ក្រុងមីឡេន: ការបានផ្លាស់ ដែលជាសុបិនរបស់ Christian Eriksen មកកាន់ក្រុម Inter Milan ទំនងជាបញ្ចប់ត្រឹមនេះ ដោយសារអតីតកីឡាករដ៏សំខាន់នៃក្រុម Tottenham Hotspur (Spurs) រូបនេះ បានស្នើសុំចាកចេញពីក្លិបយក្សអ៊ីតាលី ក្រោយចូលរួមបានត្រឹមតែ ១០ ខែ។
ខ្សែបម្រើអន្តរជាតិដាណឺម៉ាក Eriksen កាលពីខែមករា បានធ្វើដំណើរមកក្លិបថ្មីជាមួយនឹងកិច្ចសន្យា ៤ ឆ្នាំកន្លះ ក្នុងតម្លៃ ២០ លានអឺរ៉ូ ($២៣ លាន) បូកបន្ថែមនឹងប្រាក់រង្វាន់លើកទឹកចិត្ត ៧,៥ លានអឺរ៉ូ (ជិត $៩ លាន) ទៀត។
ប៉ុន្តែនៅក្នុងឆ្នាំមួយ ដែលមានការកើតឡើងនូវការរាតត្បាតពីវីរុសកូរ៉ូណា កីឡាករវ័យ ២៨ ឆ្នាំ មិនអាចបង្ហាញនូវទម្រង់លេងដូចកាលនៅជាមួយក្រុម Spurs ដែលនៅទីនោះ គេរកគ្រាប់បាល់បាន ៦៩ គ្រាប់ និងបញ្ជូនឱ្យមិត្តរួមក្រុមស៊ុតបញ្ចូលទីបាន ៨៩ លើក ក្នុងចំណោមការបង្ហាញខ្លួន ៣០៥ ប្រកួត។
«វាមិនមែនជាអ្វី ដែលខ្ញុំធ្លាប់បានសុបិននោះទេ»។ នេះជាសម្ដីអះអាងរបស់ Erikson ដែលមិនទទួលបានជោគជ័យ ក្រោមការដឹកនាំរបស់គ្រូបង្វឹកលោក Antonio Conte។
កីឡាករ Erikson បានបន្តថា៖ «មនុស្សជាច្រើនចង់ឃើញខ្ញុំលេង ហើយខ្ញុំក៏ចង់ដូចគ្នាដែរ តែគ្រូបង្វឹកគាត់មានគំនិតផ្សេងពីយើង ហើយខ្ញុំត្រូវគោរពការសម្រេចរបស់គាត់»។
កីឡាករ Eriksen ដែលនៅលេងបានល្អជាមួយក្រុមជម្រើសជាតិដាណឺម៉ាក បង្ហាញខ្លួនបាន ៧ ប្រកួតជាមួយក្រុម Inter រដូវកាលនេះ ក្នុងនោះ ៤ ដង ក្នុងនាមជាកីឡាករ ១១ នាក់ដំបូង តែរកគ្រាប់បាល់មិនបាន និងព្រមទាំងមិនបានរួមចំណែកបញ្ជូនឱ្យមិត្តរួមក្រុមសម្រេចទីឡើយ សូម្បី ១ ដង ហើយជាសរុប ទើបទម្លុះសំណាញ់ទីបាន ៤ គ្រាប់ ក្នុងចំណោមការចូលលេងទាំង ៣៣ ដងរបស់ខ្លួន។
នាយកប្រតិបត្តិរបស់ក្លិប Inter លោក Giuseppe Marotta កាលពីថ្ងៃអាទិត្យ បានអះអាងពីការចាកចេញរបស់ Eriksen ក្នុងពេលដ៏ខ្លីខាងមុខថា៖ «យើងមិនត្រូវរារាំងកីឡាករណាម្នាក់ ដែលសុំចាកចេញនោះឡើយ»។
តែលោក Conte បាននិយាយដោយទទូចថា៖ «Eriksen មានឱកាស និងលេងបានច្រើនជាងអ្នកដទៃ។ ជម្រើសរបស់ខ្ញុំ តែងតែយកប្រយោជន៍របស់ក្រុមជានិច្ច។ នៅពេលខ្ញុំពិចារណាថា សមរម្យ គេនឹងបានលេង ក្នុងចំណោម ១១នាក់ដំបូង ឬអំឡុងការប្រកួតនោះៗ»។
បញ្ហាមួយ ក្នុងចំណោមបញ្ហាផ្សេងៗ ដែល Eriksen ត្រូវប្រឈមនោះ គឺថាក្រុម Inter មានជម្រើសជាច្រើនក្នុងតំណែងខ្សែបម្រើការពារ និងបម្រើប្រយុទ្ធ រួមមាន Arturo Vidal ដែលមកពីក្រុម Barcelona បន្ថែមពីលើកីឡាករដែលមានក្នុងក្រុមស្រាប់ដូចជា Radja Nainggolan, Marcelo Brozovic និង Ivan Perisic ជាដើម។
ក្នុងពេលជាមួយគ្នានេះ ក៏មានលេចឮនូវព័ត៌មានថា Eriksen កំពុងភ្ជាប់ទំនាក់ទំនងក្នុងការផ្លាស់ទៅក្លិបនៅបារាំង Paris Saint-Germain បើមិនអ៊ីចឹងទេ អាចត្រឡប់ទៅក្របខ័ណ្ឌ Premier League របស់អង់គ្លេសវិញ ដោយចូលជាមួយក្លិប Arsenal ឬក៏ Manchester United៕ AFP/VN