.jpg)
កីឡាករ Oliveira (ឆ្វេង)របស់ក្រុម Tokyo និងកីឡាករ Mrcela របស់ក្រុម Perth ប្រជែងយកបាល់ពីគ្នា។ AFP
ក្រុងគូឡាឡាំពួ៖ ក្របខ័ណ្ឌ Champions League របស់អាស៊ីកំពុងកៀកៗនឹងការត្រឡប់មកវិញហើយ តែនឹងត្រូវរង់ចាំការប្រកួតប្រជែងក្នុងស្រុកចាប់ផ្ដើមមានសកម្មភាពវិញសិន។ នេះបើតាមមន្ត្រីបាល់ទាត់ជាន់ខ្ពស់ម្នាក់និយាយប្រាប់ AFP កាលពីថ្ងៃពុធ។
វិស័យកីឡាបាល់ទាត់កំពុងចាប់ផ្ដើមឡើងសន្សឹមៗ នៅជុំវិញពិភពលោក ក្រោយត្រូវបានផ្អាកដំណើរការ ដោយសារវីរុសកូរ៉ូណា ទោះបីជាលីកអាជីពភាគច្រើន នៅមិនទាន់ចាប់ផ្ដើមកើតមានឡើងវិញក៏ដោយ។
អគ្គលេខាធិការសហព័ន្ធកីឡាបាល់ទាត់អាស៊ី (AFC) លោក Windsor John បានថ្លែងថា៖ «យើងខិតកៀកនឹងការវិលមកវិញនៃវិស័យបាល់ទាត់ហើយ»។ ពេលត្រូវបានសួរអំពីការចាប់ផ្ដើមវិញ ការប្រកួតនៃក្លិបរបស់ AFC លោកអគ្គលេខារូបនេះ បានបន្ថែមថា៖ «យើងត្រូវរង់ចាំឲ្យលីកអាជីពក្នុងស្រុកទាំងអស់ចាប់ដំណើរការជាមុនសិន»។
ការប្រកួតពានរង្វាន់ AFC Champions League ដែលជាការប្រកួតក្លិបកម្រិតខ្ពស់ៗ នៅអាស៊ី និងពានរង្វាន់លំដាប់ទី ២ AFC Cup គឺកម្មវិធីទាំង ២ ត្រូវបានគាំងដំណើរចាប់តាំងពីខែមីនា រួមទាំងការប្រកួតសម្រាប់វគ្គជម្រុះបាល់ទាត់ពិភពលោក និងអូឡាំពិកផងដែរ។ ក្នុងចំណោមប្រទេសទាំង ១២ ដែលបានលេងក្នុងក្របខ័ណ្ឌ Champions League មានតែលីករបស់ប្រទេសកូរ៉េខាងត្បូង ទេ ដែលបានធ្វើសកម្មភាពឡើងវិញ ខណៈមានប្រទេស ៤ ទៀត ប្រុងនឹងចាប់ផ្តើមឡើងវិញ នៅខែមិថុនា ឬកក្កដា ហើយប្រទេសថៃ គ្រោងនឹងធ្វើនៅខែកញ្ញា។
ពាក់ព័ន្ធនឹងបញ្ហានេះ លោក John គ្រាន់តែប្រាប់ថា AFC កំពុងពិភាក្សាពីពេលវេលាដែលការប្រកួតប្រជែងនឹងចាប់ផ្ដើមឡើងវិញ ដោយមិនព្រមបង្ហើបពីកាលបរិច្ឆេទ ដែលអាចនឹងមានឲ្យដឹងនោះឡើយ ប៉ុន្តែបើតាមការប៉ាន់ស្មានពេលវេលានៃការប្រកួតនឹងមានលក្ខណៈមមាញឹកជាពិសេសក្រុមទាំង ៣២ នៅ Champions League ត្រូវប្រកួតឲ្យចប់ ៤ ជុំ ក្នុងវគ្គសន្សំពិន្ទុតាមពូល មុននឹងដល់វគ្គចាញ់ធ្លាក់ (knock-out)។ តាមកាលបរិច្ឆេទដើមវគ្គផ្ដាច់ព្រ័ត្រទាំង Champions League និង AFC Cup គ្រោងធ្វើក្នុងខែវិច្ឆិកា។
ពេលត្រូវសួរថា បើមានសំណើណាមួយសុំឲ្យកែប្រែពីរបៀបលេង ក្នុងផ្ទះ និងក្រៅផ្ទះ សម្រាប់ការប្រកួតនេះ ដើម្បីចៀសវាងការឆ្លងជំងឺ លោក John និយាយថា កំពុងពិភាក្សា។ លោកអគ្គលេខាធិការរូបនេះប្រាប់ថា៖ «យើងដឹងថា អ្នកពាក់ព័ន្ធទាំងអស់រួមមានអ្នកគាំទ្រ និងអ្នកឧបត្ថម្ភកំពុងចង់ឲ្យការប្រកួតរបស់ AFC ចាប់ផ្ដើមវិញ»។
លោក John បន្តថា៖ «កីឡាករត្រូវបានជំរុញឲ្យត្រឡប់មកទីលានវិញ ដើម្បីឲ្យអ្នកគាំទ្ររីករាយ និងរំភើបចិត្ត។ តែដូច AFC ប្រាប់ដដែលៗ តាំងពីមានការរាតត្បាតនៅថ្ងៃដំបូងថា សុខភាព និងសុខុមាលភាពគ្រប់គ្នា នៅតែជាអាទិភាពចម្បងរបស់យើងពិតប្រាកដ»៕ AFP/VN
