ក្រុងបូហ្គោតា៖ សហព័ន្ធបាល់ទាត់កូឡុំប៊ី (FCF) និងសមាជិកសំខាន់ៗ មួយចំនួនត្រូវពិន័យជាប្រាក់ $៤,៦ លាន ពីបទរៀបចំ និងបង្កើតផែនការលក់សំបុត្រសម្រាប់ព្រឹត្តិការណ៍ World Cup ក្នុងតម្លៃថ្លៃ។ នេះបើតាមការលើកឡើងរបស់អ្នកច្បាប់ផ្នែកពាណិជ្ជកម្ម។
ការសម្រេចនេះ កើតឡើងក្រោយពីមានការស៊ើបអង្កេតអស់រយៈពេល ២ ឆ្នាំ ហើយក៏រួមបញ្ចូលការពិន័យចំពោះមន្រ្តីមួយចំនួន បន្ថែមពីលើក្រុមហ៊ុន TICKET YA ជាក្រុមហ៊ុនដៃគូរបស់ FCF ដែលរៀបចំការលក់សំបុត្រសម្រាប់ការប្រកួតក្នុងផ្ទះរបស់ក្រុមជម្រើសជាតិកូឡុំប៊ីនៅវគ្គជម្រុះ ដើម្បីបានសិទ្ធិទៅចូលរួមព្រឹត្តិការណ៍នាប្រទេសរុស្ស៊ី ក្នុងឆ្នាំ ២០១៨។
ក្រុមអ្នកស៊ើបអង្កេតនិយាយថា សំបុត្រត្រូវបានលក់ថ្លៃខ្ពស់ជាងតម្លៃទីផ្សារ និងបានរឹតត្បិតការប្រកួតប្រជែងពីក្រុមហ៊ុនដទៃ។ សំបុត្រជាង ៤២ ០០០ សម្រាប់ការប្រកួត ៩ លើក ក្នុងផ្ទះរបស់កូឡុំប៊ីមានជាប់ទាក់ទងនឹងការបន្លំតម្លៃនេះ ដែលអាចបង្កើតបានប្រាក់ចំណេញជាង $៣,៥ លាន។
១ ក្នុងចំណោមឧទាហរណ៍ ដែលត្រូវបានលើកឡើងនោះ គឺការប្រកួតជម្រុះ នៅផ្ទះខ្លួនឯងរបស់កូឡុំប៊ីទល់នឹងប្រទេសប្រេស៊ីល នាទីក្រុង Barranquilla ដែលពេលនោះ ក្រុមហ៊ុន TICKET YA ដាក់តម្លៃសំបុត្រ ២៧០ ០០០ ប៉េសូ ($៧៤) ខណៈតម្លៃជាក់ស្ដែង ៦០ ០០០ ប៉េសូ ($១៦,៤) ដែលនេះមានន័យថា បានបង្កើនដល់ទៅ ៣៥០ ភាគរយ។
បុគ្គលមួយចំនួន ដែលត្រូវបានពិន័យ មានប្រធាន និងអនុប្រធាន FCF គឺលោក Ramon Jesurun និងលោក Alvaro Gonzalez រួមជាមួយលោក Luis Bedoya ដែលជាអតីតប្រធានសហព័ន្ធ ដែលបានលាលែងពីតំណែង និងដែលបានទទួលយកបទចោទប្រកាន់ពុករលួយក្នុងរឿងអាស្រូវពុករលួយរបស់សហព័ន្ធបាល់ទាត់ពិភពលោក (FIFA)។
តែសម្រាប់ FCF បានឲ្យដឹងនៅក្នុងសេចក្តីថ្លែងការណ៍មួយថា ខ្លួននៅមិនទាន់ត្រូវបានជូនដំណឹងចំពោះការសម្រេចនេះនៅឡើយនោះទេ ប៉ុន្តែបានគូសបញ្ជាក់នូវអ្វី ដែលត្រូវបានលើកឡើងនោះថា អាចមានភាពមិនប្រក្រតី ក្នុងការស៊ើបអង្កេត និងខ្វះភ័ស្តុតាង៕ AFP/VN