.jpg)
Sancho (កណ្ដាល) របស់ Dortmund ព្យាយាមបណ្ដើរទាញបាល់គេចពីគូបដិបក្ខ អំឡុងការប្រកួត នាពេលកន្លងមក។
ក្រុងឡុងដ៍: ការស្នើផ្លូវការលើកដំបូងរបស់ក្រុមបិសាចក្រហម Manchester United ដើម្បីនាំយកខ្សែបម្រើស្លាប Jadon Sancho ត្រឡប់មកកាន់ក្របខ័ណ្ឌ Premier League វិញ ជាមួយនឹងតម្លៃដល់ទៅ ១០០លានអឺរ៉ូ (ជិត $១១៧ លានដុល្លារ) ត្រូវបានក្រុម Borussia Dortmund បដិសេធហើយ។ នេះបើតាមសេចក្ដីរាយការណ៍របស់ទូរទស្សន៍ Sky Sports កាលពីថ្ងៃអង្គារ។
កីឡាករវ័យ ២០ ឆ្នាំ Sancho បានក្លាយជាគោលដៅរបស់ក្រុម Man Utd ជាយូរមកហើយ ខណៈក្រុមរបស់លោក Ole Gunnar Solskjaer ត្រូវការធ្វើឱ្យប្រសើរជាងមុននូវការសម្រេចទីរបស់ក្រុមមួយ ដែលរដូវកាលមុនបញ្ចប់នៅចំណាត់ថ្នាក់ទី៣ នៅ Premier League និងឡើងដល់វគ្គ ១/២ នៃកម្មវិធី Europa League, FA Cup និង League Cup។
កីឡាករអន្តរជាតិអង់គ្លេស ចូលរួមជាមួយក្រុម Dortmund ដោយចាកចេញពីក្រុម Manchester City ជាមួយនឹងតម្លៃ ដែលដឹង ១០ លានផោន ($១៣ លាន) កាលពី ៣ ឆ្នាំមុន ហើយកំពុងលេចធ្លោយ៉ាងខ្លាំង នៅក្របខ័ណ្ឌ Bundesliga អាល្លឺម៉ង់ រហូតក្លាយជាអត្តពលិកដ៏ទេពកោសល្យល្អ ១ រូបរបស់កីឡាបាល់ទាត់អឺរ៉ុប។
សេចក្ដីរាយការណ៍របស់ Sky Sports បានឱ្យដឹងថា៖ «ការស្នើដំបូង ៧៣ លានផោន ($៩៣ លាន) ហើយដំឡើងរហូតដល់ ៩១ លានផោន ($១១៧ លាន) ដែលតម្លៃហ្នឹង មិនអាចបំពេញតាមការទាមទាររបស់ Dortmund ចំនួន ១០៨ លានផោន ($១៣៨ លាន)»។
ក្រុមយក្សអាល្លឺម៉ង់ បានអះអាងថា Sancho នឹងបន្តលេងនៅ Bundesliga ១ រដូវកាលទៀត ក្រោយពីក្រុម Man Utd មិនអាចឈានដល់កិច្ចព្រមព្រៀង ដែលក្លិប Dortmund បានកំណត់ចុងក្រោយ ថ្ងៃទី ១០ ខែសីហា។
កីឡាករ Sancho ដែលបានបង្ហាញខ្លួនជាមួយ Dortmund សម្រាប់ ៣ ប្រកួតដំបូងនៃរដូវកាលថ្មី មិនបានធ្វើដំណើររួមជាមួយក្រុមទៅផ្ទះ Bayern Munich ក្នុងជំនួបពាន German Super Cup ឡើយ ដោយសារមានឆ្លងជំងឺ តែខាងក្លិបអះអាងថា មិនមែនជំងឺផ្លូវដង្ហើមថ្មីកូវីដ ១៩ នោះទេ។
ខ្សែបម្រើស្លាបឆ្នើមរូបនេះ ស៊ុតបញ្ចូលទីបាន ២០ គ្រាប់ និងបោះឱ្យមិត្តរួមក្រុម ២០ លើក នៅគ្រប់កម្មវិធីប្រកួតទាំងអស់ កាលពីរដូវកាលមុន ហើយប្រធានក្រុម Dortmund គឺខ្សែប្រយុទ្ធ Marco Reus កំពុងសង្ឃឹមឲ្យកីឡាករឆ្នើមរូបនេះ បន្តស្នាក់នៅ ១ រដូវកាលទៀត។
កីឡាករអន្តរជាតិអាល្លឺម៉ង់ Reus បានប្រាប់ Sky Sports នៅប្រទេសកំណើតថា៖ «យើងទាំងអស់គ្នារីករាយ ដែលរូបគេនឹងនៅជាមួយពួកយើង ១ ឆ្នាំទៀត ព្រោះគេ គឺជាអ្នកបញ្ជូនបាល់ និងស៊ុតបញ្ចូលទី ដូច្នេះមានគេយើងនឹងបានពិន្ទុ។ យើងនឹងចាំមើលថា តើគេឡើងដល់កម្រិតកំពូល ដូច Lionel Messi ឬក៏ Cristiano Ronaldo ឬអត់?»។
កីឡាករ Reus វ័យ ៣១ ឆ្នាំ បានបន្ថែមថា៖ «រូបគេនៅត្រូវការពេល និងបទពិសោធន៍បន្ថែមទៀត ដែលវានឹងក្លាយជារឿងសំខាន់ថា តើរូបគេត្រូវគ្រប់គ្រងពេលវេលាយ៉ាងម៉េចពេលគ្រប់យ៉ាង មិនដំណើរការទៅដោយស្រួល។ តែយ៉ាងណា គេមានទំនុកចិត្ត និងគុណភាព»។
ក្រុម Man Utd បានរងនូវការរិះគន់ពីសំណាក់អ្នកគាំទ្រ ដែលមិនព្រមចំណាយទឹកប្រាក់បន្ថែមទៀត ដើម្បីទិញកីឡាករ ខណៈក្លិបគូប្រជែងបានពង្រឹងក្រុមពួកគេរៀងៗខ្លួន ហើយមកទល់ពេលនេះ មានតែខ្សែបម្រើអន្តរជាតិហូឡង់ Donny Van de Beek ១ រូបប៉ុណ្ណោះ ដែលបានក្លាយជាសមាជិកថ្មីរបស់ក្រុមបិសាចក្រហម ក្រោយទិញពីក្រុម Ajax ក្នុងតម្លៃ ៤០ លានផោន ($៥១ លាន)៕ AFP/VN
