.jpg)
Dybala តែតបាល់ក្នុងការប្រកួតពានអឺរ៉ុប ពីរាត្រីថ្ងៃអង្គារ។ រូបថត AFP
ទីក្រុងទូរីន៖ កីឡាករ Paulo Dybala បានស៊ុតបាល់ free-kick កោងចូលទីយ៉ាងល្អជួយឲ្យក្រុម Juventus ឈ្នះ ១-០ ទៅលើក្រុម Atletico Madrid និងឈរនៅលើកំពូលតារាង នៃពូល D នៅក្នុងក្របខ័ណ្ឌ Champions League។
ម្ចាស់ជើងឯកអ៊ីតាលីនេះបានកក់កៅអីរួចហើយសម្រាប់វគ្គ ១៦ ក្រុមចុងក្រោយ ជាមួយការនៅសល់ ២ ប្រកួតទៀត ប៉ុន្តែពួកគេបានឈរនៅលើកំពូលតារាងដោយសុវត្ថិភាពរួចហើយ ជាមួយជ័យជម្នះគួរឲ្យចាប់អារម្មណ៍ពីថ្ងៃអង្គារ។
ក្រុម Atletico របស់លោក Diego Simeone នឹងត្រូវការឈ្នះមួយប្រកួតចុងក្រោយក្នុងពូលនេះនៅពេលប្រកួតនឹងក្រុម Lokomotiv Moscow ក្នុងទីក្រុង Madrid ប្រទេស អេស្ប៉ាញ ដើម្បីធានាបាននូវឱកាសឡើងទៅវគ្គ ១៦ ក្រុមចុងក្រោយ។
លោក Maricio Sarri គ្រូបង្វឹកក្លិប Juventus បាននិយាយថា៖ «ខ្ញុំគិតថា គ្រាប់បាល់មួយគ្រាប់របស់កីឡាករ Dybala នេះគឺពិតជាអស្ចារ្យមែនទែន»។
គ្រូបង្វឹករូបនេះបានបន្ថែមថា៖ «រឿងមួយដែលគ្រូបង្វឹកនិយាយនៅពេលគាត់ឃើញអ្នកណាមួយព្យាយាមស៊ុតបាល់ពីទីតាំងនោះគឺថា គេពិតជាធ្វើបានល្អខ្លាំងណាស់»។
លោក Sarri បានបន្ថែមទៀតថា៖ «គាត់បានធ្វើអ្វីមួយអស្ចារ្យណាស់ដែលសមនឹងទទួលបានការទះដៃអបអរព្រោះវាជាជំនាញដ៏អស្ចារ្យបំផុតមួយ»។
កីឡាករ Cristiano Ronaldo បានត្រឡប់ទៅក្រុមនេះវិញ និងបានលេងក្នុងការប្រកួតនេះទាំងស្រុងក្រោយពីអវត្តមានក្នុងការប្រកួតជាមួយក្រុម Atalanta កាលពីចុងសប្ដាហ៍មុន និងត្រូវបានឲ្យគេចូលជំនួសក្នុងការប្រកួត ២ លើកមុន ដោយសាររូបគេមានបញ្ហាជង្គង់បន្តិចបន្តួចផងដែរ។
លោក Sarri បានបន្ថែមថា៖ «ខ្ញុំមិនទាន់និយាយជាមួយគាត់ពីរបួសក្បាលជង្គង់របស់គាត់នៅឡើយទេ ប៉ុន្តែគាត់មើលទៅហាក់ដូចជាមានសុខភាពល្អ»។
ជ័យជម្នះនេះបានធ្វើឲ្យក្រុម Juventus មាន ១៣ ពិន្ទុ ដែលបានមកពីការប្រកួត ៥ លើក ខណៈក្រុម Atletico មាន ៧ ពិន្ទុ ដោយនាំមុខ ១ ពិន្ទុ ទៅលើក្រុម Bayer Leverkusen ឈរនៅលេខ ៣ ក្រោយពីឈ្នះក្រុម Lokomotiv ២-០។
លោក Simeone បាននិយាយថា៖ «យើងមានការប្រកួតល្អជាមួយក្រុមខ្លាំងមួយហើយយើងមានឱកាសដែរ ប៉ុន្តែយើងនៅខ្វះប្រសិទ្ធភាពតិចតួច»។
គ្រូបង្វឹករូបនេះបានបន្ថែមឲ្យដឹងទៀតថា៖ «យើងរកមិនបានគ្រាប់បាល់ដែលជារឿងសំខាន់បំផុតក្នុងកីឡាបាល់ទាត់ ប៉ុន្តែយើងតែងតែត្រៀមលក្ខណៈក្នុងការប្រកួតជានិច្ច»៕ AFP/SN
