.jpg)
De Gea លោតសង្គ្រោះបាល់ freekick ក្នុងការប្រកួត Premier League ថ្ងៃទី១៣ ខែមេសា។ រូប AFP
ក្រុងឡុងដ៍៖ អ្នកចាំទី David De Gea បានប្ដេជ្ញាបន្តអនាគតរបស់រូបគេនៅជាមួយក្រុម Man Utd ដោយចុះកុងត្រាថ្មីរហូតដល់ខែ មិថុនា ឆ្នាំ ២០២៣។ នេះបើយោងតាមការប្រកាសរបស់ក្លិបដែលលេងនៅក្របខ័ណ្ឌ Premier League បានឲ្យដឹងកាលពីថ្ងៃចន្ទ។
អ្នកចាំទី De Gea អាយុ ២៨ ឆ្នាំ គ្រោងនឹងបញ្ចប់កុងត្រានៅចុងរដូវកាលឆ្នាំ ២០១៩-២០ នេះ ប៉ុន្តែបានប្ដូរចិត្តដោយចុះកុងត្រាបន្តនៅជាមួយក្លិប Man Utd រយៈពេលយ៉ាងតិច ៤ ឆ្នាំទៀត។
អ្នកចាំទីអេស្ប៉ាញដែលបានជួយឲ្យក្រុម Man Utd ឈ្នះពាន Premier League នៅរដូវកាលទី ២ របស់ខ្លួនក្នុងឆ្នាំ ២០១២-១៣ នោះ ធ្លាប់ត្រូវបានក្លិបមួយចំនួនចង់បានរូបគេដូចជាក្លិប Real Madrid ក្លិប PSG និងក្លិប Juventus។
ប៉ុន្តែឥឡូវ គេលែងមានការសង្ស័យពីអនាគតរបស់រូបគេទៀតហើយ ព្រោះរូបគាត់អាចស្ថិតនៅក្រុម Man Utd ដល់រយៈពេល ១៣ ឆ្នាំ ប្រសិនបើគាត់សម្រេចបន្តកុងត្រាថ្មីរយៈពេល ៤ ឆ្នាំទៀត ដល់ឆ្នាំ ២០២៤ ពិតមែន។
អ្នកចាំទី De Gea បាននិយាយតាមគេហទំព័ររបស់ក្រុម Man Utd ថា៖ «វាជាមោទនភាពមួយដែលបានចំណាយពេល ៨ ឆ្នាំ នៅជាមួយក្លិបដ៏អស្ចារ្យមួយនេះ ហើយឱកាសក្នុងការបន្តអាជីពរបស់ខ្ញុំនៅក្លិប Man Utd នេះគឺជាកិត្តិយសអស្ចារ្យមួយ»។
អ្នកចាំទីរូបនេះបានបន្តថា៖ «តាំងពីខ្ញុំបានមកដល់ទីនេះ ខ្ញុំមិនដែលធ្លាប់នឹកស្រមៃថា នឹងបានលេងឲ្យក្លិបនេះបានជាង ៣៥០ ប្រកួតនោះទេ ប៉ុន្តែឥឡូវអនាគតរបស់ខ្ញុំត្រូវបានកំណត់រួចហើយ ហើយអ្វីដែលខ្ញុំចង់បាននោះ គឺត្រូវជួយឲ្យក្រុមនេះសម្រេចនូវអ្វីដែលខ្ញុំជឿថា យើងអាចធ្វើបាននិងរួមគ្នាឈ្នះពានម្ដងទៀត»។
អ្នកចាំទីដដែលនេះបានបន្តថា៖ «ក្នុងនាមជាកីឡាករចាស់វស្សាម្នាក់នៅក្លិបនេះ ខ្ញុំចង់គាំទ្រនឹងដឹកនាំជួយកីឡាករជំនាន់ក្រោយ ដើម្បីឲ្យពួកគេដឹងពីសារៈសំខាន់ដែលលេងនៅទីនេះ»។
អ្នកចាំទីចាស់វស្សារូបនេះបានបន្ថែមទៀតថា៖ «ខ្ញុំគិតថា ខ្ញុំនៅមានអ្វីច្រើនទៀតដែលត្រូវសម្រេចឲ្យបានសម្រាប់ក្លិបនេះ ហើយខ្ញុំពិតជាជឿថា ក្រុម Man Utd អាចបង្កើនភាពខ្លាំងឡើងវិញដោយអាស្រ័យលើប្រវត្តិជោគជ័យរបស់ក្លិបនេះ ដើម្បីផ្ដល់រង្វាន់ដល់អ្នកគាំទ្រក្លិបនេះ»។
កុងត្រាថ្មីរបស់អ្នកចាំទី De Gea នេះគឺមានតម្លៃ ៣៧៥ ០០០ ផោន (ប្រហែល ៤៦៥ ៦៨០ ដុល្លារ) ក្នុង ១ សប្ដាហ៍ ធ្វើឲ្យគេក្លាយជាអ្នកចាំទីបានប្រាក់ខែខ្ពស់បំផុតក្នុងពិភពលោក។
អ្នកចាំទី De Gea បានទទួលពានរង្វាន់ស្រោមដៃមាសនៃក្របខ័ណ្ឌ Premier League ឆ្នាំ ២០១៧-១៨ និងក្លាយជាអ្នកចាំទីឆ្នើមបំផុតមួយក្នុងពិភពលោក បើទោះជារូបគេបានខកចិត្តចំពោះយុទ្ធនាការកន្លងទៅនេះក៏ដោយ។
កុងត្រាថ្មីរបស់អ្នកចាំទីរូបនេះ គឺជាកម្លាំងជំរុញដ៏សំខាន់មួយសម្រាប់ក្រុម Man Utd របស់លោក Ole Gunnar Solskjaer ដោយធ្វើឲ្យគាត់ជឿថា រូបគេនឹងជួយឲ្យក្រុមនេះវិលទៅរកភាពខ្លាំងរបស់ខ្លួនឡើងវិញ។
លោក Solskjaer បាននិយាយថា៖ «ខ្ញុំសប្បាយចិត្តដែល អ្នកចាំទី De Gea បានកំណត់អនាគតរយៈពេលយូររបស់គាត់នៅជាមួយក្រុមនេះ ហើយរយៈពេលជាងប៉ុន្មានថ្មីៗមកនេះ De Gea បានបង្ហាញខ្លួនជាអ្នកចាំទីល្អបំផុតក្នុងពិភពលោក និងជាផ្នែកដ៏សំខាន់មួយនៃផែនការរបស់យើង ខណៈយើងរំពឹងធ្វើឲ្យក្រុម Man Utd ត្រឡប់ទៅភាពល្បីល្បាញដែលខ្លួនធ្លាប់មានពីមុនមក»៕ APF/SN
