.jpg)
កីឡាការិនីវាយកូនបាល់អាជីព Fiona Ferro ឈ្នះពានសម្រាប់ព្រឹត្តិការណ៍ WTA។ រូបថត AFP
ប៉ាលឺម៉ូ៖ កីឡាការិនីវាយកូនបាល់ (តិន្នីស) អាជីព Fiona Ferro បានក្លាយជាម្ចាស់ជើងឯកកម្មវិធី WTA ដំបូងគេ ក្នុងរយៈពេល ៥ ខែ នៅថ្ងៃអាទិត្យ ពេលដែលនាងដណ្ដើមបានជ័យជម្នះពីកីឡាការិនីអេស្តូនី Anett Kontaveit ជាមួយនឹងលទ្ធផល ៦-២ និង ៧-៥ ក្នុងព្រឹត្តិការណ៍ Palermo Ladies Open ដែលជាកម្មវិធីប្រកួតទី១ ត្រូវបានរៀបចំឡើងតាំងពីការរាតត្បាតពីជំងឺកូវីដ ១៩ បានបង្អាក់សកម្មភាពកីឡានេះ។
កីឡាការិនីសញ្ជាតិបារាំង Ferro ធ្វើដំណើរជាមួយនឹងការមិនបរាជ័យដល់ទៅ ១០ លើក សម្រាប់ការប្រកួតក្នុងតំបន់ ក្រោយកម្មវិធីនានាត្រូវបានផ្អាកក្នុងខែមីនា ហើយនៅតែរក្សាសម្ទុះដ៏ខ្លាំងនេះបន្ត ជាមួយនឹងការឈ្នះ ៥ ដងបន្ថែមទៀត នៅក្រុងប៉ាលឺម៉ូ នាសប្ដាហ៍នេះ ខណៈការប្រកួតប្រជែងកីឡាតិន្នីសដ៍សំខាន់ បានត្រឡប់មកមានភាពរស់រវើកឡើងវិញ ក្នុងរដ្ឋធានីនៃតំបន់ Sicilian របស់ប្រទេសអ៊ីតាលី នេះ។
ក្រោយពីបានលើកពានរង្វាន់ទី២ ក្នុងអាជីពកីឡាការិនីវ័យ ២៣ ឆ្នាំ Ferro និយាយថា៖ «ខ្ញុំគិតថា នេះជាការប្រកួតដ៏ល្អបំផុតនៃសប្ដាហ៍របស់ខ្ញុំ។ ខ្ញុំមានអារម្មណ៍ធូរស្រាល។ ខ្ញុំមិនដឹងថា មូលហេតុអ្វីទេ ព្រោះវាជាវគ្គផ្ដាច់ព្រ័ត្រ តែខ្ញុំពិតជាមិនមានអារម្មណ៍ថា មានសម្ពាធនោះឡើយ»។
ព្រឹត្តិការណ៍ប្រកួតប្រជែងមួយចំនួនចាប់ផ្ដើមមានបណ្ដើរៗទូទាំងពិភពលោកចាប់តាំងពីកីឡានេះ ជាប់គាំងនៅដើមខែមីនា ដោយសារការរីករាលដាលនៃជំងឺផ្លូវដង្ហើមថ្មី តែការប្រកួតនៅលើទីលានដីឥដ្ឋ នាក្រុងប៉ាលឺម៉ូនេះ គឺជាការរៀបចំដំបូងគេ ក្នុងចំណោមកម្មវិធីប្រកួតប្រជែងដ៏ល្បីៗ ទាំង WTA និង ATP ក្នុងរយៈពេល ៥ ខែនេះ។
យ៉ាងណា ការប្រកួតប្រជែងត្រូវធ្វើឡើងក្រោមនីតិវិធីសុខភាពយ៉ាងតឹងរ៉ឹង ក្នុងនោះរួមទាំងការកំណត់ចំនួនទស្សនិកជន និងគ្មានការចាប់ដៃរវាងអ្នកចូលរួម ក្រោយការប្រកួតបញ្ចប់ទៅ។ អ្នកចូលរួមព្រឹត្តិការណ៍នេះ មិនថាកីឡាការិនី ឬមន្ត្រីពាក់ព័ន្ធនានា ត្រូវឆ្លងកាត់ការធ្វើតេស្តជំងឺកូវីដ ១៩ រៀងរាល់ ៤ ថ្ងៃ ហើយអ្នកដែលចូលរួមការប្រកួត ១ រូប ទទួលលទ្ធផលវិជ្ជមាន ត្រូវបានដកឈ្មោះចេញពីកម្មវិធី កាលពីចុងសប្ដាហ៍កន្លងទៅ៕ AFP/VN
