.jpg)
ក្រុងឡូសអេនជឺលេស៖ ម្ចាស់ជើងឯករត់ប្រណាំងពិភពលោកចម្ងាយ ១០០ ម៉ែត្រ កីឡាករ Christian Coleman កំពុងប្រឈមនឹងការពិន័យរយៈពេល ២ ឆ្នាំ ក្រោយពីមានការបង្ហាញកាលពីថ្ងៃអង្គារថា រូបគេបានខកខានទៅធ្វើតេស្តរកសារធាតុញៀនកាលពីខែធ្នូ ឆ្នាំទៅ។
អត្តពលិកសញ្ជាតិអាមេរិក ដែលបានគេចផុតពីការពិន័យយ៉ាងលំបាកកាលពីឆ្នាំមុន ក្រោយមានការល្មើសលើច្បាប់ប្រឆាំងសារធាតុប៉ូវកម្លាំង ៣ ករណី ចន្លោះពីឆ្នាំ ២០១៨ ដល់ ២០១៩ បង្ហាញពីព័ត៌មានលម្អិតពីការខកខាននៃការធ្វើតេស្តលើកចុងក្រោយក្នុងសេចក្ដីប្រកាសមួយតាមរយៈគណនី Twitter របស់ខ្លួន។
កីឡាករ Coleman វ័យ ២៤ ឆ្នាំរូបនេះបាននិយាយថា ខ្លួនបានតទល់មិនជោគជ័យជាមួយស្ថាប័នសុចរិតភាពអត្តពលិក (AIU) ដែលរកឃើញថា រូបគេមិនបានទៅធ្វើតេស្តកាលពីថ្ងៃទី ៩ ខែធ្នូ ឆ្នាំ ២០១៩។ ក្នុងសេចក្ដីប្រកាសនោះ កីឡាករ Coleman បានប្រាប់ថា៖ «ឥឡូវនេះ នេះប្រហែលនាំឲ្យមានការពិន័យលើរូបខ្ញុំ ដែលវាកើតឡើងកាលពីឆ្នាំមុន»។
ប្រសិនបើករណីខកខានការធ្វើតេស្តនេះ ត្រូវបានអះអាងថាពិតប្រាកដ Coleman នឹងប្រឈមនឹងការពិន័យរហូតដល់ទៅ ២ ឆ្នាំ ក្នុងនោះរួមទាំងព្រឹត្តិការណ៍អូឡាំពិកនៅក្រុងតូក្យូ ប្រទេសជប៉ុន ឆ្នាំក្រោយផងដែរ។ មុនការប្រកួតប្រជែងជើងឯកពិភពលោកកាលពីខែកញ្ញា នាក្រុងដូហា ប្រទេសកាតា កីឡាករដែលក្លាយជាអត្តពលិករត់ប្រណាំងអាជីពក្នុងឆ្នាំ ២០១៧ រូបនេះ ប៊ិះនឹងត្រូវជាប់ពិន័យផងដែរ។
បទល្មើសចំនួន ៣ ដង ដែលកីឡាករ Coleman គេចផុត ហើយត្រូវបានកត់ត្រាទុកនោះ គឺលើកទី ១ ថ្ងៃទី ៦ ខែមិថុនា ឆ្នាំ ២០១៩, លើកទី២ ថ្ងៃទី ១៦ ខែមករា ឆ្នាំ ២០១៩ និងលើកទី៣ ថ្ងៃទី ២៦ ខែមេសា ឆ្នាំ ២០១៩៕ AFP/VN
