ភ្នំពេញ: កីឡាអេឡិចត្រូនិក (E-Sport) ដែលជាប្រភេទកីឡាសម័យបច្ចេកវិទ្យា និងវិទ្យាសាស្ត្រជាន់ ខ្ពស់ ដែលមនុស្សលេងជាមួយគ្រឿងម៉ាស៊ីននោះ កំពុងមានសក្តានុពលខ្លាំងក្នុងកម្រិតតំបន់ និងថ្នាក់អាស៊ី ខណៈដែលសហព័ន្ធកីឡាមួយនេះទើបតែបង្កើតឡើងនៅព្រះរាជាណាចក្រកម្ពុជា នាចុងឆ្នាំ ២០១៤ ប៉ុន្តែ ដណ្តើមបានចំណាត់ថ្នាក់លេខ ១ នៅឆ្នាំ ២០១៥ និង ២០១៧ ក្នុងតំបន់ផងដែរ។
ទន្ទឹមគ្នានេះកីឡា E-Sport កំពុងតែរៀបចំការប្រកួតមួយក្នុងរាជធានីភ្នំពេញ ដែលមាន ៣ ដំណាក់ ដោយនឹងចាប់ផ្តើមប្រកួតតាំងពីខែឧសភា និងគ្រោងបិទបញ្ចប់នៅខែវិច្ឆិកា ឆ្នាំ ២០១៨ ដែលមានក្រុមយុវជននៅក្នុងរាជធានីភ្នំពេញចំនួន ៣០ ក្រុម ដើម្បីជ្រើសរើសយកម្ចាស់ពានរង្វាន់ថ្នាក់ជាតិ ឈ្មោះ DEWGaming ឆ្នាំ 2018 ក្រោមការឧបត្ថម្ភដោយក្រុមហ៊ុនវេសថិចមេឌាលីមីតធីត មានផលិតផលភេសជ្ជៈ Mountain Dew។
លោកលន់ សាមឌី មន្ត្រីគណៈកម្មាធិការជាតិអូឡាំពិកកម្ពុជា និងជាអគ្គលេខាធិការសហព័ន្ធកីឡាអេឡិចត្រូនិកកម្ពុជា (E-Sport) បានឲ្យភ្នំពេញ ប៉ុស្តិ៍ ដឹងកាលពីថ្ងៃពុធថា៖ «ព្រឹត្តិការណ៍ប្រកួតពានរង្វាន់ DEWGaming ឆ្នាំ ២០១៨ នេះរៀបចំប្រកួតជា ៣ តំណាក់កាល និងបានចាប់ផ្តើមប្រកួតវគ្គជម្រុះតំណាក់កាលទី ១ តាំងពីពីថ្ងៃទី ៥ និងទី ៦ ខែឧសភា ឆ្នាំ ២០១៨ មកម្ល៉េះ។ ដំណាក់កាលទី ២ នឹងរៀបចំប្រកួតនៅថ្ងៃទី ១៦ និង ១៧ ខែកញ្ញា ឆ្នាំ ២០១៨ ហើយដំណាក់កាលទី ៣ ធ្វើឡើងនៅវគ្គផ្តាច់ព្រ័ត្រនាខែវិច្ឆិកា ឆ្នាំ ២០១៨ ខាងមុខ»។
លោកលន់ សាមឌី បានបញ្ជាក់ឲ្យដឹងថា៖ «ការចូលរួមនេះមានក្រុមនៅតែក្នុងរាជធានីភ្នំពេញប៉ុណ្ណោះ ដែលមានចំនួន ៣០ ក្រុមចូលប្រកួតប្រជែង ក្នុងមួយក្រុមមានចំនួន ៥ នាក់ ហើយក្រុមដែលទទួលបានជយលាភី នឹងត្រូវអនុញ្ញាតឲ្យទៅចូលរួមប្រកួតលក្ខណៈអន្តរជាតិជាមួយក្រុមមកពី ១០ ប្រទេសទៀតមានប្រទេសមីយ៉ាន់ម៉ា សិង្ហបុរីឥណ្ឌូនេស៊ី វៀតណាម ឡាវម៉ាឡេស៊ី អូស្ត្រាលី ហ្វីលីពីន ឥណ្ឌា និងថៃ»។
ក្នុងនោះដែរ ការប្រកួតប្រជែងបន្តបន្ទាប់ នឹងឈានទៅប្រកួតយកពានរង្វាន់ជើងឯក MPGLAsian Championship រដូវកាលទី ១ នៅប្រទេសថៃ នាខែកក្កដា ឆ្នាំ ២០១៨ នេះ ជាមួយក្រុមមកពីប្រទេសចិន ១ ក្រុមទៀត។ ព្រឹត្តិការណ៍ DEW Gaming នេះ ដែលត្រូវបានរៀបចំឡើង ដោយក្រុមហ៊ុនវេសថិច មេឌាលីមីធីត ( Westec Media Limited ) សហការជាមួយសហព័ន្ធកីឡាអេឡិចត្រូនិកកម្ពុជា ឧបត្ថម្ភដោយភេសជ្ជៈ Mountain Dew នោះ មានរង្វាន់ជាទឹកប្រាក់ ១៣-០០០ ដុល្លារសហរដ្ឋអាមេរិក។
លោក ជា ចន្ទបរិបូរណ៍ អនុ-ប្រធានទី ១ សហព័ន្ធកីឡាអេឡិចត្រូនិក បានឲ្យដឹងក្នុងសន្និសីទសារព័ត៌មានថា៖ «កីឡាអេឡិចត្រូនិក កំពុងរីកចម្រើនជាលំដាប់នៅក្នុងប្រទេសកម្ពុជា បន្ទាប់ពីមានសកម្មភាពជាបន្តបន្ទាប់។ កីឡា E-Sports ខុសពីកីឡាផ្សេងៗទៀតក្នុងការអនុវត្ត និងហ្វឹកហាត់»។
លោកបានបន្ថែមទៀតថា៖ «កីឡាផ្សេងៗត្រូវអញ្ជើញគេមកប្រកួត ឬត្រូវចេញទៅក្រៅប្រទេសទើបប្រកួតគ្នាបាន ប៉ុន្តែ E-Sports ងាយស្រួលណាស់ កីឡាករក្នុងប្រទេសនីមួយៗប្រកួតគ្នាតាមអនឡាញ ហើយមានបទពិសោធប៉ះគ្នាច្រើន ដូច្នេះក្រុមមកពីប្រទេសនីមួយៗ អាចដឹងពីសមត្ថភាពរបស់ក្រុមប្រទេសផ្សេងទៀ»។
លោកបានអរគុណដល់គ្រប់បណ្តាញសារព័ត៌មានទាំងអស់ដែលបានជួយផ្សព្វផ្សាយអំពីកីឡា E-Sports ដែលជាផ្នែកដ៏សំខាន់ផ្តល់ព័ត៌មានដល់មហាជនឲ្យបានដឹងថាអ្វីទៅជា E-Sports?