.jpg)
កីឡាករ Edison Cavani កាលនៅលេងអោយក្រុម PSG។ រូបថត AFP
ឡុងដ៍៖ ក្រុមបិសាចក្រហម Manchester United ត្រូវបានគេរាយការណ៍ថា ដើម្បីធ្វើឱ្យតំបន់ប្រយុទ្ធរបស់គ្រូបង្វឹកលោក Ole Gunnar Solskjaer ឱ្យកាន់តែមុតស្រួច ក្លិបបានសម្រេចទិញយកកីឡាករ Edison Cavani ដែលពេលនេះអត់មានក្លិបលេង។ នេះបើតាមសេចក្ដីរាយការណ៍ពីបណ្ដាញសារព័ត៌មានរបស់ប្រទេសអង់គ្លេស និងបារាំង កាលពីថ្ងៃសៅរ៍។
ខ្សែប្រយុទ្ធអន្តរជាតិអ៊ុយរូហ្គាយ អត់ទាន់ព្រមព្រៀងពាក់ឯកសណ្ឋានក្រុមណានៅឡើយទេ ចាប់តាំងពីផុតកុងត្រាជាមួយក្លិបអ្នកមាននៅបារាំង Paris Saint-Germain (PSG) ចុងខែមិថុនា ខណៈកីឡាករវ័យ ៣៣ ឆ្នាំ បញ្ចប់អាជីពរបស់ខ្លួននៅទឹកដី Parc des Princes រយៈពេល ៧ រដូវកាល ក្នុងនាមជាអ្នករកគ្រាប់បាល់បានច្រើនជាងគេ ក្នុងកំណត់ត្រាជាមួយនឹងចំនួន ២០០ គ្រាប់។
សារព័ត៌មាន Daily Mail នៅអង់គ្លេសរាយការណ៍ថា កីឡាករ Cavani នឹងចុះហត្ថលេខាលេងនៅទឹកដី Old Trafford រយៈពេល ២ ឆ្នាំ ដោយការទទួលបានថ្លៃនឿយហត់ ២១០ ០០០ ផោន ($២៧០ ០០០) ក្នុង ១ សប្ដាហ៍ ក្រោយកាត់ពន្ធហើយ។
ក្នុងនាមជាកីឡាករគ្មានកុងត្រា Cavani នៅមានសិទ្ធិចុះហត្ថលេខាដោយសេរីជាមួយក្លិបថ្មី បើទោះទីផ្សារដោះដូរកីឡាករបិទក៏ដោយ តែសារព័ត៌មាននៅបារាំងធ្វើការផ្សព្វផ្សាយថា កិច្ចសន្យានឹងត្រូវបញ្ចប់ទាំងស្រុងមុនពេលកំណត់បិទនៃទីផ្សារដោះដូរនាថ្ងៃចន្ទនេះ។
ប្រសិនគ្រប់យ៉ាងកើតឡើងផ្លូវការប្រាកដមែន នោះកីឡាករ Cavani អាចធ្វើការបង្ហាញខ្លួនលើកដំបូងលេងទល់នឹងអតីតក្លិបរបស់ខ្លួន ពេលក្រុម Man United បើកយុទ្ធនាការប្រកួតប្រជែងនៅក្របខ័ណ្ឌអឺរ៉ុប ដោយការធ្វើដំណើរទៅសួរសុខទុក្ខក្រុម PSG នាថ្ងៃទី ២០ ខែតុលា។
ក្រុមយក្សអង់គ្លេស ត្រូវបានអ្នកគាំទ្រធ្វើការរិះគន់ចំពោះការមិនមានសកម្មភាពខ្លាំងក្លាក្នុងការទិញកីឡាករអំឡុងពេលទីផ្សារបើក ដោយមកទល់ពេលនេះ មានតែខ្សែបម្រើសញ្ជាតិហូឡង់ Donny van de Beek ១ រូបប៉ុណ្ណោះ ដែលក្រុមបិសាចក្រហមផ្ទេរបានក្នុងនោះក្លិបបានបដិសេធមិនបំពេញតាមតម្លៃ ដែលក្លិបនៅអាល្លឺម៉ង់ Borussia Dortmund ទាមទារសម្រាប់ Jadon Sancho៕ AFP/VN
