ក្រុងមេនឆេស្ទ័រ៖ សហព័ន្ធបាល់ទាត់អឺរ៉ុប UEFA ត្រៀមបញ្ចប់ការប្រកួតប្រជែងនៅក្របខ័ណ្ឌ Champions League ក្នុងវគ្គ ៨ ក្រុមចុងក្រោយនៅក្រុងលីសបោន ប្រទេសព័រទុយហ្គាល់ ដោយប្រើពេលតែ ១០ ថ្ងៃ។ នេះបើតាមផែនការដែលនឹងត្រៀមដាក់បង្ហាញដល់គណៈកម្មាធិការប្រតិបត្តិរបស់ខ្លួន ដើម្បីអនុម័តនៅថ្ងៃពុធនេះ។
តាមប្រភពព័ត៌មានពីការពិភាក្សារវាងក្លិប និងស្ថាប័នគ្រប់គ្រងបាល់ទាត់អឺរ៉ុបនេះ បានប្រាប់ប្រព័ន្ធផ្សព្វផ្សាយព័ត៌មានថា ការស្នើនេះ រំពឹងថានឹងទទួលបានការយល់ព្រម ក្រោយពីមានមតិឯកភាពរួមមួយ ត្រូវបានកំណត់ឡើងកាលពីថ្ងៃចន្ទ តែខាង UEFA មិនទាន់ធ្វើការបកស្រាយលម្អិតភ្លាមៗ ឆ្លើយតបចំពោះដំណឹងនេះនៅឡើយទេ។
តាមការគ្រោងទុកការប្រកួត ដែលត្រូវបានផ្អាកកាលពីខែមីនា ដោយសារការរាតត្បាតពីវីរុសកូរ៉ូណានឹងចាប់ផ្ដើមជាមួយនឹងការប្រកួតជើងទី២ ដែលមិនទាន់ចប់ ក្នុងវគ្គ ១៦ ក្រុមចុងក្រោយ ដែលត្រូវលេងតាមទីលានកំណត់ទុកហើយ។ ផែនការដែលស្នើឡើងនេះ គឺការប្រកួតវគ្គ ៨ ក្រុម ត្រូវធ្វើតែ ១ ជើងគត់ នៅក្រុងលីសបោន ដោយត្រូវលេង ៤ ថ្ងៃជាប់ៗគ្នា គឺពីថ្ងៃទី ១២ ដល់ថ្ងៃទី ១៥ ខណៈវគ្គពាក់កណ្ដាលផ្ដាច់ព្រ័ត្រនឹងកើតមានពីថ្ងៃទី ១៨ ដល់ថ្ងៃទី ១៩ ហើយវគ្គផ្ដាច់ព្រ័ត្រ ប្រកួតនៅថ្ងៃទី ២៣ ខែសីហា នាទីក្រុងដដែលនេះ។
គម្រោងនេះ ធ្វើឲ្យការប្រកួតនៃរដូវកាលនេះចប់លឿនជាងរាល់ដង ដែលតាមទម្លាប់តែងតែលេង ២ជើង តាមរូបមន្តក្នុងទឹកដី និងក្រៅទឹកដី តែការធ្វើបែបនេះ មានន័យថា ការប្រកួតនឹងមានតិចជាងមុន ៦ លើក ដែលនឹងនាំឲ្យ UEFA ខាតបង់ចំណូលពីការផ្សាយបន្តផ្ទាល់។ កីឡដ្ឋានធំៗ ក្នុងក្រុងលីសបោន ចំនួន ២ ដែលគ្រោងយកប្រើប្រាស់សម្រាប់ព្រឹត្តិការណ៍នេះ គឺកីឡដ្ឋាន Estadio da Luz របស់ក្រុម Benfica និង Jose Alvalade របស់ក្រុម Sporting Lisbon។
ក្រុមអ្នករៀបចំ កំពុងតែដំណើរការដោយផ្អែកតាមគោលការណ៍ដែលការប្រកួត នឹងត្រូវធ្វើឡើងដោយបិទទ្វារកីឡដ្ឋាន តែ UEFA ព្រមព្រៀងទុកផ្លូវសម្រាប់ការកែប្រែទាំងឡាយ ដែលនឹងអាចកើតមាន បើសិនលក្ខខណ្ឌសុខភាពសាធារណៈនៃប្រទេសព័រទុយហ្គាល់ អំណោយផល។ រូបមន្តស្រដៀងគ្នានេះ ក៏នឹងយកទៅអនុវត្តសម្រាប់ប្រើប្រាស់សម្រេចការប្រកួតក្របខ័ណ្ឌទី ២ Europa League ផងដែរ ដែលនឹងធ្វើនៅឯទឹកដីនាប្រទេសអាល្លឺម៉ង់ ចាប់ពីថ្ងៃទី ១០ ខែសីហា តទៅ។
ដំបូងឡើយការប្រកួតវគ្គផ្ដាច់ព្រ័ត្រនៅតំបន់អឺរ៉ុបនេះ គឺ Champions League ត្រូវលេងនៅទីក្រុងអ៊ីស្តង់ប៊ុល ប្រទេសតួកគី រីឯ Europa League ធ្វើនៅក្រុង Gdansk ប្រទេសប៉ូឡូញ។ ពាក់ព័ន្ធនឹងព័ត៌មាននៃផែនការប្ដូរទីលានការប្រកួតវគ្គផ្ដាច់ព្រ័ត្រចេញពីក្រុងរបស់ខ្លួន រដ្ឋមន្ត្រីកីឡាប្រទេសតួកគី លោក Mehmet Kasapoglu បង្ហាញនូវទំនុកចិត្ត ដែលជឿថា ក្រុងរបស់លោកនៅតែមានសង្ឃឹមខ្ពស់រៀបចំព្រឹត្តិការណ៍នេះ។
«យើងមិនមានការសង្ស័យអ្វីទាំងអស់ ដែលការប្រកួតនឹងកើតឡើង ក្នុងកាលៈទេសៈដ៏ល្អបំផុត នៅប្រទេសតួកគី។ យើងនៅតែមានទំនុកចិត្តថា យើងនឹងទទួលបានដំណឹងល្អ នៅថ្ងៃទី ១៧ ខែមិថុនា នេះ»។ នេះជាប្រសាសន៍របស់លោក Kasapoglu៕ AFP/VN