ភ្នំពេញៈ សហព័ន្ធកីឡាបាល់ទាត់កម្ពុជា (FFC) បានប្រកាសឲ្យស្ថានីយទូរទេស្សន៍ក្នុងស្រុកទាំងអស់ ដែលមានចំណាប់អារម្មណ៍ ចង់ផ្សាយផ្ទាល់ ពីការប្រកួតមិត្តភាពអន្តរជាតិផ្លូវការ របស់ក្រុមជម្រើសជាតិកម្ពុជា ជាមួយក្រុមជម្រើសជាតិម៉ាឡេស៊ី ទីម័រខាងកើត និងក្រុមសិង្ហបុរី នាពេលខាងមុខនេះ ចូលមកធ្វើការដេញថ្លៃ ដើម្បីទទួលបានសិទ្ធិផ្សាយផ្ទាល់ស្របច្បាប់។
តាមសេចក្តីជូនដំណឹងរបស់ FFC មុននេះបន្តិច បានឲ្យដឹងថា៖ «សហព័ន្ធកីឡាបាល់ទាត់កម្ពុជា សូមជូនដំណឹងដល់ស្ថានីយទូរទស្សន៍ទាំងអស់ ឲ្យបានជ្រាប់ថា សហព័ន្ធ នឹងដាក់ឲ្យមានការដេញថ្លៃ ដើម្បីទទួលបាននូវសិទ្ធិផ្សាយផ្ទាល់ (TV live) ការប្រកួតបាល់ទាត់មិត្តភាពអន្តរជាតិផ្លូវការចំនួន ៣ របស់ក្រុមជម្រើសជាតិកម្ពុជា»។
ជុំវិញព័ត៌មានលម្អិត ទាក់ទងទៅនឹង នីតិវិធី និងបែបបទផ្សេងៗ ក្នុងការដេញថ្លៃផ្សាយផ្ទាល់នៃការប្រកួតមិត្តភាពអន្តរជាតិផ្លូវការរបស់ក្រុមជម្រើសជាតិនេះ FFC នឹងធ្វើកិច្ចប្រជុំមួយ នៅទីស្នាក់ការ របស់ខ្លួន ក្នុងពហុកីឡដ្ឋានជាតិ នាម៉ោង៣រសៀល ថ្ងៃទី ១៦ ខែសីហា ឆ្នាំ ២០១៨ ខាងមុខនេះ ហើយ FFC ក៏បានអញ្ជើញបណ្តាស្ថានីយទូរទស្សន៍ទាំងអស់ ដែលមានចំណាប់អារម្មណ៍ ចូលរួមក្នុងកិច្ចប្រជុំនោះ ដើម្បីពិភាក្សាគ្នាបន្ថែម ក្នុងការដេញថ្លៃផ្សាយផ្ទាល់នេះផងដែរ។
មន្រ្តីសហព័ន្ធកីឡាបាល់ទាត់កម្ពុជា មួយរូបបានបង្ហើបប្រាប់ភ្នំពេញ ប៉ុស្តិ៍ មុននេះបន្តិចថា៖«នេះជាលើកទី១ហើយ ដែលសហព័ន្ធ បានរៀបចំឲ្យមានការដេញថ្លៃផ្សាយផ្ទាល់ការប្រកួតរបស់ក្រុមជម្រើសជាតិកម្ពុជា សម្រាប់ស្ថានីយទូរទស្សន៍ក្នុងស្រុក ព្រោះយើងមិនធ្លាប់ធ្វើបែបនេះពីមុនមកទេ។ ហេតុនេះបណ្តាស្ថានីយទូរទស្សន៍ទាំងអស់ គួរណាស់មកចូលរួមប្រជុំ នៅថ្ងៃទី ១៦ ខែសីហា ទាំងអស់គ្នា ដើម្បីយើងអាចពិភាក្សាគ្នាបន្ថែម រកចំណុចរួមមួយ ទើបយើងឈានដល់ការដេញថ្លៃ រកស្ថានីយទូរទស្សន៍ ដែលទទួលបានសិទ្ធិផ្សាយផ្ទាល់»។
គួរបញ្ជាក់ថា សម្រាប់ការប្រកួតមិត្តភាពអន្តរជាតិផ្លូវការទាំង ៣ លើករបស់ក្រុមជម្រើសជាតិកម្ពុជា ដែលនឹងត្រូវធ្វើនៅពហុកីឡដ្ឋានជាតិ នាពេលខាងមុខនេះ គឺលើកទី ១ កម្ពុជា ត្រូវជួបក្រុមជម្រើសជាតិម៉ាឡេស៊ី នៅថ្ងៃទី ១០ ខែកញ្ញា ឯលើកទី ២ កម្ពុជា ត្រូវប៉ះក្រុមជម្រើសជាតិទីម័រខាងកើត នៅថ្ងៃទី ១២ ខែតុលា ហើយលើកទី ៣ កម្ពុជា ត្រូវប្រកួតនឹងក្រុមជម្រើសជាតិសិង្ហបុរី នៅថ្ងៃទី ១៦ ខែតុលា ខណៈម៉ោងប្រកួត ត្រូវធ្វើនៅល្ងាចម៉ោង ៦:៣០ ដូចគ្នាទាំងអស់។
សម្រាប់ការប្រកួតមិត្តភាពអន្តរជាតិទាំង៣លើកនេះ គឺត្រូវបានរៀបចំឡើង ដើម្បីឲ្យក្រុមជម្រើសជាតិកម្ពុជានេះ ត្រៀមលក្ខណៈសម្បត្តិបានគ្រប់គ្រាន់ ក្នុងការឈានទៅប្រកួតផ្លូវការពានរង្វាន់ AFF Suzuki Cup 2018 ក្នុងខែវិច្ឆិកា ខាងមុខ ដោយក្នុងនោះ ក្រុមកម្ពុជា ឈរនៅពូលA ជាមួយក្រុមជម្រើសជាតិវៀតណាម ម៉ាឡេស៊ី មីយ៉ាន់ម៉ា និងក្រុមឡាវ៕