ក្រុងមេនឆេស្ទ័រ៖ ស្ថាប័នគ្រប់គ្រងបាល់ទាត់ពិភពលោក (FIFA) វាយតម្លៃការដេញថ្លៃរួមគ្នានៃប្រទេសអូស្រ្តាលី និងនូវែលសេឡង់ សម្រាប់ព្រឹត្តិការណ៍បាល់ទាត់ពិភពលោកនារី ឆ្នាំ ២០២៣ (Women''s World Cup 2023) ថា ជាការដេញថ្លៃល្អបំផុតក្នុងការធ្វើម្ចាស់ផ្ទះរៀបចំការប្រកួត។
FIFA ឲ្យដឹងនៅក្នុងសេចក្តីថ្លែងការណ៍មួយកាលពីថ្ងៃពុធថា ខ្លួនបានទទួលឯកសារដេញថ្លៃផ្លូវការពីគូប្រជែងទាំង ៣ គឺកូឡុំប៊ី ជប៉ុន និងការសុំធ្វើសហម្ចាស់ផ្ទះរវាងអូស្រ្តាលី និងនូវែលសេឡង់។
ក្រុមប្រឹក្សារបស់ FIFA នឹងសម្រេចថា តើគូប្រជែងទាំង ៣ ប្រទេសណានឹងបានសិទ្ធិធ្វើជាម្ចាស់ផ្ទះ អំឡុងការប្រជុំតាមអនឡាញរបស់ក្រុមប្រឹក្សានៅថ្ងៃទី ២៥ ខែមិថុនា។ របាយការណ៍វាយតម្លៃរបស់ស្ថាប័នផ្តល់ការដេញថ្លៃរបស់អូស្ត្រាលី និងនូវែលសេឡង់នូវពិន្ទុជាមធ្យម ៤,១ ពិន្ទុ លើ ៥ ពិន្ទុ រីឯជប៉ុនមាន ៣,៩ ពិន្ទុ ហើយកូឡុំប៊ីបាន ២,៨ ពិន្ទុ។
ប្រទេសប្រេស៊ីល ដកបេក្ខភាពរបស់ខ្លួនកាលពីថ្ងៃចន្ទ ដោយនិយាយថា រដ្ឋាភិបាលមិនបានពិចារណាថា វាជារឿងល្អទេក្នុងការផ្តល់នូវការធានាផ្ដល់ហិរញ្ញវត្ថុក្នុងពេលការរីករាលដាលជំងឺកូវីដ ១៩។ ក្នុងឆ្នាំ ២០១៩ នៅប្រទេសបារាំង បានបំបែកកំណត់ត្រាខាងមានទស្សនិកជនច្រើនមើលតាមទូរទស្សន៍ ហើយមកទល់ពេលនេះ ត្រូវបានគេមើលឃើញថា ជាជំនាន់ដែលទទួលបានការចាប់អារម្មណ៍បំផុតសម្រាប់កីឡាបាល់ទាត់នារីនេះ។
អគ្គលេខាធិការរបស់ FIFA លោកស្រី Fatma Samoura មានប្រសាសន៍ថា៖ «គុណភាពនៃការដេញថ្លៃទាំងនេះ ជាសក្ខីភាពនៃសម្ទុះខ្លាំងក្លារបស់កីឡាបាល់ទាត់នារីបង្កើតឲ្យមានឡើង ហើយយើងកំពុងទន្ទឹងរង់ចាំធ្វើឲ្យកីឡាបាល់ទាត់ស្ត្រីឡើង ១ កម្រិតទៀតនៅព្រឹត្តិការណ៍ឆ្នាំ ២០២៣»។
របាយការណ៍នោះ បន្ថែមថា សំណើបេក្ខភាពទាំង ៣ បំពេញតាមលក្ខខន្តិក តែមានសំណួរចំពោះប្រទេសកូឡុំប៊ី ថា តើមានការគាំទ្រផ្នែកហិរញ្ញវត្ថុចាំបាច់ ឬអត់? ដោយរបាយការណ៍ លើកឡើងថា ប្រទេសកូឡុំប៊ី នឹងត្រូវការនូវចំនួនទឹកប្រាក់យ៉ាងច្រើននៃការវិនិយោគ និងការគាំទ្រទាំងភាគីពាក់ព័ន្ធក្នុងស្រុក និង FIFA ដើម្បីធ្វើឲ្យប្រសើរនូវលក្ខខណ្ឌដែលមានធៀបនឹងភាគី ២ ផ្សេងទៀត៕ AFP/VN