telles ដែលចាកចេញពីក្រុម Porto ក្នុងតម្លៃ ១៣,៥ លានផោន ($១៩ លាន) គឺពិតជាសំខាន់មិនអាចប្រកែកបាន ដោយសារមកជួយបន្ថែមជម្រើសឱ្យក្រុមបិសាចក្រហមនៅតំបន់ការពារ ដែលរបូតដល់ទៅ ១១ គ្រាប់ ក្នុងចំណោមការប្រកួត ៣ លើកដំបូងនៅលីគកំពូល។
លោក Solskjaer និយាយដល់កីឡាករសញ្ជាតិប្រេស៊ីលថា៖ «គេជាកីឡាករ ដែលយើងតាមមើលមួយរយៈហើយ ហើយទម្រង់លេងរបស់គេ គឺច្បាស់ណាស់ ពិតជាអ្វីដែលយើងកំពុងតាមរក។ គេនឹងបញ្ចូលការប្ដេជ្ញាចិត្ត និងបន្ថែមការប្រកួតប្រជែងពិតប្រាកដទៅក្នុងក្លិបរបស់យើងជាមិនខាន»។
ក្រោយបរាជ័យក្នុងការផ្ទេរយកខ្សែបម្រើស្លាប Jadon Sancho របស់ក្រុម Borussia Dortmund ក្រុម Man Utd ទិញបានខ្សែបម្រើស្លាបសញ្ជាតិអ៊ុយរូហ្គាយដ៏មានទេពកោសល្យ ២ រូប វ័យ ១៨ ឆ្នាំដូចគ្នា គឺ Pellistri ពីក្រុម Penarol និង Diallo របស់ក្រុម Atalanta ដែលនឹងមកកាន់ក្លិបនៅខែមករា ក្នុងតម្លៃដែលដឹង ៤១ លានអឺរ៉ូ ($៤៨ លាន)។
ចំណែក Arsenal ចុងក្រោយក៏ទិញបានកីឡាករ Partey ដែលខ្លួនចង់បានមកជាយូរហើយ ជាមួយនឹងតម្លៃ ៥០ លានអឺរ៉ូ ($៥៩ លាន) ហើយសង្ឃឹមថា កីឡាករអន្តរជាតិហ្គាណា វ័យ ២៧ ឆ្នាំ នឹងមកបំពេញចន្លោះខ្វះខាតនៅតំបន់កណ្ដាលឱ្យមានភាពរឹងមាំឡើងវិញ។
អ្នកចាត់ការរបស់ក្រុមកាំភ្លើងធំលោក Mikel Arteta បាននិយាយចំពោះការមកដល់របស់ Partey ថា៖ «យើងតាមសង្កេតមើល Thomas (Partey) មួយរយៈហើយ ដូច្នេះពេលនេះ យើងសប្បាយចិត្ត ដែលបានបន្ថែមកីឡាករដ៏មានគុណភាពខ្ពស់បែបនេះ ១ រូប ចូលទៅក្នុងក្រុមរបស់យើង។ គេគឺជាខ្សែបម្រើដ៏មានថាមពលខ្លាំងក្លាបំផុត ១ រូប»៕ AFP/VN