.jpg)
Serena វាយកូនបាល់ក្នុងការប្រកួត WTA Toronto ថ្ងៃទី ១១ សីហា ២០១៩។ រូប AFP
សហរដ្ឋអាមេរិកៈ កីឡាករវាយកូនបាល់ជាប់លេខ ១ ពិភពលោក Novak Djokovic បានចាប់ផ្ដើមជាមួយជ័យជម្នះក្នុងការប្រកួតវាយកូនបាល់នៅក្របខ័ណ្ឌ US Open ក្នុងទីក្រុង Cincinnati រដ្ឋអូហៃយ៉ូ សហរដ្ឋអាមេរិក ខណៈកីឡាការិនី Serena Williams បានចុះចាញ់ក្នុងការប្រកួតជុំទី ១ ដោយសារបញ្ហាឈឺខ្នង។
កីឡាករស៊ែប៊ី Djokovic ធ្វើមិនបានល្អចំនួន ៣ លើកដោយសាររូបគេបានធ្វើឲ្យខូចសឺវីសក្នុងការប្រកួតបើកឆាកជាមួយកីឡាករអាមេរិក Sam Querrey ប៉ុន្តែភ្លាមៗនោះរូបគេធ្វើបានល្អឡើងរហូតទទួលបានជ័យជម្នះទៅលើកីឡាករអាមេរិកចំនួន ២ សិតគឺ ៧-៥ និង ៦-១។
កីឡាករ Djokovic បានឈ្នះការវាយសឺវីសពីកីឡាករ Sam ២ លើកដើម្បីឈ្នះសិតដំបូង ហើយបន្តឈ្នះក្នុងការប្រកួតលើកដំបូងរបស់រូបគេតាំងពីបានឈ្នះកីឡាករ Roger Federer ក្នុងវគ្គចុងក្រោយក្របខ័ណ្ឌ Wimbledon កាលពីខែមុន។
កីឡាកររូបនេះបាននិយាយថា៖ «ខ្ញុំបានបញ្ចប់ការប្រកួតនេះបានល្អ បើទោះជាមានការភ័យខ្លាចនៅពេលចាប់ផ្ដើមប្រកួតក៏ដោយ»។
កីឡាករ Djokovic បាននិយាយថា៖ «កីឡាករ Sam មានអារម្មណ៍ស្វាហាប់នៅលើទីលានប្រកួតនៅពេលចាប់ផ្ដើមរហូតដល់ទីបញ្ចប់ ហើយខ្ញុំតែងតែភ័យខ្លាចចំពោះការវាយសឺវីសរបស់គាត់»។
កីឡាករស៊ែប៊ីរូបនេះបានបន្ថែមថា៖ «ខ្ញុំពេញចិត្តនឹងការប្រកួតក្នុងស្ថានភាពភ្លាមៗបែបនេះ ហើយខ្ញុំរីករាយណាស់ដែលទទួលបានជ័យជម្នះនេះ ហើយខ្ញុំក៏សង្ឃឹមដែរថាខ្ញុំនឹងធ្វើបានល្អជាងនេះនៅជុំបន្តបន្ទាប់ទៀត»។
ទន្ទឹមនេះដែរកីឡាការិនីអាមេរិក Serena បានបោះបង់ការប្រកួតរបស់ខ្លួនដោយសារចង់រក្សាកម្លាំងទុកសម្រាប់ការចាប់ផ្ដើមប្រកួតក្របខ័ណ្ឌ US Open ថ្ងៃទី ២៦ ខែសីហាដោយសុខចិត្តឲ្យកីឡាការិនី Zarina Diyas ឈ្នះនៅក្នុងការប្រកួតជុំដំបូងនៅរយៈពេលប៉ុន្មានថ្ងៃបន្ទាប់ពីរូបនាងបង្ខំចិត្តចុះចាញ់នៅវគ្គចុងក្រោយក្របខ័ណ្ឌ WTA Toronto ដោយសារឈឺខ្នង។
កីឡាការិនី Serena បាននិយាយក្នុងរបាយការណ៍ផ្សាយដោយមន្ត្រីរៀបចំការប្រកួតថា៖ «ខ្ញុំបានមករដ្ឋអូហៃយ៉ូពីថ្ងៃអាទិត្យ ហើយបានហ្វឹកហាត់គ្រប់យ៉ាងដើម្បីត្រៀមខ្លួនប្រកួតនៅយប់នេះ ហើយសង្ឃឹមបំផុតក្រោយពីធ្វើការហ្វឹកហាត់ពីព្រឹកមិញនេះ ប៉ុន្តែជាអកុសលខ្នងរបស់ខ្ញុំនៅតែមានបញ្ហាដដែល»។
កីឡាការិនី Serena ជាម្ចាស់ជើងឯក Grand Slam ២៣ ជំនាន់ក៏បានជួបបរាជ័យដោយសារស្ថានភាពរបួសផ្សេងទៀតដែរគឺបញ្ហាឈឺក្បាលជង្គង់ដែលធ្វើឲ្យរាំងស្ទះដល់ការប្រកួតរបស់នាងនៅដើមរដូវកាលនេះ ប៉ុន្តែរូបនាងនៅតែចង់ស្វែងរកការឈ្នះពានជាលើកដំបូងតាំងពីបានឈ្នះពាននៅក្នុងការប្រកួតក្របខ័ណ្ឌ Australia Open ឆ្នាំ ២០១៧៕ SN
