.jpg)
ក្រុងបែលក្រាត៖ ប្រព័ន្ធផ្សព្វផ្សាយរបស់ប្រទេសស៊ែប៊ី បានរាយការណ៍ថា កីឡាករវាយកូនបាល់ (តេន្នីស) លំដាប់លេខ ១ ពិភពលោក Novak Djokovic ដែលសប្ដាហ៍មុនធ្វើតេស្តទទួលបានលទ្ធផលវិជ្ជមានចំពោះវីរុសកូរ៉ូណាបានបរិច្ចាគនូវទឹកប្រាក់ចំនួនជាង ៤០ ០០០ អឺរ៉ូ ($៤៥ ០០០) ដល់ទីក្រុងរបស់ប្រទេសដែលកើតមានជំងឺនេះខ្លាំងក្លា។
ទូរទស្សន៍កីឡា SportKlub TV បានផ្សាយថា កីឡាករ Djokovic វ័យ ៣៣ ឆ្នាំ បានធ្វើការបរិច្ចាគប្រាក់ទៅឲ្យទីក្រុង Novi Pazar ដែលស្ថិតនៅភាគនិរតីប្រទេសស៊ែប៊ី ដើម្បីជួយធ្វើការប្រយុទ្ធប្រឆាំងនឹងការរាតត្បាតនៃជំងឺនេះ បន្ទាប់ពីមានការប្រកាសដាក់ទីក្រុងក្នុងភាពអាសន្ន នៅចុងខែមិថុនា ដោយសារការរាលដាលនៃជំងឺផ្លូវដង្ហើមថ្មីនេះខ្លាំងឡើងៗ។
បន្ទាប់ពីមានការរឹតបន្តឹងការផ្ទុះឡើងលើកទី១ នៃជំងឺកូវីដ ១៩ កាលពីដើមខែឧសភា ឥឡូវនេះ ស៊ែប៊ីកំពុងមានសញ្ញាងើបឡើងជាថ្មី ដោយមានការឆ្លងជាង ២០០ ករណីរៀងរាល់ថ្ងៃៗ ធៀបនឹងចំនួនប្រហែល ៥០ ករណីខែមុន។
ប្រជាជាតិបាល់កង់មួយនេះ ថ្មីៗនេះ ទទួលបានការចាប់អារម្មណ៍ ក្រោយអនុញ្ញាតឲ្យ Djokovic រៀបចំការប្រកួតថ្នាក់តំបន់មួយ ដែលចាប់ផ្តើមក្នុងក្រុងបែលក្រាត កាលពីពាក់កណ្តាលខែមិថុនា មុនពេលមានការឆ្លងជំងឺកូវីដ ១៩ ជាច្រើននាក់ រហូតធ្វើឲ្យអ្នករៀបចំរំសាយកម្មវិធីចោល។
ក្រៅពី Djokovic កីឡាករ ៣ នាក់ទៀត ដូចជា Grigor Dimitrov, Borna Coric និង Viktor Troicki ដែលចូលរួមកម្មវីធី Adria Tour ព្រមទាំងគ្រូបង្វឹក Goran Ivanisevic សុទ្ធតែទទួលបានលទ្ធផលវិជ្ជមានដូចគ្នា។ ក្នុងព្រឹត្តិការណ៍នោះ គេឃើញកីឡាករទាំងអស់ ឱបគ្នារំលងសំណាញ់ លេងបាល់បោះជុំគ្នា និងថែមទាំងមានការរាំរែកជាមួយគ្នា នៅក្នុងក្លិបរាត្រីទៀតផង។
ក្រោយទទួលរងការរិះគន់យ៉ាងខ្លាំង ចំពោះការរៀបចំកម្មវិធីប្រកួតនេះ កីឡាករសញ្ជាតិស៊ែប៊ី Djokovic ដែលប្រពន្ធរបស់ខ្លួនក៏ឆ្លងដែរនោះ បានធ្វើការសុំទោសជាសាធារណៈ ដោយនិយាយថា៖ «ខ្ញុំមានការសោកស្ដាយខ្លាំងណាស់ ដែលកម្មវិធីប្រកួតសប្បុរសមួយនេះ បង្កឲ្យមានហានិភ័យសម្រាប់គ្រប់គ្នា»។
សម្រាប់ប្រទេសស៊ែប៊ី ដែលមានប្រជាជនប្រមាណជា ៧ លាននាក់ ត្រូវបានកត់ត្រាថា មានអ្នកឆ្លងនូវវីរុសកូរ៉ូណាជិត ១៥ ០០០ នាក់ ក្នុងនោះស្លាប់ ២៨១ នាក់៕ AFP/VN
