ភ្នំពេញ៖ ក្រុមអត្តពលិកកីឡាអេឡិចត្រូនិកកម្ពុជា (E-Sports) បានធ្វើការតាំងចិត្តខ្ពស់ថា នឹងខំប្រឹងធ្វើឲ្យបានល្អ ដើម្បីប្រជែងយកជយលាភី នៅក្នុងការប្រកួតជើងឯកពិភពលោក Mobile Legends: Bang Bang World Championship ហៅកាត់ថា M1 ដែលនឹងត្រូវធ្វើនៅទីលាន Axiata Arena តំបន់ Bukit Jalil ទីក្រុងគូឡាឡាំពួរ ប្រទេស ម៉ាឡេស៊ី ពីថ្ងៃទី ១១ ដល់ទី ១៧ ខែវិច្ឆិការខាងមុខនេះ ខណៈព្រឹតិ្តការណ៍ប្រកួតនេះ មានប្រាក់រង្វាន់សរុបរហូតដល់ ២៥០ ០០០ ដុល្លារអាមេរិក។
ជាមួយនឹងការតាំងចិត្តនេះ ក្រុមអត្តពលិក E-Sports កម្ពុជា មានគ្នា ៦ នាក់ បានធ្វើដំណើរទៅកាន់ប្រទេស ម៉ាឡេស៊ី កាលពីរសៀលថ្ងៃអង្គារម្សិលមិញ ដើម្បីធ្វើការហ្វឹកហាត់ពង្រឹងសមត្ថភាពបន្ថែម មុនពេលពួកគេចូលរួមប្រកួតជម្រុះលើវិញ្ញាសា Mobile Legend: Bang Bang ក្នុងព្រឹត្តិការណ៍ជើងឯកពិភពលោកចាប់ពីថ្ងៃទី ១១ ខែវិច្ឆិកា ខណៈការប្រកួតវគ្គពាក់ណ្តាលផ្តាច់ព្រ័ត្រ និងផ្តាច់ព្រ័ត្រ នឹងត្រូវធ្វើឡើងពីថ្ងៃទី ១៥ ដល់ថ្ងៃទី ១៧ ខែវិច្ឆិកា។
លោក លន់ សាមឌី អគ្គលេខាធិការសហព័ន្ធកីឡាអេឡិចត្រូនិកកម្ពុជាបាននិយាយថា៖ «យើងសង្ឃឹមលើក្រុមកីឡាកររបស់យើងខ្លាំង ប៉ុន្តែយើងមិនទាន់ហ៊ានសន្យាថា នឹងទទួលបានជយលាភី ឬយ៉ាងណានោះទេ ព្រោះ Mobile Legend នេះជាវិញ្ញាសាថ្មី។ ទោះយ៉ាងណា សហព័ន្ធបានខិតខំប្រឹងប្រែងអស់ពីសមត្ថភាព ដោយយើងបាននាំយកគ្រូបង្វឹកជនជាតិ សិង្ហបុរី មកជួយប្រាប់យុទ្ធសាស្រ្តថ្មីៗ ដល់ក្រុមកីឡាករយើង បានរយៈពេលជិត ១ ខែមកហើយ»។
ការប្រកួតជើងឯកពិភពលោកនេះ ត្រូវបានបង្កើតឡើង ដោយក្រុមហ៊ុនកម្សាន្ត MOONTON និងដៃគូឧបត្ថម្ភសំខាន់ U Mobile។ លោក Justin Yuan នាយកប្រតិបត្តិ និងជាសហស្ថាបនិកក្រុមហ៊ុន MOONTON បានគូសបញ្ជាក់ថា៖ « U Mobile បានក្លាយជាដៃគូឧបត្ថម្ភផ្លូវការដ៏សំខាន់របស់ MOONTON សម្រាប់ការប្រកួតជើងឯកពិភពលោកនេះ ហើយភាពជាដៃគូនេះ វាបានឆ្លុះបញ្ចាំងឲ្យឃើញពីការប្តេជ្ញាចិត្ត ក្នុងការលើកកម្ពស់វិស័យកីឡាអេឡិចត្រូនិកទាំងនៅក្នុងប្រទេស ម៉ាឡេស៊ី និងពិភពលោក»។
ក្រុមខ្លាំងមកពីប្រទេស ម៉ាឡេស៊ី សិង្ហបុរី ឥណ្ឌូនេស៊ី ហ្វីលីពីន និងមីយ៉ាន់ម៉ា ព្រមទាំងក្រុមជាប់វគ្គជម្រុះមកពីប្រទេស កម្ពុជា ថៃ ឡាវ វៀតណាម ជប៉ុន តួកគី រុស្ស៊ី សហរដ្ឋអាមេរិក និងប្រេស៊ីល នឹងចូលរួមព្រឹត្តិការណ៍ជើងឯកពិភពលោកដ៏ធំ ដែលមិនធ្លាប់មានមួយនេះ ហើយអ្នករៀបចំបានរំពឹងទុកថា ប្រទេសទាំងនេះនឹងទទួលបានបទពិសោធដ៏អស្ចារ្យ ពិសេសបណ្តាប្រទេសនៅអាស៊ាន ព្រោះ Mobile Legend: Bang Bang ជាវិញ្ញាសាដ៏ពេញនិយម ដែលនឹងត្រូវដាក់ឲ្យប្រកួតក្នុងស៊ីហ្គេមនៅហ្វីលីពីនចុងឆ្នាំ ២០១៩ នេះ។
លោក លន់ សាមឌី ដែលជាប្រធានប្រតិភូដឹកនាំការប្រកួតផងនោះ បានបន្ថែមថា៖ «ការប្រកួតនេះ ពិតជាមានសារៈប្រយោជន៍ខ្លាំង គឺវាជាការប្រកួតតេស្តដ៏សំខាន់ ព្រោះនៅក្នុងការប្រកួតនេះ យើងត្រូវជួបប្រទេសជាច្រើន ពិសេសប្រទេសនៅក្នុងតំបន់អាស៊ាន ដែលយើងនឹងត្រូវប្រកួតគ្នានៅស៊ីហ្គេមខាងមុខនេះ»។
លោកបញ្ជាក់ថា៖ «បើសិនជាយើងធ្វើបានល្អ ក្នុងការប្រកួតជើងឯកពិភពលោកនេះ យើងនឹងមានសង្ឃឹមដណ្តើមបានមេដាយ នៅស៊ីហ្គេម ប៉ុន្តែបើយើងធ្វើមិនសូវបានល្អ ក៏យើងទទួលបានបទពិសោធបន្ថែម ពីការប្រកួតនេះដែរ ពិសេសបានដឹងពីចំណុចខ្វះខាត ដែលយើងត្រូវបំពេញបន្ថែម ព្រោះកីឡាកររបស់យើង មានការតាំងចិត្តខ្ពស់ថា នឹងខំប្រឹងធ្វើឲ្យបានល្អ ទាំងការប្រកួតជើងឯកពិភពលោកនេះ និងការប្រកួត ស៊ីហ្គេមនៅហ្វីលីពីន»៕