អាមេរិក៖ សមាគមបាល់បោះជាតិ (NBA) នៅអាមេរិកបាននិយាយពីថ្ងៃអង្គារថា កីឡាករឆ្នើម John Collins នៅក្លិបបាល់បោះ Atlanta Hawks ត្រូវបានព្យួរ ២៥ ប្រកួត បន្ទាប់ពីត្រូវបានធ្វើតេស្តវិជ្ជមានពាក់ព័ន្ធនឹងការប្រើសារធាតុលើកកម្លាំងនៅក្នុងអាហាររបស់គេ។
NBA បាននិយាយក្នុងរបាយការណ៍ថា ខ្សែប្រយុទ្ធបាល់បោះវ័យ ២២ ឆ្នាំរូបនេះ ត្រូវបានរកឃើញថា រូបគេមានការពាក់ព័ន្ធនឹងការប្រើសារធាតុលើកកម្លាំងម្យ៉ាងឈ្មោះ GHRP-2 នៅក្នុងខ្លួនរបស់គាត់។
ការព្យួរសិទ្ធិនេះ មានប្រសិទ្ធភាពភ្លាមៗមានន័យថា កីឡាករ Collins នឹងអវត្តមានការប្រកួតរវាងក្រុម Atlanta និងក្រុម San Antonio Spurs នៅយប់ថ្ងៃអង្គារនោះតែម្ដង។
កីឡាករ Collins បាននិយាយក្នុងសេចក្តីថ្លែងការណ៍ថា៖ «ខ្ញុំយល់ពីផលប៉ះពាល់នៃបញ្ហានេះទៅលើអ្វីមួយដែលយើងកំពុងព្យាយាមសម្រេចរួមគ្នានៅរដូវកាលនេះ។ ខ្ញុំពិតជាអស់សង្ឃឹម និងខកចិត្តយ៉ាងខ្លាំងចំពោះខ្លួនឯងដែលបានធ្វើឲ្យយើងទាំងអស់គ្នាលំបាកបែបនេះ»។
កីឡាកររូបនេះបានបន្ថែមថា៖ «ខ្ញុំតែងប្រយ័ត្នចំពោះអ្វីដែលខ្ញុំដាក់ក្នុងខ្លួនរបស់ខ្ញុំ ប៉ុន្តែខ្ញុំមិននឹកស្មានថា ខ្ញុំហូបអាហារបំប៉នដែលមានសារធាតុខុសច្បាប់បែបនេះទេ»។
ការព្យួរសិទ្ធិប្រកួតនេះ បានកើតឡើងតែប៉ុន្មានសប្តាហ៍បន្ទាប់ពីកីឡាករ Deandre Ayton នៅក្លិប Phoenix Suns ត្រូវបានព្យួរការចូលរួម ២៥ ប្រកួត ចំពោះការធ្វើតេស្តឃើញប្រើថ្នាំបង្កើនកម្លាំង។
កាលពីខែសីហា អតីតជើងចាស់ Wilson Chandler នៅក្លិប Brooklyn Nets រងការពិន័យ ២៥ ប្រកួត ក្រោយរកឃើញប្រើសារធាតុលើកកម្លាំង Ipamorelin។
NBA មិនមែនជាហត្ថលេខីនៃច្បាប់ក្រមប្រឆាំងសារធាតុលើកកម្លាំងពិភពលោកទេ ប៉ុន្តែលីកមួយនេះបានគ្រប់គ្រងកម្មវិធីប្រឆាំងសារធាតុលើកកម្លាំងផ្ទាល់របស់ខ្លួន៕ AFP/SN