.jpg)
លោក Cocu ចាប់ដៃជាមួយអតីតកីឡាកររបស់ក្រុមជម្រើសជាតិអង់គ្លេស Wayne Rooney នាពេលកន្លងមក។ រូបថត AFP
ឡុងដ៍៖ អ្នកចាត់ការក្រុម Derby County សម្រេចចាកចេញពីក្រុមដែលកំពុងតែយ៉ាប់យ៊ឺន នៅក្របខ័ណ្ឌ Championship នេះហើយ ដោយមានការព្រមព្រៀងទាំងសងខាងកាលពីថ្ងៃសៅរ៍ ហើយអតីតកីឡាកររបស់ក្រុមជម្រើសជាតិអង់គ្លេស Wayne Rooney ដែលជាគ្រូបង្ហាត់ក្នុងក្រុម ១ រូបដែរនោះ នឹងមកបំពេញតួនាទីនេះបណ្ដោះអាសន្ន។
លោក Cocu ដែលជាអតីតកីឡាកររបស់ក្រុមជម្រើសជាតិហូឡង់ និងក្រុម Barcelona ចូលមកកាន់តំណែងជាគ្រូបង្វឹកក្នុងក្រុម Derby ឆ្នាំមុន ក្រោយលោក Frank Lampard ផ្លាស់ទៅដឹកនាំក្រុម Chelsea។
បុរសវ័យ ៥០ ឆ្នាំ មិនអាចបំពេញតាមមហិច្ឆតារបស់ក្រុម ដែលចង់ឡើងទៅកាន់លីគកំពូលបានឡើយ ដោយជួយឱ្យបញ្ចប់នៅចំណាត់ទី១០ នៅលីគកម្រិតទី២ របស់អង់គ្លេស កាលពីរដូវកាលមុន មុននឹងធ្លាក់ដល់បាត់តារាងនៃដើមរដូវកាលនេះ ដោយការឈ្នះបានតែ ១ លើកប៉ុណ្ណោះ ក្នុងចំណោមប្រកួតទាំង ១១ លើក កន្លងមក ដូច្នេះសម្ពាធមានកាន់តែខ្លាំងឡើងៗចំពោះលោក Cocu។
ប្រកួតចុងក្រោយនៅផ្ទះខ្លួនឯង ដែលក្រុមរបស់លោកចាញ់ក្រុម Barnsley លោក Cocu អវត្តមាន ដោយសារត្រូវនៅដាច់ដោយឡែកពីអ្នកដទៃ ក្រោយលោកមានទំនាក់ទំនងដោយផ្ទាល់ជាមួយនាយកប្រតិបត្តិក្រុម Derby លោក Stephen Pearce ដែលធ្វើតេស្តវិជ្ជមានវីរុសកូរ៉ូណា។
សម្រាប់អតីតប្រធានក្រុមអង់គ្លេស Rooney បានចូលរួមជាមួយក្រុម Derby ក្នុងខែមករា ខណៈកីឡាករវ័យ ៣៥ ឆ្នាំ កំពុងសម្លឹងមើលពីលទ្ធភាព ក្នុងការឈានជើងចូលកាន់តួនាទីជាគ្រូបង្វឹកលើកដំបូង ស្របពេលបន្តការលេងបាល់ក្នុងនាមជាកីឡាករផងដែរ។
ក្រោយមានការចាកចេញរបស់លោក Cocu នេះ បានធ្វើឱ្យមានការលើកឡើងថា អតីតខ្សែប្រយុទ្ធរបស់ក្រុមបិសាចក្រហម Manchester United ឥឡូវនេះ អាចត្រៀមខ្លួនធ្វើជាអ្នកចាត់ការបានហើយ។
លោក Cocu តាមរយៈបណ្ដាញសង្គម Instagram របស់ខ្លួន បានរៀបរាប់ថា៖ «ខ្ញុំសូមឆ្លៀតឱកាសនេះ ធ្វើការអរគុណដល់គ្រប់គ្នាក្នុងក្លិប មានដូចជាក្រុមប្រឹក្សា បុគ្គលិក និងកីឡាករទាំងអស់ សម្រាប់ការគាំទ្រដ៏ល្អរបស់ពួកគេចំពោះរូបខ្ញុំ តាំងពីខ្ញុំបានទៅដល់ទឹកដី Pride Park»៕ AFP/VN
